ಉಡುಪಿಗೆ ಸಿಎಂ ಸಿದ್ದರಾಮಯ್ಯ ಭೇಟಿ: ಬೇಡಿಕೆ ಪಟ್ಟಿ ಸಿದ್ಧ

Team Udayavani, Nov 19, 2017, 3:47 PM IST

ಉಡುಪಿ: ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಉಡುಪಿಗೆ ಆಗಮಿಸುತ್ತಿರುವ ಈ ಸಂದರ್ಭ ಜಿಲ್ಲೆಯ ಜನರಲ್ಲಿ ಹೊಸ ನಿರೀಕ್ಷೆ, ಆಶಾಭಾವನೆಗಳು ಹುಟ್ಟಿಕೊಂಡಿವೆ. ಸಿದ್ದರಾಮಯ್ಯ ನೇತೃತ್ವದ ಸರಕಾರದ ಈ ಆಡಳಿತಾವಧಿಯ ಕೊನೆ ಮತ್ತು ಚುನಾವಣೆ ವರ್ಷ ಆರಂಭ ಹಿನ್ನೆಲೆಯಲ್ಲಿ ನಿರೀಕ್ಷೆ ತುಸು ಹೆಚ್ಚಾಗಿಯೇ ಇದೆ.

ಡೀಮ್ಡ್ ಫಾರೆಸ್ಟ್‌, ಮರಳು ಸಮಸ್ಯೆ, ವಾರಾಹಿ, ಬ್ರಹ್ಮಾವರ ಸಕ್ಕರೆ ಕಾರ್ಖಾನೆ ಸೇರಿದಂತೆ ಹಲವಾರು ಸಮಸ್ಯೆಗಳ ಪರಿಹಾರ/ಕಾಮಗಾರಿಗಳಿಗೆ ವೇಗ ದೊರೆಯುವ ನಿಟ್ಟಿನಲ್ಲಿ ಸಿಎಂ ಏನಾದರೊಂದು ತೀರ್ಮಾನಕ್ಕೆ ಬರಬಹುದು. ಈ ಭಾಗದ ಸಚಿವರು, ಶಾಸಕರು ಸೇರಿದಂತೆ ಜನಪ್ರತಿ ನಿಧಿಗಳು ಸಿಎಂಗೆ ಬೇಡಿಕೆಗಳ ಪಟ್ಟಿ ಮಂಡಿಸ ಬಹುದು. ಅದಕ್ಕೆ ಸಿಎಂ ಸ್ಪಂದಿಸಬಹುದು.

ಚುನಾವಣೆ ಇರುವುದರಿಂದ ತುರ್ತುಸ್ಪಂದನೆ ಅನಿವಾರ್ಯವೂ ಹೌದು ಎಂಬ ತರ್ಕವೂ ಇದೆ. ಡೀಮ್ಡ್ ಫಾರೆಸ್ಟ್‌ ಸಮಸ್ಯೆಯಿಂದಾಗಿ 94 ಸಿ ಅಡಿ ಹಕ್ಕುಪತ್ರ, ಅಕ್ರಮ ಸಕ್ರಮ ಹಕ್ಕುಪತ್ರ ದೊರೆಯುತ್ತಿಲ್ಲ. ಇದು ಜಿಲ್ಲೆಯ ಮೂರು ತಾಲೂಕುಗಳಿಗೂ ಸಂಬಂಧಿಸಿದ ಸಮಸ್ಯೆ. ಒಂದೆಡೆ ಸರಕಾರ ಯೋಜನೆಗಳನ್ನು ಘೋಷಿಸುತ್ತದೆ. ಆದರೆ ಅವುಗಳ ಅನುಷ್ಠಾನಕ್ಕೆ ಇರುವ ಅಡ್ಡಿ ಆತಂಕಗಳನ್ನು ನಿವಾರಿಸುವುದಿಲ್ಲ ಎಂಬ ಅಸಮಾಧಾನ ಇದೆ. ಮುಗಿಯದ ಮರಳು ಗೋಳು ಮರಳುಗಾರಿಕೆ ಸಮಸ್ಯೆ ಇನ್ನೂ ಬಗೆಹರಿದಿಲ್ಲ. ಸಿಆರ್‌ಝಡ್‌ ವಲಯದ ಮರಳುಗಾರಿಕೆಯ ತೀರ್ಮಾನ ಇನ್ನೂ ಆಗದಿರುವುದರಿಂದ ಮರಳಿನ ಸಮಸ್ಯೆಗೆ ಮುಕ್ತಿ ದೊರೆತಿಲ್ಲ. ಅಕ್ರಮ ಮರಳು ಸಾಗಾಟ, ಮರಳಿನ ಕೊರತೆ ಉಂಟಾಗಿದೆ. ಪ್ರತ್ಯೇಕ ಮರಳುನೀತಿ ಬೇಡಿಕೆ ಹಾಗೆಯೇ ಉಳಿದುಕೊಂಡಿದೆ.

ವಾರಾಹಿ ಯೋಜನೆ ಉಡುಪಿ ಮತ್ತು ಕುಂದಾಪುರ ತಾಲೂಕುಗಳ ಒಟ್ಟು 66 ಗ್ರಾಮಗಳಿಗೆ (38,800 ಎಕರೆ) ನೀರು ಒದಗಿಸುವ ಉದ್ದೇಶದಿಂದ, ಮುಖ್ಯವಾಗಿ ಕಬ್ಬು ಬೆಳೆಗಾರಿಗೆ ಅನುಕೂಲವಾಗಲೆಂದು ಆರಂಭವಾದ ಯೋಜನೆ ಇನ್ನೂ ಪೂರ್ಣಗೊಂಡಿಲ್ಲ. ಜತೆಗೆ ಬ್ರಹ್ಮಾವರ ಸಕ್ಕರೆ ಕಾರ್ಖಾನೆ ಮುಚ್ಚಿ 14 ವರ್ಷಗಳೇ ಸಂದಿರು ವುದರಿಂದ ಈಗ ಈ ನೀರಾವರಿ ಯೋಜನೆ ಪೂರ್ಣಗೊಂಡರೆ ಆ ನೀರಿನ ಸದ್ಬಳಕೆ ಹೇಗೆ ಎಂಬ ಪ್ರಶ್ನೆಗಳು ಕೂಡ ಹುಟ್ಟಿಕೊಂಡಿವೆ. 

ಬ್ರಹ್ಮಾವರ ಸಕ್ಕರೆ ಕಾರ್ಖಾನೆ ಪುನಶ್ಚೇತನಗೊಳಿಸಲು ಸರಕಾರ ಒಲವು ತೋರಿಸಿತ್ತು. ಸಕ್ಕರೆ ಕಾರ್ಖಾ ನೆಯ 110 ಎಕರೆಯಲ್ಲಿ 25 ಎಕರೆಯನ್ನು ಸಕರಾರಿ ಮೆಡಿಕಲ್‌ ಕಾಲೇಜು ಸ್ಥಾಪನೆಗಾಗಿ ಸರಕಾರಕ್ಕೆ ಮಾರಾಟ ನೀಡಿ 30 ಕೋ.ರೂ. ಅಥವಾ 60 ಕೋ.ರೂ. ವೆಚ್ಚದಲ್ಲಿ ಪುನಶ್ಚೇತನಗೊಳಿಸುವ ಯೋಜನೆಯ ಕುರಿತು ಜಿಲ್ಲಾಡಳಿತ, ಸಚಿವರು ಮತ್ತು ಕಾರ್ಖಾನೆ ಆಡಳಿತ ಮಂಡಳಿಯ ಪ್ರತಿ ನಿಧಿಗಳ ಸಮ್ಮುಖ ಚರ್ಚೆಯಾಗಿತ್ತು. ಇದಕ್ಕೆ ಪೂರಕವಾಗಿ ವರದಿ ತಯಾರಿಸುವ ಪ್ರಕ್ರಿಯೆಗಳು ನಡೆಯುತ್ತಿದ್ದು ಈ ಕುರಿತು ಮುಖ್ಯಮಂತ್ರಿ ಯವರು ಸ್ಪಷ್ಟ ನಿಲುವು ವ್ಯಕ್ತಪಡಿಸಿ ಸಿಹಿ ಸುದ್ದಿ ನೀಡುವರೇ ಎಂಬ ನಿರೀಕ್ಷೆ ಇದೆ. 

ನೀರಿನ ನಿರೀಕ್ಷೆ ಜಿ.ಪಂ.ಗೆ ಕಳೆದ ಎರಡು ವರ್ಷಗಳಿಂದ ಕುಡಿಯುವ ನೀರು ಕಾಮಗಾರಿಗಳಿಗೆ ಹಣ ಬಿಡುಗಡೆಯಾಗಿಲ್ಲ ಎಂಬ ಚರ್ಚೆ ಜಿ.ಪಂ.ನಲ್ಲಿ ಆಗಾಗ್ಗೆ ನಡೆಯುತ್ತಲೇ ಇದೆ. ಅವಿಭಜಿತ ದ.ಕ.ಜಿಲ್ಲೆಯ ಕುಡಿಯುವ ನೀರಿನ ಸಮಸ್ಯೆ ಪರಿಹಾರಕ್ಕೆಂದು 100 ಕೋ.ರೂ. ವೆಚ್ಚದ ಪಶ್ಚಿಮವಾಹಿನಿ ಯೋಜನೆ ಘೋಷಿಸಲಾಗಿತ್ತು. ಆದರೆ ಈ ನಿಟ್ಟಿನಲ್ಲಿ ಯಾವುದೇ ಬೆಳವಣಿಗೆ ಆಗಿಲ್ಲ. 

ಉಡುಪಿ ಜನರ ನೀರು ಸಮಸ್ಯೆ ಪರಿಹರಿಸುವ ಯೋಜನೆ ಘೋಷಿಸುವರೇ ಎಂಬ ನಿರೀಕ್ಷೆ ಇದೆ. ಅತ್ತ ಕಾಪುವಿನಲ್ಲಿ ಮಿನಿ ವಿಧಾನಸೌಧದ ಬೇಡಿಕೆ, ಮೀನುಗಾರರು ಮತ್ತು ಯುಪಿಸಿಎಲ್‌ ಪ್ರದೇಶದ ಪ್ರತಿನಿಧಿಗಳು ಕೂಡ ಬೇಡಿಕೆ ಪಟ್ಟಿ ನೀಡುವ ಯತ್ನದಲ್ಲಿದ್ದಾರೆ. ಇನ್ನು ಕೃಷಿ ಸಾಲಮನ್ನಾ ಜೂ. 20ರ ತನಕದ ಸಾಲಗಾರರಿಗೆ ಮಾತ್ರ ಎಂದಿದ್ದರಿಂಧ ಅದರೊಳಗೆ ಪ್ರಾಮಾಣಿಕವಾಗಿ ಸಾಲ ಪಾವತಿಸಿದ ರೈತರಿಗೆ ನಿರಾಶೆಯಾಗಿದೆ. 

ಸಂತೋಷ್‌ ಬೊಳ್ಳೆಟ್ಟು