ಪಳ್ಳಿ: ಗಾಳಿ-ಮಳೆಗೆ ಮನೆಗಳು, ಶಾಲೆಗೆ ಹಾನಿ

Team Udayavani, Oct 15, 2019, 5:36 AM IST

ಪಳ್ಳಿ: ರವಿವಾರ ರಾತ್ರಿ ಸುರಿದ ಭಾರೀ ಗಾಳಿ ಮಳೆಗೆ ಪಳ್ಳಿ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಕೊಕೈಕಲ್‌ ಬಳಿ ಎರಡು ಮನೆ ಹಾಗೂ ಪಳ್ಳಿ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಗೆ ಅಪಾರ ಹಾನಿಯಾಗಿದೆ.

ಪಳ್ಳಿ ಗ್ರಾಮದ ಕೊಕೈಕಲ್‌ ನಿವಾಸಿ ವಸಂತಿ ಅವರ ಮನೆಗೆ ಮರ ಬಿದ್ದು ಎರಡು ತಗಡು ಶೀಟು ಹಾಗೂ ಗೋಡೆ ಬಿರುಕು ಬಿಟ್ಟಿದೆ. ಭಾಸ್ಕರ ಪೂಜಾರಿ ಅವರ ಮನೆಯ 300 ಹೆಂಚು ಹಾಗೂ ಮರದ ಪಕ್ಕಾಸುಗಳಿಗೆ ಹಾನಿಯಾಗಿದೆ.

ಬೃಹತ್‌ ಗಾತ್ರದ ಮರ ಉರುಳಿ ಬಿದ್ದು ಪಳ್ಳಿ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ 200ಕ್ಕೂ ಅಧಿಕ ಹೆಂಚು ಹಾಗೂ ಶೌಚಾಲಯಕ್ಕೆ ಹಾನಿಯುಂಟಾಗಿದೆ. ಪಳ್ಳಿ ಗ್ರಾಮ ಪಂಚಾಯತ್‌ ವ್ಯಾಪ್ತಿಯಲ್ಲಿ ಹಲವಾರು ಮರಗಳು ಉರುಳಿ ಬಿದ್ದಿದ್ದು, ಯಾವುದೇ ಪ್ರಾಣ ಹಾನಿ ಉಂಟಾಗಿಲ್ಲ. ಸ್ಥಳಕ್ಕೆ ಗ್ರಾಮ ಕರಣಿಕ ಗುರು ಪ್ರಸಾದ್‌, ಗ್ರಾಮ ಸಹಾಯಕ ಸುಂದರ್‌ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.