ಗೋಡಂಬಿ ಕೊಡಿಸುವುದಾಗಿ 28 ಲಕ್ಷ ಎಗರಿಸಿದ ಕದೀಮರು

Team Udayavani, Jul 17, 2021, 8:43 PM IST

ಮುಂಡಗೋಡ: ಅಪರಚಿತರಿಬ್ಬರು ಗೋಡಂಬಿ ಕೊಡಿಸುವುದಾಗಿ ನಂಬಿಸಿ ವ್ಯಕ್ತಿಯೊಬ್ಬನನ್ನು ಕರೆಯಿಸಿಕೊಂಡು ಅವರ ಬಳಿ ಇದ್ದ ಸುಮಾರು 28 ಲಕ್ಷ ರೂ. ಹಣದ ಬ್ಯಾಗನ್ನು ಕಸಿದು ಪರಾರಿಯಾದ ಘಟನೆ ತಾಲೂಕಿನ ಮಳಗಿ ವ್ಯಾಪ್ತಿಯ ಧರ್ಮಾ ಕಾಲೋನಿ ಹತ್ತಿರ ಶುಕ್ರವಾರ ನಡೆದಿದೆ.

ಚಿಕ್ಕೋಡಿ ಮೂಲದ ಶಿವನಗೌಡ ಪಾಟೀಲ ಮತ್ತು ಆತನ ಸ್ನೇಹಿತ ಅಸ್ಲಂ ನದಾಫ ಕಾರಿನಲ್ಲಿ ಹಣ ತೆಗೆದುಕೊಂಡು ಧರ್ಮಾ ಕಾಲೋನಿಗೆ ಬಂದಿದ್ದಾರೆ. ಗೋಡಂಬಿ ಕೊಡಿಸುವುದಾಗಿ ನಂಬಿಸಿದ್ದ ಇಬ್ಬರು ವ್ಯಕ್ತಿಗಳು ಧರ್ಮಾ ಜಲಾಶಯದ ಸಮೀಪ ಇವರಿಬ್ಬರನ್ನು ಕರೆದುಕೊಂಡು ಹೋಗುವಂತೆ ನಟಿಸಿ ಶಿವನಗೌಡ ಅವರ ಬಳಿ ಇದ್ದ ಸುಮಾರು 28 ಲಕ್ಷ ರೂ. ಇರುವ ಹಣದ ಬ್ಯಾಗನ್ನು ಎಗರಿಸಿ ಡ್ಯಾಂ ಕೆಳಗಡೆ ಓಡಿ ಹೋಗಿದ್ದಾರೆ. ಅವರನ್ನು ಬೆನ್ನು ಹತ್ತಿದಾಗ ಮುಂದೆ ಮತ್ತೆ ಕೂಡಿಕೊಂಡಿದ್ದ ನಾಲ್ಕು ಜನರು ಸೇರಿ ಎಲ್ಲರೂ ಪರಾರಿಯಾಗಿದ್ದಾರೆ ಎಂದು ಹಣ ಕಳೆದುಕೊಂಡ ವ್ಯಕ್ತಿ ಪೊಲೀಸರಿಗೆ ದೂರು ನೀಡಿದ್ದಾನೆ.

ಸ್ಥಳಕ್ಕೆ ಡಿವೈಎಸ್‌ಪಿ ರವಿ ನಾಯ್ಕ, ಸಿಪಿಐ ಪ್ರಭುಗೌಡ, ಪಿಎಸ್‌ಐಗಳಾದ ಎನ್‌.ಡಿ. ಜಕ್ಕಣ್ಣವರ, ಬಸವರಾಜ ಮಬನೂರ ಭೇಟಿ ನೀಡಿ ಮಾಹಿತಿ ಕಲೆ ಹಾಕಿದ್ದಾರೆ. ಆರೋಪಿಗಳ ಪತ್ತೆಗೆ ವಿಶೇಷ ತಂಡಗಳನ್ನು ರಚಿಸಲಾಗಿದೆ.