ತೋಟಗಾರಿಕಾ ಯಾಂತ್ರೀಕರಣ ಯೋಜನೆಯಡಿಯಲ್ಲಿ ಜಿಲ್ಲೆಗೆ  550 ಲಕ್ಷ ರೂ. ಬಿಡುಗಡೆ

Team Udayavani, Dec 24, 2022, 1:18 PM IST

ಶಿರಸಿ: ಪ್ರಸಕ್ತ ಸಾಲಿನ ತೋಟಗಾರಿಕಾ ಯಾಂತ್ರೀಕರಣ ಯೋಜನೆಯಡಿಯಲ್ಲಿ  ಜಿಲ್ಲೆಗೆ  550 ಲಕ್ಷ ರೂಪಾಯಿಗಳನ್ನು  ಸ್ಪೀಕರ್ ವಿಶ್ವೇಶ್ವರ ಹೆಗಡೆ‌ ಕಾಗೇರಿ ಬಿಡುಗಡೆಗೊಳಿಸಿದ್ದಾರೆ.

ಹಿಂದಿನ ಅಧಿವೇಶನದಲ್ಲಿ  ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರು ಮಲೆನಾಡಿನ ಅಡಿಕೆ ಕೊಯ್ಲಿನ ಕೂಲಿ ಸಮಸ್ಯೆ ಬಗ್ಗೆ ಹಾಗೂ ಅದಕ್ಕೆ ಪರಿಹಾರವಾಗಿ ಪೈಬರ ದೋಟಿಯಿಂದ ರೈತರಿಗೆ ಹೆಚ್ಚಿನ ಅನುಕೂಲವಾಗುವ ಬಗ್ಗೆ ಸರಕಾರಕ್ಕೆ ಸೂಚನೆ ನೀಡಿದ ಹಿನ್ನಲೆಯಲ್ಲಿ  ತೋಟಗಾರಿಕಾ ಸಚಿವರು ಪೈಬರ ದೋಟಿಯ ಖರೀದಿಯ ಮೇಲೆ  ಸರಕಾರವು ಶೇ. 40 ಜನರಲ್, ಎಸ್.ಸಿ  ಎಸ್.ಟಿ  ಹಾಗೂ   ಮಹಿಳೆಯರಿಗೆ ಶೇ. 50 ಸಬ್ಸಿಡಿ  ಘೋಷಿಸಿದ್ದರು

ರೈತರು ಯಂತ್ರೀಕರಣದ ಕಡೆಗೆ ಹೆಚ್ಚಿನ ಒಲವು ತೋರುವುದರ ಜೊತೆಗೆ ಆರ್ಥಿಕ ಉಳಿತಾಯವು ಆಗಲಿದೆ. ಈಗಾಗಲೇ ರೈತರು ಪೈಬರ  ದೋಟಿಯ ಪ್ರಯೋಗವನ್ನು ಮಾಡುತ್ತಿದ್ದು, ಸರಕಾರವು ಸಬ್ಸಿಡಿ ಘೋಷಿಸಿರುವುದರಿಂದ  ಹೆಚ್ಚಿನ ರೈತರಿಗೆ ಇದರಿಂದ ಪ್ರಯೋಜನವಾಗಲಿದೆ ಎಂದೂ ಸ್ಪೀಕರ್ ಆಪ್ತ‌ ಕಾರ್ಯದರ್ಶಿ ಸುಬ್ರಾಯ ಹೆಗಡೆ ಹಲಸಿನಳ್ಳಿ ತಿಳಿಸಿದ್ದಾರೆ.

ರೈತರ  ಹಿತದೃಷ್ಠಿಯಿಂದ ಕೈಗೊಂಡಿರುವ  ಈ ನಿರ್ಣಯ ಅತ್ಯಂತ ಸೂಕ್ತವಾಗಿದ್ದು, ಸರಕಾರ ಹಾಗೂ  ತೋಟಗಾರಿಕಾ ಸಚಿವರಿಗೆ  ರೈತರ ಪರವಾಗಿ  ಅಭಿನಂದನೆಯನ್ನು ಸ್ಪೀಕರ್ ಕಾಗೇರಿ ಅವರು ಸಲ್ಲಿಸಿದ್ದಾರೆ ಎಂದೂ ಪ್ರಕಟನೆಯಲ್ಲಿ ತಿಳಿಸಿದ್ದಾರೆ.