Dandeli: ಹಣ ಮತ್ತು ಬಂಗಾರವಿದ್ದ ಬ್ಯಾಗ್ ಮರಳಿಸಿ ಪ್ರಾಮಾಣಿಕತೆ

Team Udayavani, Aug 13, 2023, 4:17 PM IST

ದಾಂಡೇಲಿ : ನಗರದ ಸಂಡೇ ಮಾರ್ಕೆಟಿನಿಲ್ಲಿ ಹಣ ಮತ್ತು ಬಂಗಾರದ ಸರವಿದ್ದ ಬ್ಯಾಗ್ ಸಿಕ್ಕಿರುವುದನ್ನು ಅದರ ವಾರೀಸುದಾರರಿಗೆ ಮರಳಿಸಿ ಪ್ರಾಮಾಣಿಕತೆ ಮೆರೆದ ಘಟನೆ ಭಾನುವಾರ ನಡೆದಿದೆ

ನಗರದ ಸಂಡೇ ಮಾರ್ಕೆಟಿಗೆ ತರಕಾರಿ ತರಲೆಂದು ಹೋಗಿದ್ದ ಸ್ಥಳೀಯ 14ನೇ ಬ್ಲಾಕ್ ನಿವಾಸಿ ನವೀನ್ ಸತ್ತುರಾಮ ಧರೇಕರ್ ಇವರಿಗೆ ಬ್ಯಾಗೊಂದು ಸಿಕ್ಕಿದೆ. ಬ್ಯಾಗನ್ನು ಎತ್ತಿಕೊಂಡು ಅಲ್ಲಿ ಇಲ್ಲಿ ಎಂದು ಹಡುಕಾಡಿದ್ದಾರೆ. ಕೊನೆಗೆ ಮಾಧ್ಯಮಕ್ಕೆ ಮಾಹಿತಿ ನೀಡಿದ್ದಾರೆ. ಮಾಧ್ಯಮದವರ ಸೂಚನೆಯಂತೆ ಬ್ಯಾಗನ್ನು ಮನೆಗೆ ತಂದು ಪರಿಶೀಲಿಸಿದಾಗ ಅದರಲ್ಲಿ 5400 ರೂ. ನಗದು ಮತ್ತು ಒಂದು ಬಂಗಾರದ ಸರ ಹಾಗೂ ಆಧಾರ್ ಕಾರ್ಡ್, ಬ್ಯಾಂಕ್ ಉಳಿತಾಯ  ಖಾತೆ ಪುಸ್ತಕ ಸೇರಿದಂತೆ ಇನ್ನಿತರ ಕಾಗದ ಪತ್ರಗಳು ಇದ್ದವು.

ಆಧಾರ್ ಕಾರ್ಡಿನಲ್ಲಿ ಹೆಸರು ಮತ್ತು ಮೊಬೈಲ್ ನಂಬರ್ ಕಂಡು ಕೂಡಲೇ ಬ್ಯಾಗಿನ ವಾರೀಸುದಾರರಿಗೆ ಮೊಬೈಲ್ ಕರೆ ಮಾಡಿ ತಿಳಿಸಿದ್ದಾರೆ. ಕರೆ ಸ್ವೀಕರಿಸಿದ ಬಳಿಕ ಸಂಬಂಧಿತ ಬ್ಯಾಗಿನ ವಾರೀಸುದಾರರಾದ ಅಂಬೇವಾಡಿ ಗ್ರಾ.ಪಂಚಾಯ್ತು ವ್ಯಾಪ್ತಿಯ ನವಗ್ರಾಮದ ನಿವಾಸಿ ಇಂದುಬಾಯಿ ಕಲ್ಲಪ್ಪ ಪಾಟೀಲ್ ಅವರು ಪತ್ರಕರ್ತ ಸಂದೇಶ್.ಎಸ್.ಜೈನ್ ಅವರ ಕಚೇರಿಗೆ ಬಂದು, ಬ್ಯಾಗನ್ನು ನವೀನ್ ಸತ್ತುರಾಮ ಧರೇಕರ್ ಅವರಿಂದ ಪಡೆದುಕೊಂಡರು. ಹಣ, ಬಂಗಾರ ಸಹಿತ ಬ್ಯಾಗನ್ನು ಮರಳಿಸಿದ ನವೀನ್ ಸತ್ತುರಾಮ ಧರೇಕರ್ ಅವರ ಪ್ರಾಮಾಣಿಕತೆಗೆ ಮೆಚ್ಚುಗೆ ವ್ಯಕ್ತವಾಗಿದೆ.