ಅವಿರೋಧ ಆಯ್ಕೆ ಪರಿಶೀಲನೆ

Team Udayavani, Dec 14, 2020, 6:34 PM IST

ಕಾರವಾರ: ಉತ್ತರ ಕನ್ನಡ ಜಿಲ್ಲೆಯಲ್ಲಿ ಎರಡು ಹಂತದಲ್ಲಿ ಚುನಾವಣೆ ನಡೆಯುತ್ತಿದ್ದು,ಈಗಾಗಲೇ ನಾಮಪತ್ರ ಪರಿಶೀಲನೆ ಪ್ರಕ್ರಿಯೆಕರಾವಳಿ ತಾಲೂಕಿನಲ್ಲಿ ಮುಗಿದಿದೆ. ಕಾರವಾರ ತಾಲೂಕಿನ 18 ಗ್ರಾಪಂಗಳ 226 ಸ್ಥಾನಗಳಿಗೆ 672 ಅಭ್ಯರ್ಥಿಗಳ ನಾಮಪತ್ರ ಕ್ರಮಬದ್ಧವಾಗಿವೆ. ಕಾರವಾರ ತಾಲೂಕಿನ 2 ಗ್ರಾ.ಪಂ.ನ ತಲಾ ಒಂದೊಂದುವಾರ್ಡ್‌ಗೆ ಯಾವುದೇ ನಾಮಪತ್ರ ಸಲ್ಲಿಕೆಯಾಗಿಲ್ಲ. ಡಿ.14 ನಾಮತ್ರ ಹಿಂತೆಗೆಯಲು ಕೊನೆಯ ದಿನವಾಗಿದೆ. ಆ ನಂತರ ಕಣದಲ್ಲಿ ಉಳಿಯುವವರ ಸ್ಪಷ್ಟ ಚಿತ್ರಣ ಸಿಗಲಿದೆ. ಅಂಕೋಲಾದ 21 ಗ್ರಾಪಂಗಳ 226 ಸ್ಥಾನಗಳಿಗೆ 715 ನಾಮಪತ್ರ ಕ್ರಮಬದ್ಧವಾಗಿವೆ. ಅಂಕೋಲಾ 3 ಗ್ರಾಮಗಳ ಮೂರು ವಾರ್ಡ್‌ಗಳಿಗೆ ಯಾವುದೇ ನಾಮಪತ್ರ ಸಲ್ಲಿಕೆಯಾಗಿಲ್ಲ.

ಕುಮಟಾ ತಾಲೂಕಿನ 321 ಸ್ಥಾನಗಳಿಗೆ 1041 ನಾಮಪತ್ರ, ಹೊನ್ನಾವರದ 323 ಸ್ಥಾನಗಳಿಗೆ 1019 ನಾಮಪತ್ರ, ಭಟ್ಕಳದ 284 ಸ್ಥಾನಗಳಿಗೆ 620 ನಾಮಪತ್ರ ಸಲ್ಲಿಕೆಯಾಗಿವೆ.ಕರಾವಳಿ ಐದು ತಾಲೂಕಿನ 101 ಗ್ರಾಪಂಗಳ 1360 ಸ್ಥಾನಗಳಿಗೆ 4432 ಅಭ್ಯರ್ಥಿಗಳ ನಾಮಪತ್ರ ಸ್ವೀಕೃತವಾಗಿವೆ ಎಂದು ಜಿಲ್ಲಾಧಿಕಾರಿ ಹರೀಶಕುಮಾರ್‌ ತಿಳಿಸಿದ್ದಾರೆ.

ಕರಾವಳಿ ತಾಲೂಕಿನಲ್ಲಿ ಒಟ್ಟು 449955 ಮತದಾರರು ಇದ್ದು, ಇವರಲ್ಲಿ 226121ಪುರುಷ, 223834 ಮಹಿಳಾ ಮತದಾರರು ಮತಚಲಾಯಿಸಲಿದ್ದಾರೆ. ಕಾರವಾರ ತಾಲೂಕಿನಲ್ಲಿ 71940, ಅಂಕೋಲಾದಲ್ಲಿ 74316, ಕುಮಟಾ105661, ಹೊನ್ನಾವರ 105634, ಭಟ್ಕಳ ತಾಲೂಕಿನಲ್ಲಿ 92404 ಮತದಾರರುಮತದಾನದ ಹಕ್ಕು ಹೊಂದಿದ್ದಾರೆ. ಕೋವಿಡ್‌ಮುನ್ನೆಚ್ಚರಿಕೆಯೊಂದಿಗೆ ಮಾಸ್ಕ್ ಧರಿಸಿಮತದಾನ ಮಾಡುವುದು ಕಡ್ಡಾಯ ಎಂದು ಜಿಲ್ಲಾಧಿಕಾರಿ ಹೇಳಿದ್ದಾರೆ.

ಕಾರವಾರ, ಅಂಕೋಲಾ, ಕುಮಟಾ,ಹೊನ್ನಾವರ ಮತ್ತು ಭಟ್ಕಳದಲ್ಲಿ ನಾಮಪತ್ರ  ಪರಿಶೀಲನೆ ಶನಿವಾರ ರಾತ್ರಿ ಮುಗಿದಿರುತ್ತದೆ. ಎರಡನೆ ಹಂತದ ಗ್ರಾಪಂ ಚುನಾವಣೆಪ್ರಕ್ರಿಯೆ ಘಟ್ಟದ ಮೇಲಿನ ತಾಲೂಕುಗಳಾದ ಸಿದ್ದಾಪುರ, ಶಿರಸಿ, ಮುಂಡಗೊಡ,ಯಲ್ಲಾಪುರ, ಹಳಿಯಾಳ, ದಾಂಡೇಲಿ ಮತ್ತು ಜೊಯಿಡಗಳಲ್ಲಿ ನಾಮಪತ್ರ ಸ್ವೀಕರಿಸುವ ಪ್ರಕ್ರಿಯೆ ನಡೆಯುತ್ತಿದೆ. ಈ ಎಲ್ಲಾ ಪ್ರಕ್ರಿಯೆಗಳು ಪಾರದರ್ಶಕ ಮತ್ತು ನಿಷ್ಪಕ್ಷಪಾತವಾಗಿ ನಡೆಸಲುಜಿಲ್ಲಾಡಳಿತ ಎಲ್ಲಾ ರೀತಿಯ ಕ್ರಮ ಕೈಗೊಂಡಿದೆ. ನಾಮಪತ್ರ ಪರಿಶೀಲನೆನಂತರ ಒಂದು ಸ್ಥಾನಕ್ಕೆ ಒಂದೇ ನಾಮಪತ್ರ ಸಲ್ಲಿಕೆಯಾದಲ್ಲಿ ಅವಿರೋಧ ಆಯ್ಕೆಘೋಷಿಸಲಾಗುತ್ತದೆ. ಆದರೆ ಚುನಾವಣ ಆಯೋಗವು ರಾಜ್ಯದ ಕೆಲವು ಭಾಗಗಳಲ್ಲಿ ಅವಿರೋಧ ಆಯ್ಕೆ ಸಂಬಂಧ ನಡೆಯುತ್ತಿರುವ ಎಲ್ಲಾ ಚಟುವಟಿಕೆಗಳನ್ನು ಬಹಳ ಗಂಭೀರವಾಗಿ ಪರಿಗಣಿಸಿದೆ ಮತ್ತು ಜಿಲ್ಲಾಧಿಕಾರಿಗಳಿಗೆ ಒಂದೇ ನಾಮಪತ್ರ ಸಲ್ಲಿಕೆ ಹಿಂದಿನ ಉದ್ದೆಶ ಹಾಗೂ ವಾತಾವರಣವನ್ನು ಸರಿಯಾಗಿ ಪರಿಶೀಲಿಸಲು ಸೂಚಿಸಿದೆ.

ಉತ್ತರ ಕನ್ನಡ ಜಿಲ್ಲೆಯಲ್ಲಿಯೂ ಸಹ ಒಂದು ಸ್ಥಾನಕ್ಕೆ ಒಂದೇ ನಾಮಪತ್ರ ಸಲ್ಲಿಕೆಯಾಗಿದ್ದರೆ,ಈ ಬಗ್ಗೆ ಸೂಕ್ಷ್ಮವಾಗಿ ಪರಿಶೀಲಿಸುತ್ತಿದೆ. ನಾಮಪತ್ರ ಪರಿಶೀಲನೆ ನಂತರ ಒಂದು ಸ್ಥಾನಕ್ಕೆಒಂದೇ ನಾಮಪತ್ರ ಸಲ್ಲಿಕೆಯಾದಲ್ಲಿ ಅವಿರೋಧ ಆಯ್ಕೆ ಘೋಷಿಸಲಾಗುತ್ತದೆ. ಆದರೆ ಅವಿರೋಧ ಆಯ್ಕೆ ಸಂಬಂಧ ಯಾರಾದರೂ ಆಮಿಷ ಒಡ್ಡುವುದು, ನಿಯಮ ಬಾಹಿರ, ಅಕ್ರಮ ವ್ಯವಹಾರ ನಡೆಸುವುದು ಕಂಡುಬಂದರೆ, ಜಿಲ್ಲಾ ಚುನಾವಣಾ ಅಧಿಕಾರಿಯಾಗಿ ಅಂತಹವರ ಮೇಲೆ ಕಾನೂನಿನಡಿ ನಿರ್ದಾಕ್ಷಿಣ್ಯ ಕ್ರಮಕ್ಕೆ ರಾಜ್ಯ ಚುನಾವಣಾ ಆಯೋಗಕ್ಕೆ ವರದಿ ಮಾಡಲಾಗುವುದು. ಈ ಬಗ್ಗೆ ಪೊಲೀಸ್‌ ಇಲಾಖೆಗೆ ಮತ್ತು ತಾಲೂಕಿನ ಎಲ್ಲಾ ಮಾದರಿ ನೀತಿ ಸಂಹಿತೆ ತಂಡಗಳು ಈ ಬಗ್ಗೆ ತೀವ್ರನಿಗಾ ಇಡಲು ಸೂಚನೆ ನೀಡಲಾಗಿದೆ ಎಂದು ಜಿಲ್ಲೆಯ ಮುಖ್ಯ ಚುನಾವಣಾಧಿಕಾರಿ ಡಾ| ಹರೀಶ್‌ ಕುಮಾರ್‌ ತಿಳಿಸಿದ್ದಾರೆ.