Sirsi: ಗವಿನಗುಡ್ಡ ಸುತ್ತ ಕಬ್ಬು, ಭತ್ತದ ಗದ್ದೆಗಳಿಗೆ ಕಾಡಾನೆ ದಾಳಿ… ಬೆಳೆ ನಾಶ

Team Udayavani, Nov 8, 2024, 5:21 PM IST

ಶಿರಸಿ: ತಾಲೂಕಿನ ಗಡಿ ಭಾಗವಾದ ಸಿದ್ದಾಪುರ ತಾಲೂಕಿನ ಗವಿನಗುಡ್ಡದಲ್ಲಿ ಆನೆ ದಾಳಿಯಾಗಿದೆ. ಶಿರಸಿ ವಲಯಾರಣ್ಯ ವಾಪ್ತಿಯ ಗ್ರಾಮವಾಗಿದ್ದು, ಕಳೆದ ಗುರುವಾರ(ನ.7) ತಡ ರಾತ್ರಿ ಐದು ಆನೆಗಳ ಹಿಂಡು ದಾಳಿ ನಡೆಸಿದ್ದು, ಕಬ್ಬಿನ ಗದ್ದೆ, ಭತ್ತದ ಗದ್ದೆಗಳಲ್ಲಿ ಲೂಟಿ ಮಾಡಿದೆ.

ಇಲ್ಲಿನ ವಿಜಯೇಂದ್ರ ನಾಯ್ಕ ಅವರ ಕಬ್ಬಿನಗದ್ದೆ, ಚಂದ್ರಶೇಖರ್ ಅವರ ಭತ್ತದ ಗದ್ದೆ, ಹೊಸ್ಕೊಪ್ಪ, ಬೇಣದ ಮನೆ ಭಾಗದಲ್ಲೂ ಆನೆ ಸಂಚರಿಸಿ ದಾಳಿ ಮಾಡಿ ಅಪಾರ ಪ್ರಮಾಣದ ಬೆಳೆ ಹಾನಿ ಮಾಡಿ ಆತಂಕ ನಿರ್ಮಾಣ ಮಾಡಿದೆ.

ಕಳೆದ ಐದಾರು ವರ್ಷಗಳಿಂದ ಆನೆಗಳ ಹಿಂಡು ಅರಣ್ಯ ಉಪ ವಿಭಾಗದ ವ್ಯಾಪ್ತಿಯ ಕಾನ್ಸೂರು, ನಾಣಿಕಟ್ಟ, ದಾಸನಕೊಪ್ಪ, ಬನವಾಸಿ ಭಾಗದಲ್ಲೂ ಸಂಚಾರ ಮಾಡಿ ಆತಂಕ ನಿರ್ಮಾಣ ಮಾಡುತ್ತಿವೆ.