ಬಾಲೆ ಚಿಕಿತ್ಸೆಗೆ 16 ಕೋಟಿ ರೂ.ಲಾಟರಿ ನೆರವು

Team Udayavani, Feb 18, 2021, 9:31 PM IST

ಭಟ್ಕಳ: ಅಪರೂಪ ಹಾಗೂ ದುಬಾರಿ ಚಿಕಿತ್ಸೆ ಕಾಯಿಲೆಯಿಂದ ಬಳಲುತ್ತಿದ್ದ ಭಟ್ಕಳದ ಪುಟ್ಟ ಬಾಲಕಿ ಫಾತಿಮಾಗೆ ಸ್ವೀಡನ್‌ನ ಔಷ ಧ ಕಂಪನಿ ಲಾಟರಿ ಮೂಲಕ 16 ಕೋಟಿ ರೂ. ಧನ ಸಹಾಯ ಮಾಡಿದ್ದು, ಬಾಲಕಿ ಪ್ರಾಣಾಪಾಯ ದಿಂದ ಪಾರಾಗಿದ್ದಾಳೆ.

ಭಟ್ಕಳ ಆಜಾದ್‌ ನಗರದ ನಿವಾಸಿ, ದುಬೈನಲ್ಲಿ ಉದ್ಯೋಗಿ ಯಾಗಿರುವ ಮೊಹ ಮ್ಮದ್‌ ಬಾಸಿಲ್‌ ಅವರ 14 ತಿಂಗಳ ಪುಟ್ಟ ಕಂದ ಫಾತಿಮಾ ಬೆನ್ನು ಮೂಳೆಯ ಸ್ನಾಯು ಕ್ಷೀಣತೆಯಿಂದ ಬಳಲುತ್ತಿದ್ದು ಬೆಂಗಳೂರಿನ ಬಾಪ್ಟಿಸ್ಟ್‌ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆ. ಈ ರೋಗಕ್ಕೆ ಕ್ರಾಂತಿಕಾರಿ ಜೀನ್‌ ಚಿಕಿತ್ಸೆಯೇ ಅಗತ್ಯವಾಗಿದ್ದು, ಝೋಲ್ಗೆನ್ಸ್‌ ಜೀನ್‌ ಥೆರಫಿಗೆ ಒಳಗಾಗಿದ್ದಳು. ಈ ಚಿಕಿತ್ಸೆಗೆ ಸ್ವೀಡನ್‌ನ ನೊವಾರ್ಟಿಸ್‌ ಕಂಪನಿ ಔಷಧ ತಯಾರಿಸುತ್ತಿದ್ದು, ಅದರ ಬೆಲೆ 2.1 ಮಿಲಿಯನ್‌ ಯುಎಸ್‌ ಡಾಲರ್‌. ಭಾರತೀಯ ರೂಪಾಯಿ ಲೆಕ್ಕದಲ್ಲಿ ಅದರ ಬೆಲೆ ಸುಮಾರು 16 ಕೋಟಿ ರೂ. ಅಷ್ಟು ಬೆಲೆಯ ಔಷಧ ಕೊಳ್ಳುವುದು ಪಾಲಕರಿಗೆ ಸಾಧ್ಯವಿರಲಿಲ್ಲ.

ಔಷಧ ಕಂಪನಿಯು ಮಾನವೀಯತೆ ದೃಷ್ಟಿ ಯಿಂದ ಪ್ರತಿವರ್ಷ ಈ ಕಾಯಿಲೆಗೆ ತುತ್ತಾದವರ ಹೆಸರುಗಳನ್ನು ಪಡೆದು ವರ್ಷಕ್ಕೊಂದು ಔಷಧದ ಯುನಿಟ್‌ ಉಚಿತವಾಗಿ ನೀಡುತ್ತದೆ. ಈ ವರ್ಷ ಲಾಟರಿ ಯಲ್ಲಿ ಈ ಪುಟ್ಟ ಬಾಲಕಿ ಹೆಸರು ಬಂದಿದ್ದು ಅದೃಷ್ಟವೇ ಸರಿ. ಸದ್ಯ ಫಾತಿಮಾ ಆರೋಗ್ಯದಲ್ಲಿ ಸುಧಾರಣೆಯಾಗುತ್ತಿದ್ದು, ಮಗಳು ಸಂಪೂರ್ಣ ಗುಣಮುಖವಾಗುವ ನಿರೀಕ್ಷೆಯಲ್ಲಿದ್ದಾರೆ ಹೆತ್ತವರು. ಮಕ್ಕಳು ಅಂಬೆಗಾಲಿಡುವ ಸಮಯದಲ್ಲಿ ಸ್ಪೈನಲ್‌ ಮಸ್ಯುಲರ್‌ ಅಟ್ರೋಫಿ ಅಥವಾ ಎಸ್‌ ಎಂಎ ಎಂದು ಈ ಕಾಯಿಲೆ ಗುರುತಿಸಲಾಗು ತ್ತದೆ. ಮೆದುಳಿನಿಂದ ಸ್ನಾಯುಗಳಿಗೆ ವಿದ್ಯುತ್‌ ಸಂಕೇತಗಳನ್ನು ಒಯ್ಯುವ ನರಕೋಶ ನಷ್ಟ ದಿಂದ ಇದು ಸಂಭವಿಸುತ್ತದೆ ಎನ್ನಲಾಗಿದೆ.