ಉಡುಪಿ ಪರ್ಯಾಯಕ್ಕೆ ಸೋದೆ ಶ್ರೀಗಳಿಗೆ ಪಲಿಮಾರು ಶ್ರೀ ಆಹ್ವಾನ

Team Udayavani, Dec 19, 2017, 2:13 PM IST

ಶಿರಸಿ: ಉಡುಪಿಯಲ್ಲಿ ನಡೆಯಲಿರುವ ಪರ್ಯಾಯದ ಎರಡೂ ವರ್ಷ ನಮ್ಮೊಂದಿಗೆ ಇದ್ದು ಧಾರ್ಮಿಕ ಕಾರ್ಯದಲ್ಲಿ ಸಹಕಾರ
ನೀಡುವಂತೆ ಸೋದೆ ವಾದಿರಾಜ ಮಠಾಧೀಶ ಶ್ರೀವಿಶ್ವವಲ್ಲಭ ತೀರ್ಥ ಶ್ರೀಪಾದಂಗಳವರನ್ನು ಪಲಿಮಾರು ಮಠಾಧೀಶ ವಿದ್ಯಾಧೀಶ ತೀರ್ಥ ಶ್ರೀಪಾದರು ಆಹ್ವಾನಿಸಿದರು.

ಪರ್ಯಾಯದ ಪೂರ್ವಭಾವಿಯಾಗಿ ಪವಿತ್ರ ಕ್ಷೇತ್ರ ಸೋದೆ ವಾದಿರಾಜ ಮಠಕ್ಕೆ ಆಗಮಿಸಿದ್ದ ಪಲಿಮಾರು ಶ್ರೀಗಳನ್ನು ಬರಮಾಡಿಕೊಂಡ ಬಳಿಕ ನಡೆದ ಸಮಾರಂಭದಲ್ಲಿ ಅವರು ಆಶೀರ್ವಚನ ನೀಡಿದರು. ಕೃಷ್ಣನ ಅಲಂಕಾರದಲ್ಲಿ ಸೋದೆಯ ಹಿಂದಿನ
ಶ್ರೀಗಳು ಪರಿಣಿತರಾಗಿದ್ದರು. ವಿಶೊತ್ತಮರು ಕೃಷ್ಣನನ್ನು ಅಲಂಕರಿಸಿದಾಗ ತೆಗೆದ ಫೋಟೋಗಳೇ ಮನೆ ಮನೆಗಳಲ್ಲಿ ಇದೆ. ಈ ಬಾರಿ ಸೋದೆ ಶ್ರೀಗಳೂ ನಮ್ಮೊಂದಿಗೆ ಇದ್ದು, ಚಾತುರ್ಮಾಸ್ಯ ಕೂಡ ಅಲ್ಲೇ ನಡೆಸಬೇಕು ಎಂದು ಆಶಿಸಿದರು. ಸೋದೆಯಲ್ಲಿ ಅಭಿವೃದ್ಧಿ ಪರ್ವವೇ ನಡೆದಿದೆ. ಇಲ್ಲಿನ ಯೋಜನೆಗಳು, ಜೀರ್ಣೋದ್ಧಾರ ಕಾರ್ಯಗಳು ಚೆನ್ನಾಗಿ ನಡೆಯುತ್ತಿವೆ ಎಂದೂ
ಬಣ್ಣಿಸಿದರು.

ಸಾನ್ನಿಧ್ಯ ನೀಡಿದ್ದ ಸೋದೆ ವಾದಿರಾಜ ಮಠಾಧೀಶ ವಿಶ್ವವಲ್ಲಭ ಶ್ರೀಪಾದರು, ಹಿಂದಿನ ಪರ್ಯಾಯದಲ್ಲಿ ಕೃಷ್ಣನಿಗೆ ಮುತ್ತಿನ ಕಿರೀಟ ಆಗಿತ್ತು. ಈ ಬಾರಿ ಬಂಗಾರದ ಮೇಲ್ಛಾವಣಿ ಆಗಲಿ ಎಂದರು. ಈ ವೇಳೆ ಮಠದ ದಿವಾನರಾದ ಶ್ರೀನಿವಾಸ ತಂತ್ರಿಗಳು, ಮಾಣಿಕ್ಯ ಉಪಾಧ್ಯಾಯ ಇತರರು ಇದ್ದರು.