ಬರಗಾಲ: ಮೇವು-ನೀರಿಗಾಗಿ ಗೋಗೆರೆಯುತ್ತಿವೆ ಜಾನುವಾರು

Team Udayavani, May 9, 2019, 11:13 AM IST

ವಾಡಿ: ಚಿತ್ತಾಪುರ ಮತ್ತು ವಾಡಿ ವಲಯ ವ್ಯಾಪ್ತಿಯ ಅಡವಿಯೊಳಗೆ ಗೋವುಗಳು ನೀರು, ಮೇವು, ನೆರಳಿಗಾಗಿ ಹುಡುಕಾಟ ನಡೆಸುತ್ತಿವೆ.

ವಾಡಿ: ಬೆಂಕಿ ಕಾರುವ ಮುಗಿಲ ಸೂರ್ಯನಿಂದ ನೀರು, ನೆರಳು, ಮೇವು ಕೇಳುವ ಜಾನುವಾರುಗಳ ಆರ್ಥನಾದ ಒಂದೆಡೆಯಾದರೆ, ಮರಗಳಿಲ್ಲದೆ ಬರಡಾದ ಭೂಮಿಯೊಳಗೆ ಅಂತರ್ಜಲ ಹುಡುಕುತ್ತಿರುವ ಮಾನವನ ದುಸ್ಸಾಹಸ ಇನ್ನೊಂದೆಡೆ. ಇವು ಪ್ರಸಕ್ತ ಸಾಲಿನ ರಣಭಯಂಕರ ಬರಗಾಲ ಅನಾವರಣ ಗೊಳಿಸುತ್ತಿರುವ ಮನಕಲುಕುವ ದೃಶ್ಯಗಳು.

ಮೇವು ಅರಸಿ ಬೆಳಗ್ಗೆ ಮನೆಯಿಂದ ಹೊರಡುವ ಜಾನುವಾರುಗಳು ಅರಣ್ಯ ಅಲೆದರೂ ಹಿಡಿಕೆ ಹಸಿ ಮೇವು ಕಾಣದೆ ಕಂಗಾಲಾಗುತ್ತಿವೆ. ಬೊಗಸೆ ನೀರು ಸಿಗದೆ ಪರದಾಡುತ್ತಿವೆ. ನಿರ್ಜನ ನೆಲದ ಮೇಲೆ ಮರಗಳನ್ನು ಹುಡುಕಿ ನೆರಳಿನ ಆಸರೆ ಪಡೆಯಲು ಇಲ್ಲದ ಹರಸಾಹಸ ಪಡುತ್ತಿವೆ. ಗ್ರಾಪಂ ನಿರ್ಮಿಸಿದ ನೀರಿನ ತೊಟ್ಟಿಗಳು, ಕೃಷಿ ಇಲಾಖೆ ಕೊರೆಯಿಸಿದ ಕೃಷಿ ಹೊಂಡಗಳು, ನೀರಾವರಿಗಾಗಿ ನಿರ್ಮಿಸಲಾದ ಕೆನಲ್ ನಾಲೆಗಳು ಬತ್ತಿ ಬಣಗುಡುತ್ತಿವೆ. ಗಂಗಾ ಕಲ್ಯಾಣದ ಬೋರ್‌ವೆಲ್ಗಳಿಂದಲೂ ಹನಿ ನೀರು ಬರುತ್ತಿಲ್ಲ. ಹಿಂಗದ ಜಲದಾಹ ಮೂಕ ಜಾನುವಾರುಗಳ ಜೀವ ಹಿಂಡಿ ಹಿಪ್ಪೆಯಾಗಿಸುತ್ತಿದೆ.

ಬಿಸಿಲ ಪ್ರತಾಪ ಏರುತ್ತಿದ್ದಂತೆ ಭೂಮಿ ತೇವಾಂಶ ಕಳೆದುಕೊಂಡಿದೆ. ನೆಲದಾಳದ ನೀರಿನ ಸೆಲೆಗಳು ಪರಸ್ಪರ ಸಂಪರ್ಕ ಕಡಿದುಕೊಂಡಿವೆ. ನದಿ, ಹಳ್ಳ, ಬಾವಿ, ಬೋರ್‌ವೆಲ್ ಸೇರಿದಂತೆ ಇನ್ನಿತರ ಜಲಮೂಲಗಳು ನೀರಿಲ್ಲದೆ ಝಳ-ಝಳವಾಗಿ ಜಲಚರಗಳಿಗೆ ಜೀವ ಸಂಕಟ ತಂದಿಟ್ಟಿದೆ. ಅಡವಿಯೊಳಗಿನ ಮರದ ನೆರಳು ಮತ್ತು ಮೇವು ದನಕರುಗಳ ಪಾಲಿಗೆ ಗಗನಕುಸುಮವಾಗಿದೆ. ಪರಿಣಾಮ ಡಾಂಬರ್‌ ರಸ್ತೆಗಳ ಮೇಲೆ ನಿಂತು ಗೋವುಗಳು ಮೇವು, ನೆರಳು, ನೀರಿಗಾಗಿ ಗೋಗೆರೆಯುತ್ತಿವೆ.

ಎಲ್ಲಿದ್ದಾರೆ ಗೋ ಪ್ರೇಮಿಗಳು?: ದನಕರುಗಳನ್ನು ಕಸಾಯಿಖಾನೆಗಳಿಗೆ ಸಾಗಿಸಲಾಗುತ್ತಿದೆ ಎನ್ನುವ ಸುದ್ದಿ ತಿಳಿದು ದಿಢೀರ್‌ ದೌಡಾಯಿಸಿ ಬರುವ ಗೋ ರಕ್ಷಕರು, ಹೋರಾಡಿ ರಕ್ಷಣೆ ಮಾಡುವ ಮೂಲಕ ಗೋಶಾಲೆಗಳಿಗೆ ಬಿಟ್ಟು ಸೇವಾ ಮನೋಭಾವ ಮೆರೆಯುತ್ತಿದ್ದರು. ಈಗ ಅದೇ ಗೋವುಗಳು ನೀರು, ಮೇವಿಗಾಗಿ ನರಕಯಾತನೆ ಅನುಭವಿಸುತ್ತಿದ್ದರೂ ಅವರ ಸುಳಿವಿಲ್ಲ. ಪ್ರಾಣಿ, ಪಕ್ಷಿಗಳಿಗೆ ನೀರುಣಿಸುವ ದಯಾ ಸಂಘಗಳು ಬೆಳಕಿಗಿಲ್ಲ. ವೃತ್ತಗಳಲ್ಲಿ, ಜನನಿಬೀಡ ಸ್ಥಳಗಳಲ್ಲಿ ಮಣ್ಣಿನ ಮಡಿಕೆಯಿಟ್ಟು ಜನರಿಗೆ ನೀರಿನ ಸೇವೆ ನೀಡುತ್ತಿದ್ದ ಮನಸ್ಸುಗಳಿಗೂ ಈ ಸಲ ಕೊರತೆ ಉಂಟಾಗಿದೆ.

ಹಳ್ಳಕೊಳ್ಳಗಳಿಗೆ ತಡೆಗೋಡೆ ಕಟ್ಟಿ, ಕೆರೆಕಟ್ಟೆ ನಿರ್ಮಿಸಿ ಜಲಮೂಲ ರಕ್ಷಣೆ ಮಾಡಬೇಕಾದ ಆಳುವ ದೊರೆಗಳು, ಪ್ರಜೆಗಳ ಗೋಳಾಟಕ್ಕೂ, ಜಲಚರಗಳ ಪ್ರಾಣ ಸಂಕಟಕ್ಕೂ, ಪ್ರಾಣಿ, ಪಕ್ಷಿ, ಜಾನುವಾರುಗಳ ನರಳಾಟಕ್ಕೂ ಕಾರಣವಾಗಿದ್ದಾರೆ. ಒಟ್ಟಾರೆ ಬರದ ನಾಡಿನಲ್ಲಿ ಬರಗಾಲ ಬಡವರ ಎದೆ ಮೇಲೆ ಬರೆ ಎಳೆದಿದೆ. ಪ್ರಜಾತಂತ್ರದ ಆಡಳಿತ ವ್ಯವಸ್ಥೆಯಲ್ಲಿ ಜನರ ಪಾಲಿಗೆ ಬೇಸಿಗೆ ಎನ್ನುವುದು ಪ್ರತಿ ವರ್ಷವೂ ತೀವ್ರ ಸಂಕಟದ ಕಾಲವಾಗಿ ಪರಿಣಮಿಸುತ್ತಿದೆ.

ಮಡಿವಾಳಪ್ಪ ಹೇರೂರ