ಮತಯಂತ್ರಗಳ ಸಮ್ಮಿಶ್ರಣ ಪ್ರಕ್ರಿಯೆ ಪೂರ್ಣ

Team Udayavani, Apr 11, 2019, 1:22 PM IST

ವಿಜಯಪುರ: ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಅಭ್ಯರ್ಥಿ-ಪ್ರತಿನಿಧಿಗಳ ಸಮ್ಮುಖದಲ್ಲಿ ರ್‍ಯಾಂಡ್‌ಮೈಜೇಶನ್‌ಗೆ ವೀಕ್ಷಕ ಅಶೋಕ ಶಹಾ ಹಾಗೂ ಸುಹಾಸ್‌ ಕುಲಕರ್ಣಿ ಚಾಲನೆ ನೀಡಿದರು.

ವಿಜಯಪುರ: ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ ವಿಜಯಪುರ ಲೋಕಸಭೆ ಕ್ಷೇತ್ರ ವ್ಯಾಪ್ತಿಯ 8 ವಿಧಾನಸಭೆಗಳಿಗೆ ಹಂಚಿಕೆಯಾಗುವ ವಿವಿ ಪ್ಯಾಟ್‌-ಕಂಟ್ರೋಲ್‌ ಯೂನಿಟ್‌, ಬ್ಯಾಲೆಟ್‌ ಯೂನಿಟ್‌, ಮೀಸಲು ಮತಯಂತ್ರಗಳ ಸಮಗ್ರ (ರ್‍ಯಾಂಡ್‌ಮೈಜೇಶನ್‌) ಸಮ್ಮಿಶ್ರಣ ಕಾರ್ಯಕ್ಕೆ ಬುಧವಾರ ವಿಜಯಪುರ ಸಾಮಾನ್ಯ ವೀಕ್ಷಕರಾದ ಅಶೋಕ ಶಹಾ ಹಾಗೂ ವೆಚ್ಚ ವೀಕ್ಷಕ ಸುಹಾಸ್‌ ಕುಲಕರ್ಣಿ ಸಮ್ಮುಖದಲ್ಲಿ ಚಾಲನೆ ನೀಡಲಾಯಿತು.

ನಗರದ ಜಿಲ್ಲಾಧಿಕಾರಿಗಳ ಕಚೇರಿ ಸಭಾಂಗಣದಲ್ಲಿ ವಿವಿಧ ರಾಜಕೀಯ ಪಕ್ಷಗಳ ಅಭ್ಯರ್ಥಿಗಳು ಹಾಗೂ ಏಜೆಂಟರ್‌ ಸಮ್ಮುಖದಲ್ಲಿ ದ್ವಿತೀಯ ರ್‍ಯಾಂಡ್‌ಮೈಜೇಶನ್‌ ಕಾರ್ಯವು ಯಶಸ್ವಿಯಾಗಿ ನೆರವೇರಿಸಲಾಗಿದ್ದು, ವಿಜಯಪುರ ಲೋಕಸಭಾ ಕ್ಷೇತ್ರದ ಸಾಮಾನ್ಯ ವೀಕ್ಷಕ ಅಶೋಕ ಶಹಾ ಹಾಗೂ ವೆಚ್ಚ ವೀಕ್ಷಕರಾದ ಸುಹಾಸ್‌ ಕುಲಕರ್ಣಿ ಜಿಲ್ಲಾಡಳಿತದಿಂದ ವಿವಿಧ ವಿಧಾನಸಭಾವಾರು ಹಂಚಿಕೆಯಾಗಿರುವ ವಿವಿ ಪ್ಯಾಟ್‌, ಕಂಟ್ರೋಲ್‌ ಯೂನಿಟ್‌, ಬ್ಯಾಲೆಟ್‌ ಯೂನಿಟ್‌ಗಳ ಮಾಹಿತಿಯನ್ನು ನೀಡಿದರು.

ಜಿಲ್ಲೆಯ 8 ವಿಧಾನಸಭಾ ಕ್ಷೇತ್ರಗಳಲ್ಲಿ ಸ್ಥಾಪಿಸಲಾಗಿರುವ 2101 ಮತಗಟ್ಟೆಗಳಲ್ಲಿ ಒಟ್ಟು 2504 ಬ್ಯಾಲೆಟ್‌ ಯೂನಿಟ್‌, 2504 ಕಂಟ್ರೋಲ್‌ ಯೂನಿಟ್‌, 2673 ವಿವಿ ಪ್ಯಾಟ್‌ ಹಂಚಿಕೆ ಮಾಡಲಾಯಿತು. ಇದಲ್ಲದೇ ಸಂಬಂಧಪಟ್ಟ ರಾಜಕೀಯ ಪಕ್ಷದ ಪ್ರತಿನಿಧಿಗಳು, ಅಭ್ಯರ್ಥಿಗಳಿಗೆ ಹಾಗೂ ಏಜೆಂಟ್‌ರಿಗೆ ದೃಢೀಕೃತ ನಕಲು ಪ್ರತಿಯನ್ನೂ ನೀಡಲಾಯಿತು.

ಜಿಲ್ಲೆಯ ಮುದ್ದೇಬಿಹಾಳ, ದೇವರಹಿಪ್ಪರಗಿ, ಬಸವನಬಾಗೇವಾಡಿ, ಬಬಲೇಶ್ವರ, ವಿಜಯಪುರ ನಗರ, ನಾಗಠಾಣ, ಇಂಡಿ ಹಾಗೂ ಸಿಂದಗಿ ಮತಕ್ಷೇತ್ರಗಳ ಕ್ರಮ ಸಂಖ್ಯೆವಾರು, ಮತಗಟ್ಟೆ ಸಂಖ್ಯೆವಾರು ಮತದಾನ ಕೇಂದ್ರವಾರು, ಹಂಚಿಕೆಯಾಗಿರುವ ಕಂಟ್ರೋಲ್‌ ಯೂನಿಟ್‌, ಬ್ಯಾಲೆಟ್‌
ಯೂನಿಟ್‌ ಹಾಗೂ ವಿವಿ ಪ್ಯಾಟ್‌ಗಳ ರ್‍ಯಾಂಡ್‌ಮೈಜೇಶನ್‌ ಪ್ರಕ್ರಿಯೆಯನ್ನು ಸಮಗ್ರವಾಗಿ ಪರಿಶೀಲನೆ ನಡೆಸಲಾಯಿತು. ಜಿಲ್ಲಾಧಿಕಾರಿ ಎಂ.ಕನಗವಲ್ಲಿ ಅವರು ರ್‍ಯಾಂಡ್‌ಮೈಜೇಶನ್‌ ಪ್ರಕ್ರಿಯೆ ಬಗ್ಗೆ ಅವಶ್ಯಕ ಮಾಹಿತಿ ನೀಡಿದರು.

ಇದೇ ಸಂದರ್ಭದಲ್ಲಿ ಚುನಾವಣಾ ವೆಚ್ಚ ವೀಕ್ಷಕ ಸುಹಾಸ್‌ ಕುಲಕರ್ಣಿ ಮಾತನಾಡಿ, ಅತ್ಯಂತ ಮಹತ್ವದ ಚುನಾವಣೆ ಇದಾಗಿರುವುದರಿಂದ ಚುನಾವಣಾ ಆಯೋಗದ ಪ್ರತಿಯೊಂದು ನಿರ್ದೇಶನಗಳನ್ನು ಕಡ್ಡಾಯವಾಗಿ ಅಭ್ಯರ್ಥಿಗಳು ಪಾಲಿಸಬೇಕು. ಚುನಾವಣೆ ಸಂದರ್ಭದಲ್ಲಿ ಮಾಡಲಾದ ವೆಚ್ಚಕ್ಕೆ ಸಂಬಂಧಪಟ್ಟಂತೆ ಸಮರ್ಪಕ ದಾಖಲಾತಿಗಳನ್ನು ಇಟ್ಟುಕೊಳ್ಳುವ ಜೊತೆಗೆ ನಿಗದಿತ ಅವಧಿಯಲ್ಲಿ ಮಾಡಲಾದ ವೆಚ್ಚದ ಮಾಹಿತಿಯನ್ನು ನೀಡಬೇಕು
ಎಂದು ಹೇಳಿದರು.

ಇದಲ್ಲದೇ ವೆಚ್ಚಕ್ಕೆ ಸಂಬಂಧಪಟ್ಟಂತೆ ಸಕಾಲದಲ್ಲಿ ಹಾಗೂ ಸಮರ್ಪಕವಾಗಿ ಮಾಹಿತಿ ಒದಗಿಸದೇ ಇದ್ದ ಪಕ್ಷದಲ್ಲಿ ಚುನಾವಣೆಗೆ ಅನರ್ಹಗೊಳ್ಳುವ ಸಾಧ್ಯತೆ ಇದ್ದು, ಸಂಬಂಧಪಟ್ಟ ಅಭ್ಯರ್ಥಿಗಳು ಚುನಾವಣೆಯ ಎಲ್ಲ ನಿಯಮಾವಳಿಗಳನ್ನು ಚಾಚು ತಪ್ಪದೇ ಪಾಲಿಸಬೇಕು. ಅದರಂತೆ ಅಭ್ಯರ್ಥಿಗಳ ವೆಚ್ಚಗಳ ದಾಖಲೆಗೆ ಈಗಾಗಲೇ ತಂಡಗಳನ್ನು ರಚಿಸಿ, ವೆಚ್ಚವನ್ನು ಸಹ ದಾಖಲಿಸಲಾಗುತ್ತಿದೆ. ಹೀಗಾಗಿ ಸುಗಮ ಹಾಗೂ ಶಾಂತಿಯುತ ಮತ್ತು ಪಾರದರ್ಶಕ ಚುನಾವಣೆಗೆ ಅಭ್ಯರ್ಥಿಗಳು ಸಹಕಾರ ನೀಡಬೇಕು. ಇದಲ್ಲದೇ ಚುನಾವಣೆಯಲ್ಲಿ ಯಾವುದೇ ರೀತಿಯ ದೂರುಗಳಿದ್ದಲ್ಲಿ ತಮ್ಮ ದೂರವಾಣಿ ಸಂಖ್ಯೆ 8762099624ಗೆ ಸಂಪರ್ಕಿಸುವಂತೆ ಮನವಿ ಮಾಡಿದರು.

ಸಭೆಯಲ್ಲಿ ಜಿಲ್ಲಾಧಿಕಾರಿ ಎಂ.ಕನಗವಲ್ಲಿ, ಅಪರ ಜಿಲ್ಲಾಧಿಕಾರಿ ಎಚ್‌.ಪ್ರಸನ್ನ ಸೇರಿದಂತೆ ರಾಜಕೀಯ ಪಕ್ಷದ ಹಾಗೂ ಪಕ್ಷೇತರ ಅಭ್ಯರ್ಥಿಗಳು ಮತ್ತು ಏಜೆಂಟರು ಇದ್ದರು.