ಜನರ ನಿರೀಕ್ಷೆಯಂತೆ ಕೆಲಸ ಮಾಡಿ ತೋರಿಸುವೆ: ಯತ್ನಾಳ

Team Udayavani, Jun 26, 2019, 11:00 AM IST

ವಿಜಯಪುರ: ನಗರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ನಗರ ಸಂಚಾರ ನಡೆಸಿ ಸಾರ್ವಜನಿಕರಿಂದ ದೂರು ಆಲಿಸಿದರು.

ವಿಜಯಪುರ: ನಗರದ ಜನತೆ ಸಮಸ್ಯೆಗಳ ಪರಿಹಾರಕ್ಕಾಗಿ ವಿಜಯಪುರ ನಗರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ನಗರ ಸಂಚಾರ ನಡೆಸಿ ಸಾರ್ವಜನಿಕರಿಂದ ದೂರುಗಳನ್ನು ಆಲಿಸಿದರು.

ನಗರದ ಅತ್ಯಂತ ಜನನಿಭಿಡ ಪ್ರದೇಶ ಎನಿಸಿಕೊಂಡಿರುವ ಹುತಾತ್ಮರ ವೃತ್ತ (ಮೀನಾಕ್ಷಿ ಚೌಕ್‌) ಪ್ರದೇಶದ ಮಿನಿ ಗಾರ್ಡನ್‌ ಕಾಮಗಾರಿ, ಒಳಚರಂಡಿ ಕಾಮಗಾರಿ ಬಗ್ಗೆ ಪರಿಶೀಲಿಸಿದರು. ನಗರದ ಯಾವುದೇ ಕಾಮಗಾರಿಗಳಿದ್ದರೂ ಸೂಕ್ತ ಪರಿಶೀಲನೆ ನಡೆಸಬೇಕು. ಹುತಾತ್ಮರ ವೃತ್ತದಲ್ಲಿ ಮಳೆಗಾಲದಲ್ಲಿ ನೀರು ಸಂಗ್ರಹ ಆಗದಂತೆ ನೋಡಿಕೊಳ್ಳಬೇಕು. ಮಿನಿ ಗಾರ್ಡನ್‌ ಸ್ಥಳದಲ್ಲಿ ಸುಸಜ್ಜಿತವಾದ ಬೆಳಕಿನ ವ್ಯವಸ್ಥೆಗಾಗಿ ಹೈ ಮಾಸ್ಟ್‌ ವಿದ್ಯುತ್‌ ದೀಪದ ವ್ಯವಸ್ಥೆ ಮಾಡಬೇಕು. ಸದರಿ ಪ್ರದೇಶದಲ್ಲಿ ಅನ್ಯ ಊರುಗಳಿಂದ ಬಂದಿರುವ ವಿದ್ಯಾರ್ಥಿಗಳಿಗೆ ಓದಲು ಅನಕೂಲ ಆಗುವಂತೆ ಬೆಂಚ್ ವ್ಯವಸ್ಥೆ ಮಾಡುವಂತೆ ಸ್ಥಳದಲ್ಲಿದ್ದ ವಿಜಯಪುರ ಮಹಾನಗರ ಪಾಲಿಕೆ ಆಯುಕ್ತ ಡಾ| ಔದ್ರಾಮ್‌ ಆವರಿಗೆ ಸೂಚಿಸಿದರು.

ಜನ ನನ್ನ ಮೇಲೆ ಭಾರಿ ನಿರೀಕ್ಷೆ ಇರಿಸಿಕೊಂಡು ಮತ ಹಾಕುವ ಮೂಲಕ ನನ್ನನ್ನು ಶಾಸಕನನ್ನಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ. ಹೀಗಾಗಿ ಜನತೆ ಋಣ ತೀರಿಸಲು ನಾನು ಶಾಸಕನಾದ ಬಳಿಕ ಈಗಾಗಲೇ ನಗರದಲ್ಲಿ ವಿವಿಧ ಬಡಾವಣೆಗಳಿಗೆ ಹಲವು ಬಾರಿ ಭೇಟಿ ಮಾಡಿ ಸಾರ್ವಜನಿಕರ ದೂರು ಆಲಿಸಿ, ಜೊತೆಗೆ ತಕ್ಷಣವೇ ಜನರ ಭಾವನೆಗಳಿಗೆ ಸ್ಪಂದಿಸಿ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಪ್ರಾಮಾಣಿಕ ಪ್ರಯತ್ನ ಮಾಡಿದ್ದೇನೆ ಎಂದರು.

ವಿಜಯಪುರ ನಗರವನ್ನು ಬರುವ ದಿನಗಳಲ್ಲಿ ಸ್ಲಂ ಮುಕ್ತ ಮಾಡುವ ಕನಸು ಹೊಂದಿದ್ದೇನೆ. ಇದಕ್ಕಾಗಿ ನಗರದಲ್ಲಿ ಬಡವರು, ದಲಿತರ ಶ್ರೇಯಕ್ಕಾಗಿ ವಿಜಯಪುರ ನಗರದಲ್ಲಿ ದೀನ ದಲಿತರ, ಬಡವರಿಗೆ ನಿರಾಶ್ರಿತರಿಗೆ ವಿವಿಧ ವಸತಿ ಯೋಜನೆಗಳಲ್ಲಿ ಅರ್ಹ ಫ‌ಲಾನುಭವಿಗಳಿಗೆ ಮಧ್ಯವರ್ತಿಗಳ ಕಾಟ ಇಲ್ಲದಂತೆ ನಿಮಯ ಬದ್ಧವಾಗಿ ಮನೆಗಳನ್ನು ಒದಗಿಸುವ ಕೆಲಸ ಮಾಡುತ್ತಿದ್ದೇನೆ. ವಾಜಪೇಯಿ ವಸತಿ ಯೋಜನೆ, ಪ್ರಧಾನಮಂತ್ರಿ ಆವಾಸ್‌ ಯೋಜನೆ ಅಡಿಯಲ್ಲಿ ನಗರದಲ್ಲಿ 10 ಸಾವಿರ ಮನಗೆಳನ್ನು ನಿರ್ಮಿಸುವ ಗುರಿ ಹೊಂದಿದ್ದೇನೆ ಎಂದು ವಿವರಿಸಿದರು.

ನಗರದ ವಿವಿಧ ಸ್ಥಳಗಳಲ್ಲಿ ಓಪನ್‌ ಜಿಮ್‌ಗಳನ್ನು ಸ್ಥಾಪಿಸಿ, ಆಯಾ ಬಡಾವಣೆಗಳ ನಿವಾಸಿಗಳಿಗೆ ಅನಕೂಲ ಮಾಡಿಕೊಟ್ಟಿದ್ದೇನೆ. ಇನ್ನೂ ಅನೇಕ ಯೋಜನೆಗಳು ಇದ್ದು, ಅವುಗಳನ್ನು ಬರುವ ದಿನಗಳಲ್ಲಿ ಸಂಪೂರ್ಣ ಮುಗಿಸಿ ವಿಜಯಪುರ ನಗರವನ್ನು ರಾಜ್ಯದಲ್ಲೇ ಮಾದರಿ ನಗರವನ್ನಾಗಿ ಮಾಡುವ ಸಂಕಲ್ಪ ಈಡೇರಿಸುವುದು ನನ್ನ ಆದ್ಯತೆಯ ಕೆಲಸ ಎಂದರು.

ಬಿಜೆಪಿ ನಗರ ಅಧ್ಯಕ್ಷ ಶಿವರುದ್ರ ಬಾಗಲಕೋಟ, ಶ್ರೀಹರಿ ಗೊಳಸಂಗಿ, ಅಶೋಕ ಬೆಲ್ಲದ, ಶೀತಲ ಓಗಿ, ಕೃಷ್ಣಾ ಗುನ್ಹಾಳಕರ, ಉಮೇಶ ವೀರಕರ, ರೋಹನ ಆಪ್ಟೆ, ರೋಹಿತ ಕೊಪ್ಪದ, ವಿನೋದ ತೆಲಸಂಗ, ಅಜಯ ಸೂರ್ಯವಂಶಿ, ಅರುಣ ಸೌದಿ, ಛಾಯಾ ಮಾಶಿಯನ್ನವರ, ಸಿದ್ದು ಯರನಾಳ ಸೇರಿದಂತೆ ಇತರರು ಇದ್ದರು.