ಕ್ವಾರಂಟೈನ್‌ನಲ್ಲಿದ್ದವರಿಗೆ ಆರೋಗ್ಯ ಜಾಗೃತಿ

Team Udayavani, May 21, 2020, 12:28 PM IST

ಸಾಂದರ್ಭಿಕ ಚಿತ್ರ

ಬಳಗಾನೂರು: ಪಟ್ಟಣದ ಡಾ| ಬಿ.ಆರ್‌ ಅಂಬೇಡ್ಕರ್‌ ಬಾಲಕರ ವಸತಿ ನಿಲಯದಲ್ಲಿ ಕ್ವಾರಂಟೈನ್‌ಲ್ಲಿ ಇರುವವರಿಗೆ ಪಟ್ಟಣದ ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿ ಡಾ| ದೌಲಸಾಬ್‌ ಮುದ್ದಾಪುರ ಹಾಗೂ ಪೋತ್ನಾಳ ಪ್ರಾಥಮಿಕ ಆರೋಗ್ಯ ಕೇಂದ್ರದ ಶಿಕ್ಷಣಾಧಿಕಾರಿ ಬಾಲಪ್ಪ ನಾಯಕ್‌ ಕೋವಿಡ್‌-19 ಕುರಿತು ವಿವಿಧ ಆರೋಗ್ಯ ಸಲಹೆ ನೀಡಿದರು.

ನಂತರ ಮಾತನಾಡಿದ ವೈದ್ಯಾಧಿಕಾರಿಗಳು, ಕೋವಿಡ್‌ ರೋಗ ಸಾಂಕ್ರಾಮಿಕವಾಗಿದೆ. ತೀವ್ರ ಜ್ವರ, ನೆಗಡಿ, ಕೆಮ್ಮು, ಉಸಿರಾಟದ ತೊಂದರೆ, ಭೇದಿ ಈ ರೋಗದ ಲಕ್ಷಣಗಳು. ಕ್ವಾರಂಟೈನ್‌ ನಲ್ಲಿ ಇರುವವರಿಗೆ ಈ ಲಕ್ಷಣಗಳು ಕಂಡು ಬಂದರೆ ಕೂಡಲೇ ಮಾಹಿತಿ ನೀಡುವಂತೆ ತಿಳಿಸಿದರು.

ಶಿಕ್ಷಣಾಧಿಕಾರಿ ಬಾಲಪ್ಪ ನಾಯಕ್‌ ಮಾತನಾಡಿ, ರೋಗದ ಬಗ್ಗೆ ಭಯ ಬೇಡ; ಅದರ ಬದಲು ಮುಂಜಾಗ್ರತೆ ಅವಶ್ಯ. ಸೋಂಕಿತರು ಕೆಮ್ಮಿದಾಗ-ಸೀನಿದಾಗ ವೈರಸ್‌ ಹರಡುತ್ತವೆ. ಆದ್ದರಿಂದ ಕಡ್ಡಾಯವಾಗಿ ಮಾಸ್ಕ್ ಧರಿಸುವುದು, ಸ್ಯಾನಿಟೈಸರ್‌ನಿಂದ ಕೈತೊಳೆದುಕೊಳ್ಳುವುದು, ಸಾಮಾಜಿಕ ಅಂತರ ಕಾಪಾಡಿಕೊಳ್ಳುವುದು ಅವಶ್ಯ ಎಂದರು. ಈ ಸಂದರ್ಭದಲ್ಲಿ ಆರೋಗ್ಯ ಸಹಾಯಕಿಯರಾದ ಲಕ್ಷ್ಮೀ ಬುಳ್ಲಾಪುರ, ಸಹಾಯಕರಾದ ಪ್ರಕಾಶ ನಾಯಕ, ವಸತಿ ನಿಲಯದ ಸಿಬ್ಬಂದಿ ಸೇರಿದಂತೆ ಇತರರು ಇದ್ದರು.