Brutal; 5 ತಿಂಗಳ ಹಸುಗೂಸಿಗೆ ಹಾಲಿನಲ್ಲಿ ವಿಷ ಬೆರೆಸಿ ಕೊಂದ ಮಲತಾಯಿ!

Team Udayavani, Sep 2, 2023, 12:00 AM IST

ಯಾದಗಿರಿ: ತನ್ನ ಗಂಡನ ಆಸ್ತಿ ಇನ್ನೊಬ್ಬ ಹೆಂಡತಿಯ ಮಕ್ಕಳ ಪಾಲಾಗುತ್ತದೆ ಎನ್ನುವ ಕಾರಣಕ್ಕೆ 5 ತಿಂಗಳ ಹಸುಗೂಸನ್ನು ಹಾಲಿಗೆ ವಿಷ ಬೆರೆಸಿ ಕುಡಿಸಿ ಹತ್ಯೆ ಮಾಡಿರುವ ಘಟನೆ ವಡಗೇರಾ ತಾಲೂಕಿನ ಬಬಲಾದದಲ್ಲಿ ನಡೆದಿದೆ.

ಘಟನೆಯಲ್ಲಿ ಸಂಗೀತಾ (5 ತಿಂಗಳು) ಎಂಬ ಹಸುಗೂಸು ಮೃತಪಟ್ಟಿದೆ. ಬಬಲಾದ ಗ್ರಾಮದ ಸಿದ್ದಪ್ಪಚೆಟ್ಟಿಗೇರಿಗೆ ದೇವಮ್ಮ ಚೆಟ್ಟಿಗೇರಿ ಮತ್ತು ಶ್ರೀದೇವಿ ಚೆಟ್ಟಿಗೇರಿ ಎಂಬ ಇಬ್ಬರು ಹೆಂಡತಿಯರು. ಇರುವ ಆಸ್ತಿಯಲ್ಲಿ ಪಾಲಾಗುತ್ತದೆ. ಶ್ರೀದೇವಿ ಮಗಳಿಗೂ ಆಸ್ತಿ ಕೊಡಬೇಕಾಗುತ್ತದೆ ಎನ್ನುವ ಕಾರಣಕ್ಕೆ ದೇವಮ್ಮ ಹಸುಗೂಸಿನ ಹತ್ಯೆ ಮಾಡಿದ್ದಾಳೆ.

ಹಾಲಿನಲ್ಲಿ ವಿಷ ಬೆರೆಸಿದಳು
ಆ.30ರಂದು ಬೆಳಗ್ಗೆ ಮಗುವಿಗೆ ಹಾಲುಣಿಸಲು ಕುಳಿತಿದ್ದ ಶ್ರೀದೇವಿ ಕೈಯಿಂದ ದೇವಮ್ಮ ಮಗುವನ್ನು ಬಲವಂತವಾಗಿ ತೆಗೆದುಕೊಂಡಿದ್ದಾಳೆ. ಕೋಣೆಗೆ ಕರೆದೊಯ್ದು ಮಗುವಿಗೆ ವಿಷಬೆರೆಸಿದ ಹಾಲುಣಿಸಿದ್ದಾಳೆ. ಬಳಿಕ ಮಗು ವಾಂತಿ ಮಾಡಿದೆ. 3 ಗಂಟೆಯ ಬಳಿಕ ಮಗುವಿನ ಬಾಯಿಯಲ್ಲಿ ನೊರೆ ಬರುತ್ತಿರುವಾಗ ಗಾಬರಿಗೊಂಡ ಶ್ರೀದೇವಿ, ದೇವಮ್ಮ ತನ್ನ ಮಗುವಿಗೆ ಹಾಲಿನಲ್ಲಿ ವಿಷ ಬೆರೆಸಿದ್ದಾಳೆಂದು ಕೂಗಾಡಿ ಆಸ್ಪತ್ರೆಗೆ ತೆಗೆದುಕೊಂಡು ಹೋಗಿದ್ದಾಳೆ. ಆ ವೇಳೆಗಾಗಲೇ ಮಗು ಮೃತಪಟ್ಟಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಶ್ರೀದೇವಿ ನೀಡಿದ ದೂರಿನ ಮೇರೆಗೆ ವಡಗೇರಾ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.