ಅನಗತ್ಯ ರಸ್ತೆಗಿಳಿದವರಿಗೆ ಲಾಠಿ ರುಚಿ

Team Udayavani, Apr 26, 2021, 9:05 PM IST

ಯಾದಗಿರಿ: ಜಿಲ್ಲೆಯಲ್ಲಿ ವಾರಾಂತ್ಯ ಕರ್ಫ್ಯೂ 2ನೇ ದಿನವೂ ಕಟ್ಟುನಿಟ್ಟಿನ ಪಾಲನೆಗೆ ಅಧಿಕಾರಿಗಳು ಶ್ರಮಿಸಿದರು. ಜಿಲ್ಲೆಯಲ್ಲಿ ಬಹುತೇಕ ಕಡೆ ಉತ್ತಮ ಸ್ಪಂದನೆ ದೊರಕಿದ್ದು, ಕೆಲವೆಡೆ ನಿಯಮ ಉಲ್ಲಂಘಿಸಿದವರಿಗೆ ನಗರಸಭೆ ಸಿಬ್ಬಂದಿ ಬರೋಬ್ಬರಿ 14 ಸಾವಿರ ದಂಡ ವಿಧಿಸಿದ್ದು, ಅನಗತ್ಯ ರಸ್ತೆಗಿಳಿದವರಿಗೆ ಪೊಲೀಸರು ಲಾಠಿ ರುಚಿಯೂ ತೋರಿಸಿದ್ದಾರೆ.

ಕೊರೊಮಾ ಎರಡನೇ ಅಲೆ ಜಿಲ್ಲೆಯಲ್ಲಿಯೂ ವ್ಯಾಪಕವಾಗಿ ಹರಡುತ್ತಿದ್ದು, ಇದರ ನಿಯಂತ್ರಣಕ್ಕೆ ಜಿಲ್ಲೆಯ ಜನರು ಸಂಪೂರ್ಣ ಸಹಕಾರ ನೀಡಿದರು. ಆದರೂ ಸಾಮಾಜಿಕ ಅಂತರವೇ ಮಾಯವಾಗಿತ್ತು. ರವಿವಾರ ಆಗಿರುವುದರಿಂದ ಮಾಂಸ ಪ್ರಿಯರು ಮೈ ಮರೆತ್ತಿದ್ದರು. ಬೆಳಿಗ್ಗೆ 7:30ರ ಸುಮಾರಿಗೆ ನಗರದ ಶಾಸ್ತ್ರಿ ವೃತ್ತದಲ್ಲಿರುವ ಮೀನು ಮಾರುಕಟ್ಟೆಯಲ್ಲಿ ಮೀನು ಪ್ರಿಯರು ಸಾಮಾಜಿಕ ಅಂತವರನ್ನು ಗಾಳಿಗೆ ತೋರಿ ಮೀನು ಖರೀದಿಸುವಲ್ಲಿ ಮಗ್ನರಾಗಿದ್ದರು.

ಬೆಳಿಗ್ಗೆ ಹಾಲು, ತರಕಾರಿ ಸೇರಿದಂತೆ ಇತರೆ ನಿತ್ಯ ಗೃಹ ಉಪಯೋಗಿ ವಸ್ತುಗಳ ಖರೀದಿಗೆ ಬೆಳಿಗ್ಗೆ 10ರ ವರೆಗೆ ಅವಕಾಶವಿತ್ತು. ಈ ಮಧ್ಯೆಯೇ ಚಿತ್ತಾಪುರ ರಸ್ತೆಯ ಕಿರಾಣಿ ಅಂಗಡಿವೊಂದರಲ್ಲಿ ಜನರು ಸಾಮಾಜಿಕ ಅಂತರ ಪಾಲಿಸದೇ ಅಗತ್ಯ ವಸ್ತುಗಳ ಖರೀದಿಯಲ್ಲಿ ತೊಡಗಿದ್ದರು. ಬೆಳಿಗ್ಗೆ 10ಗಂಟೆಯಾಗುತ್ತಿದ್ದಂತೆ ನಗರದೆಲ್ಲೆಡೆ ಹಿರಿಯ ಸಹಾಯಕ ಆಯುಕ್ತ ಶಂಕರಗೌಡ ಎಸ್‌. ಸೋಮನಾಳ, ತಹಶೀಲ್ದಾರ್‌ ಚನ್ನಮಲ್ಲಪ್ಪ ಘಂಟಿ, ಪೌರಾಯುಕ್ತ ಬಿ.ಟಿ. ನಾಯಕ, ಪಿಎಸ್‌ಐ ಸೌಮ್ಯ ಸಿಬ್ಬಂದಿಗಳೊಂದಿಗೆ ನಗರ ಪ್ರದಕ್ಷಿಣೆ ಮಾಡಿ ನಿಯಮಗಳು ಕಟ್ಟುನಿಟ್ಟಾಗಿ ಪಾಲನೆಯಾಗುವಂತೆ ನೋಡಿಕೊಂಡರು.

ನಗರದ ಪ್ರಮುಖ ಬೀದಿ, ವೃತ್ತದಲ್ಲಿ ಪೊಲೀಸರು ಬ್ಯಾರಿಕೇಡ್‌ ಹಾಕಿ ಅನಾವಶ್ಯಕ ಓಡಾಟ ನಿಯಂತ್ರಿಸಿದ್ದು ಕಂಡು ಬಂತು. ಪೊಲೀಸರು ದ್ವಿಚಕ್ರ ವಾಹನ ನಿಲ್ಲಿಸಿ ವಿವರಣೆ ಪಡೆದು ಕಳಿಸುತ್ತಿದ್ದರು. ಇನ್ನು ಗಲ್ಲಿಯಲ್ಲಿ ನಿಂತಿದ್ದ ಹಣ್ಣ ಮಾರಾಟಗಾರರಿಗೂ ಅವಕಾಶ ನೀಡದೇ ಎಚ್ಚರಿಸಿ ನಿಯಮ ಪಾಲಿಸುವಂತೆ ಪೊಲೀಸರು ಸೂಚಿಸಿದರು. ಇದೇ ವೇಳೆ ನಗರದ ಗಾಂಧಿ  ವೃತ್ತ ಸೇರಿದಂತೆ ಹಲವೆಡೆ ಅನಾವಶ್ಯಕವಾಗಿ ರಸ್ತೆಯಲ್ಲಿದ್ದ ಜನರಿಗೆ ಪೊಲೀಸರು ಲಾಠಿ ರುಚಿ ತೋರಿಸಿದರು. ಇನ್ನು ನಿಯಮ ಮೀರಿ ಹಿಂಬಾಗಿಲಿನಿಂದ ವಸ್ತುಗಳನ್ನು ಮಾರಾಟ ಮಾಡುತ್ತಿದ್ದ ಅಂಗಡಿಗಳ ಮೇಲೆ ದಾಳಿ ನಡೆಸಿದ ನಗರಸಭೆ ಸಿಬ್ಬಂದಿ, ರವಿವಾರ 14 ಸಾವಿರ ದಂಡ ವಿಧಿ ಸಿದ್ದಾರೆ. ಶನಿವಾರವೂ 18 ಸಾವಿರ ದಂಡ ವಿ ಧಿಸಿರುವ ಮಾಹಿತಿ ಲಭ್ಯವಾಗಿದೆ.