ವಿದ್ಯಾರ್ಥಿಗಳಲಿ ಉತ್ತಮ ಗುರಿ ಅಗತ್ಯ

Team Udayavani, Feb 26, 2022, 3:37 PM IST

ಗುರುಮಠಕಲ್‌: ವಿದ್ಯಾರ್ಥಿಗಳು ಮುಂದೆ ಉತ್ತಮ ಜೀವನ ನಡೆಸಬೇಕು ಎನ್ನುವುದಾದರೆ ಮೊದಲು ಉತ್ತಮವಾದ ಗುರಿ ಹೊಂದಿರಬೇಕು ಎಂದು ಮಹಾರಾಷ್ಟ್ರ ಸರ್ಕಾರದ ಮುಂಬೈ ಪೊಲೀಸ್‌ ಅಧಿಕಾರಿ ಮಂಜುನಾಥ ಸಿಂಗೆ ಸಲಹೆ ನೀಡಿದರು.

ಶುಕ್ರವಾರ ಪಟ್ಟಣದ ಖಾಸಾಮಠಕ್ಕೆ ಭೇಟಿ ನೀಡಿ ಶ್ರೀಗಳಿಂದ ಆಶೀರ್ವಾದ ಪಡೆದು ಖಾಸಾಮಠದ ಶಿಕ್ಷಣ ಸಂಸ್ಥೆ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ನೀಡಿ, ನಾನು ಒಂದು ಗ್ರಾಮೀಣ ಪ್ರದೇಶದಲ್ಲಿ ಕನ್ನಡ ಮಾಧ್ಯಮದಲ್ಲಿ ಓದಿದವನು. ಚಿಕ್ಕಂದಿನಿಂದಲೆ ನನಗೆ ಐಪಿಎಸ್‌, ಐಎಎಸ್‌ ಆಗಬೇಕೆಂದು ಆಸೆಯಿತ್ತು ಎಂದು ತಿಳಿಸಿದರು.

ನೀವು ಜೀವನದಲ್ಲಿ ಏನಾದರೂ ಪರವಾಗಿಲ್ಲ. ಆದರೆ ಒಳ್ಳೆಯ ಮನಸ್ಸು ಹಾಗೂ ಉತ್ತಮ ಜೀವನ ಶೈಲಿಯನ್ನು ಖಂಡಿತ ಹೊಂದಿರಬೇಕು. ಏಕೆಂದರೆ ಇತ್ತೀಚಿನ ದಿನಗಳಲ್ಲಿ ಜನರು ಯಾಂತ್ರಿಕ ಜೀವನ ನಡೆಸುತ್ತಾ ಅಂತಃಕರಣ, ಪ್ರೀತಿ, ಮಮತೆಗಳನ್ನು ಮರೆಯುತ್ತಿರುವುದು ಆಘಾತಕಾರಿ ಬೆಳವಣಿಗೆ ಎಂದು ಕಳವಳ ಗೊಂಡರು.

ಖಾಸಾಮಠದ ಶಾಂತವೀರ ಗುರು ಮುರುಘರಾಜೇಂದ್ರ ಶ್ರೀಗಳು ಹಾಗೂ ಸಿಂಗೆ ಕುಟುಂಬಸ್ಥರು, ಎಎಸ್‌ಐ ಭೀಮಪ್ಪ ಕಾನಗಡ್ಡ ಸೇರಿದಂತೆ ಖಾಸಾಮಠ ಶಿಕ್ಷಣ ಸಂಸ್ಥೆಯ ಸಿಬ್ಬಂದಿ ಇದ್ದರು.