ತಾಪಂ ಉಪಾಧ್ಯಕ್ಷೆಯಾಗಿ ಲಲಿತಾ ಅವಿರೋಧ ಆಯ್ಕೆ

Team Udayavani, Sep 29, 2020, 4:14 PM IST

ಯಾದಗಿರಿ: ಸೋಮವಾರ ನಡೆದ ತಾಲೂಕು ಪಂಚಾಯತಿ ಉಪಾಧ್ಯಕ್ಷರ ಆಯ್ಕೆ ಚುನಾವಣೆಯಲ್ಲಿ ಬಿಜೆಪಿಯ ಠಾಣಾಗುಂದಿ ತಾಪಂ ಸದಸ್ಯೆ ಲಲಿತಾ ಮರೆಪ್ಪ ಪೂಜಾರಿ ಅವಿರೋಧವಾಗಿ ಆಯ್ಕೆಯಾದರು.

ಹೊಸ ತಾಲೂಕು ಕೇಂದ್ರವಾಗಿ ಗುರುಮಠಕಲ್‌ ಅಸ್ತಿತ್ವಕ್ಕೆ ಬರುತ್ತಿದ್ದಂತೆ ಯಾದಗಿರಿಯಿಂದ ವಿಭಜನೆಯಾಗಿದ್ದು ಈ ಹಿಂದಿನ ತಾಪಂ ಉಪಾಧ್ಯಕ್ಷೆ ಅಜಲಾಪುರ ತಾಪಂ ಸದಸ್ಯೆ ರಾಮಲಿಂಗಮ್ಮ ಕವಡಿ ಅವರ ಕ್ಷೇತ್ರ ಗುರುಮಠಕಲ್‌ ತಾಪಂಗೆ ಸೇರ್ಪಡೆಗೊಂಡಿದ್ದಕ್ಕೆ ಉಪಾಧ್ಯಕ್ಷೆ ಸ್ಥಾನ ತೆರವಾಗಿತ್ತು. ಸಾಮಾನ್ಯ ಮಹಿಳೆಗೆ ಮೀಸಲಾದ ಉಪಾಧ್ಯಕ್ಷ ಸ್ಥಾನಕ್ಕೆ ತಾಪಂ ಸಭಾಂಗಣದಲ್ಲಿ ನಡೆದ ಚುನಾವಣೆಯಲ್ಲಿ ಲಲಿತಾ ಮರೆಪ್ಪ ಪೂಜಾರಿ ಮಾತ್ರ ನಾಮಪತ್ರ ಸಲ್ಲಿಸಿದ್ದರು. ನಾಮಪತ್ರಕ್ಕೆ ಮುಂಡರಗಿ ತಾಪಂ ಸದಸ್ಯ ಮಕ್ಬೂಲ್‌ ಪಟೇಲ್‌ ಸೂಚಕರಾಗಿದ್ದರು.  ಚುನಾವಣೆ ಅಧಿಕಾರಿಯಾಗಿದ್ದ ಸಹಾಯಕ ಆಯುಕ್ತ ಶಂಕರಗೌಡ ಸೋಮನಾಳ ನಾಮಪತ್ರ ಪರಿಶೀಲಿಸಿ, ಲಲಿತಾ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ ಎಂದು ಘೋಷಿಸಿದರು.

ತಹಶೀಲ್ದಾರ್‌ ಚನ್ನಮಲ್ಲಪ್ಪ ಘಂಟಿ, ತಾಪಂ ಇಒ ಬಸವರಾಜ ಹಾಜರಿದ್ದರು. ಸಭೆಯಲ್ಲಿ ಒಟ್ಟು 19 ಸದಸ್ಯರಲ್ಲಿ ಬಿಜೆಪಿಯ 12 ಸದಸ್ಯರು ಹಾಗೂ ವರ್ಕನಳ್ಳಿಯ ಕಾಂಗ್ರೆಸ್‌ ತಾಪಂ ಸದಸ್ಯೆ ಯಂಕಮ್ಮ ಸೇರಿದಂತೆ 13 ಜನ ಸದಸ್ಯರು ಭಾಗವಹಿಸಿದ್ದರು. ಆಯ್ಕೆ ಪ್ರಕ್ರಿಯೆ ಮುಗಿಯುತ್ತಿದ್ದಂತೆ ತಾಪಂ ಸದಸ್ಯರು ಹಾಗೂ ಬಿಜೆಪಿ ಕಾರ್ಯಕರ್ತರು ನೂತನ ಉಪಾಧ್ಯಕ್ಷರನ್ನು ಅಭಿನಂದಿಸಿದರು.