ಅಂಗಡಿ ಶೆಟರ್‌ ಮುರಿದು ಸರಣಿ ಕಳ್ಳತನ

Team Udayavani, Jul 16, 2022, 3:18 PM IST

ಶಹಾಪುರ: ನಗರದಲ್ಲಿ ಕಳೆದ 6 ತಿಂಗಳಿಂದ ಸರಣಿ ಕಳ್ಳತನವಾಗುತ್ತಿದ್ದು, ನಗರದ ನಾಲ್ಕು ಅಂಗಡಿಗಳ ಶೆಟರ್‌ ಮುರಿದು ಕಳ್ಳತನ ನಡೆದ ಘಟನೆ ಗುರುವಾರ ರಾತ್ರಿ ನಡೆದಿದೆ.

ಈ ಕುರಿತು ಘಟನಾ ಸ್ಥಳಗಳಿಗೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಶುಕ್ರವಾರ ಬೆಳಗ್ಗೆ ನಗರದ ಜೀವ್ಹೇಶ್ವರ ಕಲ್ಯಾಣ ಮಂಟಪ ಎದುರಿನ ಕುಂಠೊಜಿ ಕಾಂಪ್ಲೆಕ್ಸ್‌ನಲ್ಲಿರುವ ಆಶೀರ್ವಾದ ಮೆಡಿಕಲ್‌ ಶೆಟರ್‌ ಮುರಿದ ಕದೀಮ ಅಂಗಡಿಯಲ್ಲಿದ್ದ ಅಂದಾಜು 30 ಸಾವಿರ ರೂ. ದೋಚಿದ್ದಾನೆ. ಅದೇ ವೇಳೆ ಚಟ್ಟಿ ಕಾಂಪ್ಲೆಕ್ಸ್‌ನಲ್ಲಿರುವ ಭಾಗ್ಯ ಏಜೆನ್ಸಿ ಮತ್ತು ಪಕ್ಕದ ದಾವಣಗೆರೆ ಬೆಣ್ಣೆದೋಸೆ ಹೋಟೆಲ್‌ನ ಶೆಟರ್‌ ಮುರಿದ ಕಳ್ಳ ಅಂಗಡಿಯಲ್ಲಿದ್ದ ದುಡ್ಡು ದೋಚಿದ್ದಾನೆ. ಅಲ್ಲದೇ ಕಮಾನ್‌ ಬಳಿಯ ಶಿವಾನಂದ ಮೆಡಿಕಲ್‌ ಶೆಟರ್‌ ಮುರಿದು ಕಳ್ಳತನಕ್ಕೆ ಯತ್ನಿಸಿದ್ದಾನೆ ಎಂದು ತಿಳಿದು ಬಂದಿದೆ.

ಆಶೀರ್ವಾದ ಮೆಡಿಕಲ್‌ನಲ್ಲಿದ್ದ ಸುಮಾರು 30 ಸಾವಿರ ರೂ. ಅಲ್ಲದೇ ಮೆಡಿಕಲ್‌ನಲ್ಲಿ ಇಟ್ಟಿದ್ದ ಗೋಶಾಲೆ ದೇಣಿಗೆ ಡಬ್ಬಿಯಲ್ಲಿನ ಹಣ, ಭಾಗ್ಯ ಏಜೆನ್ಸಿ ಅಂಗಡಿ ಶೆಟರ್‌ ಮುರಿದು ಗಲ್ಲಾ ಪಟ್ಟಿಗೆಯಲ್ಲಿದ್ದ ಅಂದಾಜು 1500 ರೂ. ಹಣ ದೋಚಲಾಗಿದೆ. ಅದೇ ರೀತಿ ಹೋಟೆಲ್‌ ಶೆಟರ್‌ ಮುರಿಯಲಾಗಿದೆ. ಶಿವಾನಂದ ಮೆಡಿಕಲ್‌ ಅಂಗಡಿ ಸಹ ಕಳ್ಳತನ ಮಾಡಿದ್ದು, ಗಲ್ಲಾ ಪೆಟ್ಟಿಗೆಯಲ್ಲಿದ್ದ ಚಿಲ್ಲರೆ ತೆಗೆದುಕೊಂಡು ಹೋಗಿದ್ದಾನೆ ಎಂದು ಮಾಲೀಕರು ತಿಳಿಸಿದ್ದಾರೆ. ಸರಣಿ ಕಳ್ಳತನ ಕುರಿತು ಶುಕ್ರವಾರ ಸಂಜೆಯಾದರೂ ಪ್ರಕರಣ ದಾಖಲಾಗಿಲ್ಲ.