ಸಾಮಾಜಿಕ ಅಂತರ ಕಾಪಾಡದೆ ಎಡವಟ್ಟು

Team Udayavani, Apr 30, 2020, 1:56 PM IST

ಯಾದಗಿರಿ: ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ ಎದುರು ರೈತರು ಗುಂಪಾಗಿ ಕುಳಿತಿರುವುದು

ಯಾದಗಿರಿ: ಹಸಿರು ವಲಯ ಪಟ್ಟಿಯಲ್ಲಿರುವ ಗಡಿ ಜಿಲ್ಲೆ ಯಾದಗಿರಿಗೆ ರಾಜ್ಯ ಸರ್ಕಾರ ಮಂಗಳವಾರವಷ್ಟೇ ಮೇ 3ರ ವರೆಗೆ ಅನ್ವಯವಾಗುವಂತೆ ಹೊಸ ಮಾರ್ಗಸೂಚಿ ಬಿಡುಗಡೆ ಮಾಡಿದ್ದರಿಂದ ಮೊದಲಿನಿಂದಲೂ ಲಾಕ್‌ಡೌನ್‌ನಿಂದ ಸ್ವಲ್ಪ ವಿನಾಯಿತಿ ಸಿಕ್ಕಿದ್ದು, ಬಹುತೇಕ ಕಡೆಗಳಲ್ಲಿ ಸಾಮಾಜಿಕ ಅಂತರ ಕಾಪಾಡದಿರುವುದು ಎಡವಟ್ಟು ಸಂಭವಿಸುತ್ತಿದೆ.

ಜಿಲ್ಲೆಯಲ್ಲಿ ಅಗತ್ಯ ವಸ್ತುಗಳು ಸೇರಿದಂತೆ ದಿನಸಿ ವ್ಯಾಪಾರ, ತರಕಾರಿ, ಕೃಷಿ ಚಟುವಟಿಕೆಗಳ ಸಾಮಗ್ರಿ, ಕಟ್ಟಡ ನಿರ್ಮಾಣಕ್ಕೆ ಸಂಬಂಧಿಸಿದ ಉಪಕರಣಗಳ ಮಳಿಗೆ ಆರಂಭವಾಗಿರುವುದರಿಂದ ರಸ್ತೆಯಲ್ಲಿ ಜನರ ಓಡಾಟ ಕಂಡು ಬರುತ್ತಿದೆ. ಇದೀಗ ಕೈಗಾರಿಕೆ ವಲಯಕ್ಕೂ ಶೇ.50ರಷ್ಟು ಸಿಬ್ಬಂದಿ ಬಳಸಿಕೊಂಡು ಕಾರ್ಯನಿರ್ವಹಿಸುವ ಅವಕಾಶ ಸಿಕ್ಕಿದ್ದು, ಜಿಲ್ಲೆಯ ರೈಸ್‌ಮಿಲ್‌, ದಾಲ್‌ಮಿಲ್‌, ಕಾಟನ್‌ಮಿಲ್‌ಗ‌ಳು ಆರಂಭ ವಾಗಲಿವೆ. ಬೇಸಿಗೆ ದಿನವಾಗಿದ್ದರಿಂದ ಮನೆ ನಿರ್ಮಾಣದ ಕಾಮಗಾರಿಗಳು ಎಲ್ಲೆಡೆ ಸಾಗಿದ್ದು, ಜನರು ಕಬ್ಬಿಣದ ವಸ್ತುಗಳು ಸೇರಿದಂತೆ ಇತರೆ ಉಪಕರಣ ಖರೀದಿಸಲು ಹಾರ್ಡ್‌ವೇರ್‌ ಅಂಗಡಿಗಳ ಎದುರು ಜಮಾವಣೆಗೊಳ್ಳುತ್ತಿದ್ದು, ಸಾಮಾಜಿಕ ಅಂತರ ಗಾಳಿಗೆ ತೂರಲಾಗುತ್ತಿದೆ.

ಮಂಗಳವಾರವಷ್ಟೇ ಜಿಲ್ಲಾಧಿಕಾರಿಗಳು ಸಹಕಾರಿ ಬ್ಯಾಂಕ್‌ಗೆ ಭೇಟಿ ನೀಡಿ ಸಾಮಾಜಿಕ ಅಂತರ ಕಾಪಾಡುವಂತೆ ಸೂಚಿಸಿದ್ದರು. ಆದರೇ ಇಂದು ಬ್ಯಾಂಕ್‌ಗೆ ಬಂದಿದ್ದ ರೈತರು ಗುಂಪು ಗುಂಪಾಗಿ ನೆಲದ ಮೇಲೆಯೇ ಕುಳಿತುಕೊಂಡಿದ್ದರು.