COPD: ಕ್ರೋನಿಕ್‌ ಒಬ್‌ಸ್ಟ್ರಕ್ಟಿವ್‌ ಪಲ್ಮನರಿ ಡಿಸೀಸ್‌ (ಸಿಒಪಿಡಿ)

Team Udayavani, Nov 24, 2024, 9:34 AM IST

ಪ್ರತೀ ವರ್ಷ ನವೆಂಬರ್‌ ತಿಂಗಳಿನ ತೃತೀಯ ಬುಧವಾರವನ್ನು ವಿಶ್ವ ಸಿಒಪಿಡಿ ದಿನವೆಂಬುದಾಗಿ ಆಚರಿಸಲಾಗುತ್ತದೆ. ಪ್ರಸ್ತುತ ವರ್ಷ ಇತ್ತೀಚೆಗಷ್ಟೇ ಈ ದಿನವನ್ನು ಆಚರಿಸಿದ್ದೇವೆ. ಜಾಗತಿಕವಾಗಿ ಅತೀ ಹೆಚ್ಚು ಮರಣಗಳಿಗೆ ಕಾರಣವಾಗುವ ಅನಾರೋಗ್ಯಗಳಲ್ಲಿ ಸಿಒಪಿಡಿಯು ಮೂರನೇ ಸ್ಥಾನದಲ್ಲಿದೆ. ಸಾಂಪ್ರದಾಯಿಕವಾಗಿ ನಂಬುವಂತೆ ಸಿಒಪಿಡಿಗೆ ಧೂಮಪಾನವು ಪ್ರಧಾನ ಕಾರಣವಾಗಿದೆ. ಆದರೆ ಅವಧಿಪೂರ್ವ ಜನನ, ಅಸ್ತಮಾ, ಅಲರ್ಜಿಗಳು, ಪೌಷ್ಟಿಕಾಂಶ ಕೊರತೆ, ಮಾಲಿನ್ಯ, ಸೋಂಕುಗಳು ಮತ್ತಿತರ ಹಿಂದೆಯೇ ಬೇರುಬಿಟ್ಟ ಇತರ ಅನೇಕ ಅಂಶಗಳಂತಹವು ಕೂಡ ಧೂಮಪಾನಕ್ಕಿಂತ ಹೊರತಾಗಿ ಸಿಒಪಿಡಿ ಉಂಟಾಗುವುದಕ್ಕೆ ಕಾರಣವಾಗಬಹುದು ಎಂಬುದನ್ನು ಇತ್ತೀಚೆಗೆ ನಡೆಸಲಾದ ಅಧ್ಯಯನಗಳು ಸಾಬೀತುಪಡಿಸಿವೆ.

ಹೀಗೆ ಲಭ್ಯವಾಗಿರುವ ಈ “ಶೀಘ್ರ’ ಸಿಒಪಿಡಿಯ ಪರಿಕಲ್ಪನೆಯು ಪರಿಶೀಲನೆಯಲ್ಲಿದೆ. ಮನೆಯಲ್ಲಿ ಕಟ್ಟಿಗೆ, ಉರುವಲು ಉರಿಸುವಿಕೆ, ಔದ್ಯೋಗಿಕ ಮತ್ತು ಪಾರಿಸರಿಕ ಮೂಲಗಳಿಂದ ಉತ್ಪಾದನೆಯಾಗಿ ಗಾಳಿಯಲ್ಲಿರುವ ಮಾಲಿನ್ಯಕಾರಕಗಳನ್ನು ಉಸಿರಾಡುವುದು ಧೂಮಪಾನಿಗಳಲ್ಲದವರಲ್ಲಿ ಸಿಒಪಿಡಿ ಉಂಟಾಗುವುದಕ್ಕೆ ಕಾರಣವಾಗಬಲ್ಲ ಅಂಶಗಳಾಗಿ ಪರಿಗಣಿಸಬಹುದಾಗಿದೆ. ದೀರ್ಘ‌ಕಾಲೀನವಾದ ಉಸಿರಾಟಕ್ಕೆ ಕಷ್ಟ, ಕೆಮ್ಮು, ಕಫ‌ ಉತ್ಪಾದನೆಯಂತಹ ಲಕ್ಷಣಗಳನ್ನು ಹೊಂದಿರುವ ರೋಗಿಗಳಲ್ಲಿ ಕ್ರೋನಿಕ್‌ ಒಬ್‌ಸ್ಟ್ರಕ್ಟಿವ್‌ ಪಲ್ಮನರಿ ಡಿಸೀಸ್‌ (ಸಿಒಪಿಡಿ) ಇರಬಹುದು ಎಂದು ಶಂಕಿಸಬಹುದಾಗಿದೆ.

ಸಿಒಪಿಡಿ ದಿನಾಚರಣೆಯ ಈ ವರ್ಷದ ಧ್ಯೇಯವಾಕ್ಯವು “ನಿಮ್ಮ ಶ್ವಾಸಕೋಶಗಳ ಕಾರ್ಯವಿಧಾನವನ್ನು ತಿಳಿಯಿರಿ’ ಕ್ರೋನಿಕ್‌ ಒಬ್‌ಸ್ಟ್ರಕ್ಟಿವ್‌ ಪಲ್ಮನರಿ ಡಿಸೀಸ್‌ (ಸಿಒಪಿಡಿ) ಎಂಬುದಾಗಿದೆ. ಸಿಒಪಿಡಿ ರೋಗಪತ್ತೆ ಮತ್ತು ನಿರ್ವಹಣೆಯಲ್ಲಿ ಸ್ಪೈರೊಮೆಟ್ರಿಯ ಪ್ರಾಮುಖ್ಯವನ್ನು ಇದು ಎತ್ತಿಹಿಡಿಯುತ್ತದೆ. ಸ್ಪೈರೊಮೆಟ್ರಿ ಎಂಬುದು ಒಂದು ಕೈಯಲ್ಲಿ ಹಿಡಿಯಬಹುದಾದಂತಹ ಉಪಕರಣವಾಗಿದ್ದು, 1846ರಲ್ಲಿ ಜಾನ್‌ ಹಚಿನ್ಸನ್‌ ಎಂಬವರು ಈ ಉಪಕರಣವನ್ನು, “ರೋಗವನ್ನು ನಿಖರವಾಗಿ ಮತ್ತು ಸುಲಭವಾಗಿ ಪತ್ತೆಹಚ್ಚುವ ವಿಧಾನವನ್ನು ಸ್ಥಾಪಿಸುವ ಉದ್ದೇಶ’ದಿಂದ ಆವಿಷ್ಕರಿಸಿದರು. ಸಿಒಪಿಡಿಯನ್ನು ಪತ್ತೆಹಚ್ಚುವುದಕ್ಕೆ ಸ್ಪೈರೊಮೆಟ್ರಿಯು ಉತ್ಕೃಷ್ಟ ದರ್ಜೆಯ ಉಪಕರಣವಾಗಿದ್ದು, ಮೊದಲ ಒಂದು ಸೆಕೆಂಡ್‌ನ‌ಲ್ಲಿ ಬಲವಾದ ಉಸಿರಾಟದ ಮೂಲಕ ಒಳಕ್ಕೆಳೆದುಕೊಳ್ಳುವ ಶೇಕಡಾವಾರು ವಾಯುವಿ ಪ್ರಮಾಣ ಮತ್ತು ಇಂತಹದೇ ದರ್ಜೆಯಲ್ಲಿ ಬ್ರೊಂಕೊಡಯಲೇಟರ್‌ ಗಳ ಪರಿಣಾಮವನ್ನು ಇದು ತೋರಿಸುತ್ತದೆ.

ಆದರೆ ರೋಗಿಗಳ ಆರಂಭಿಕ ತಪಾಸಣೆಯಲ್ಲಿ ಸ್ಪೈರೊಮೆಟ್ರಿಯಯನ್ನು ಗಮನಾರ್ಹವಾಗಿ ಕಡಿಮೆ ಪ್ರಮಾಣದಲ್ಲಿ ಬಳಸುತ್ತಿರುವುದನ್ನು ವಿವಿಧ ದೇಶಗಳಲ್ಲಿ ನಡೆಸಲಾಗಿರುವ ಹಲವು ಅಧ್ಯಯನಗಳು ತೋರಿಸಿಕೊಟ್ಟಿವೆ. ಇದರಿಂದಾಗಿ ಸಿಒಪಿಡಿ ರೋಗಪತ್ತೆಯಲ್ಲಿ ಏರುಪೇರು ಉಂಟಾಗುವ ಸಾಧ್ಯತೆಯಿಂದ್ದು, ಸಿಒಪಿಡಿ ಆರೈಕೆಯಲ್ಲಿಯೂ ಏರುಪೇರು ಉಂಟಾಗಬಲ್ಲುದಾಗಿದೆ.

ಸಿಒಪಿಡಿಯ ಕಡಿಮೆ ರೋಗಪತ್ತೆ ಮತ್ತು ತಪ್ಪು ರೋಗಪತ್ತೆ ಎರಡೂ ಈ ರೋಗ ಎಷ್ಟು ಪ್ರಮಾಣದಲ್ಲಿ ಇದೆ ಎಂಬುದನ್ನು ತಿಳಿದುಕೊಳ್ಳುವುದಕ್ಕೆ ಅಡ್ಡಿಗಳಾಗಿವೆ. ಇದು ಸ್ಪೈರೋಮೆಟ್ರಿಯ ದತ್ತಾಂಶಗಳನ್ನು ಮತ್ತು ಶ್ವಾಸಾಂಗ ರೋಗಲಕ್ಷಣಗಳ ಸಂಭವನೀಯ ಪ್ರಮಾಣಗಳನ್ನು ರೋಗಪತ್ತೆಗೆ ಆಕರಗಳಾಗಿ ಉಪಯೋಗಿಸುವುದರ ಬಗ್ಗೆ ಇರುವ ಚರ್ಚೆಗಳ ಮೂಲಕ ಇನ್ನಷ್ಟು ಸಂಕೀರ್ಣಗೊಂಡಿದೆ. ಇದರ ಜತೆಗೆ ಸಾಮಾನ್ಯ ವೈದ್ಯರಲ್ಲಿ ಈ ಕಾಯಿಲೆಯ ಬಗ್ಗೆ ಇರುವ ಅರಿವು ಮತ್ತು ಜ್ಞಾನದ ಕೊರತೆಯಿಂದಾಗಿ ಸಿಒಪಿಡಿ ರೋಗಪತ್ತೆಯಾಗಿರುವವರು ವಿಳಂಬವಾಗಿ ಈ ರೋಗಪತ್ತೆಯಾಗಿರುವವರಿಗೆ ಸರಿಯಾದ ಚಿಕಿತ್ಸೆ ಸಿಗುತ್ತಿಲ್ಲ.

ಸಿಒಪಿಡಿ ರೋಗಿಗಳಿಗೆ ಆರಂಭಿಕ ಆರೈಕೆ ಮತ್ತು ಚಿಕಿತ್ಸೆ ಲಭ್ಯವಾಗುವುದು ಈ ಸಾಮಾನ್ಯ ವೈದ್ಯರಿಂದಲೇ ಆಗಿರುವುದರಿಂದಾಗಿ ಅವರು ಸಿಒಪಿಡಿಯ ಶೀರ್ಘ‌ ಮತ್ತು ನಿಖರವಾದ ರೋಗಪತ್ತೆ ನಡೆಸುವುದು ಅತ್ಯಂತ ನಿರ್ಣಾಯಕವಾಗಿದೆ. ಸಿಒಪಿಡಿ ರೋಗಪತ್ತೆ ಮತ್ತು ಚಿಕಿತ್ಸೆಯಲ್ಲಿ ಎದುರಾಗುವ ಇತರ ಸವಾಲುಗಳು ಎಂದರೆ ವಿಶೇಷವಾಗಿ ಗ್ರಾಮೀಣ, ಅರೆ ಪಟ್ಟಣ, ದುರ್ಗಮ ಪ್ರದೇಶಗಳು, ಆದಿವಾಸಿ ಸ್ಥಲಗಳಲ್ಲಿ ಸ್ಪೈರೊಮೆಟ್ರಿಯ ಅಲಭ್ಯತೆ, ಖಾಸಗಿ ಆರೋಗ್ಯ ಸೇವಾ ರಂಗದಲ್ಲಿ ಪಿಎಫ್ಟಿ ಸೇವೆಗೆ ಇರುವ ದುಬಾರಿ ದರ. ಇದರಿಂದಾಗಿ ಈ ಚಿಕಿತ್ಸೆ ಗ್ರಾಮೀಣ ಮತ್ತು ನಗರ ಭಾಗದ ಬಡವರಿಗೆ ಕೈಗೆಟಕದಂತಾಗುತ್ತದೆ.

ಭಾರತದಲ್ಲಿ ಸ್ಪೈರೊಮೆಟ್ರಿಯ ಸರಾಸರಿ ದರವು 300ರಿಂದ 500 ರೂ.ಗಳಾಗಿವೆ. ಇದು ದೇಶದ ಅರ್ಧಾಂಶಕ್ಕಿಂತ ಹೆಚ್ಚು ಜನಸಂಖ್ಯೆಯ ದಿನಗೂಲಿಗಿಂತ ಹೆಚ್ಚಾಗಿದ್ದು, ಅವರಿಗೆ ದುಬಾರಿ ಎನ್ನಿಸುತ್ತದೆ. ಭಾರತದಲ್ಲಿ ಶೇ. 70ಕ್ಕಿಂತ ಹೆಚ್ಚು ಮಂದಿ ವೈದ್ಯಕೀಯ ಸೇವೆಗಳ ವೆಚ್ಚವನ್ನು ತಮ್ಮದೇ ಜೇಬಿನಿಂದ ಭರಿಸಬೇಕಾದ ಸ್ಥಿತಿ ಇದೆ ಮತ್ತು ಆರೋಗ್ಯ ವಿಮಾ ಸಂಸ್ಥೆಗಳು ಶ್ವಾಸಾಂಗ ಕಾರ್ಯಕ್ಷಮತೆಯ ಪರೀಕ್ಷೆಗಳ ವೆಚ್ಚವನ್ನು ಭರಿಸುವುದಿಲ್ಲ.

ಆರೋಗ್ಯ ಸೇವಾ ಕೇಂದ್ರಕ್ಕೆ ಇರುವ ದೂರ, ಹಲವು ಬಾರಿ ಭೇಟಿ ನೀಡಬೇಕಾದ ಅಗತ್ಯ, ತಪಾಸಣೆಗೆ ಹೋದರೆ ದಿನಗೂಲಿ ನಷ್ಟವಾಗುವ ತೊಂದರೆ, ಪ್ರಯಾಣದ ವೆಚ್ಚ, ವಸತಿ ಇತ್ಯಾದಿಗಳು ತಪಾಸಣೆ-ಚಿಕಿತ್ಸೆಗೆ ಇರುವ ಇತರ ಅಡಚಣೆಗಳಾಗಿವೆ. ಅಲ್ಲದೆ ಸಾಮಾನ್ಯವಾಗಿ ಜಿಲ್ಲಾಸ್ಪತ್ರೆಗಳು ದೊಡ್ಡ ಸಂಖ್ಯೆಯ ರೋಗಿಗಳಿಗೆ ಸೇವೆ ಒದಗಿಸಬೇಕಾಗಿದ್ದು, ಅಲ್ಲಿ ಇದನ್ನು ನಿರ್ವಹಿಸಲು ಅಗತ್ಯವಾದ ಮಾನವ ಸಂಪನ್ಮೂಲ, ಮೂಲಸೌಕರ್ಯ ಇಲ್ಲದೆ ಸಾಕಷ್ಟು ಕಾಯಬೇಕಾದ ಪರಿಸ್ಥಿತಿ ಉದ್ಭವಿಸುತ್ತದೆ.

ಇದರ ಜತೆಗೆ ಸ್ಪೈರೊಮೆಟ್ರಿಯಲ್ಲಿ ಲಭ್ಯವಾಗುವ ಫ‌ಲಿತಾಂಶಗಳ ನಿಖರತೆಯು ದೈನಿಕ ಕ್ಯಾಲಿಬರೇಶನ್‌, ನಿರ್ವಹಣೆ, ಅದನ್ನು ನಿರ್ವಹಿಸುವ ಸಿಬಂದಿ ಪಡೆದಿರುವ ತರಬೇತಿ ಮತ್ತು ಅವರಿಗಿರುವ ಕೌಶಲ ಹಾಗೂ ರೋಗಿಯ ಸಹಕಾರ ಇತ್ಯಾದಿಗಳ ಮೇಲೂ ಅವಲಂಬಿತ ವಾಗಿರುತ್ತದೆ. ಹೀಗಾಗಿ ಸ್ಥಳೀಯ ಜನಸಂಖ್ಯೆಯಿಂದ ನಿರೀಕ್ಷಿತ ದತ್ತಾಂಶ ಗಳ ಅಂಕಿಸಂಖ್ಯೆಗಳ ಮೂಲಕ ದತ್ತಾಂಶಗಳನ್ನು ಸಂಗ್ರಹಿಸಿ ಅದನ್ನು ವ್ಯಾಖ್ಯಾನಿಸುವುದು ಸೂಕ್ತವಾಗಿದೆ.

ಸಾಮಾನ್ಯ ವೈದ್ಯರು ಕೂಡ ಸ್ಪೈರೊಮೆಟ್ರಿ ಉಪಯೋಗಿಸುವುದು, ಸ್ಪೈರೊಮೆಟ್ರಿ ಉಪಯೋಗದ ಬಗ್ಗೆ ಅರಿವು ಮೂಡಿಸುವುದು ಮತ್ತು ಸ್ಪೈರೊಮೆಟ್ರಿಗಳು ಕೈಗಟಕುವ ದರದಲ್ಲಿ ಲಭ್ಯವಾಗುವಂತೆ ಮಾಡುವುದು ಈ ನಿಟ್ಟಿನಲ್ಲಿ ತೆಗೆದುಕೊಳ್ಳಬೇಕಾದ ಕ್ರಮಗಳಾಗಿವೆ. ಪ್ರಾಥಮಿಕ ಆರೋಗ್ಯ ಸೇವೆಯಲ್ಲಿ ಇರುವ ಈ ಅಂತರವನ್ನು ಬೆಸೆಯಲು ನವೀನ ಡಿಜಿಟಲ್‌ ಇಂಡಿಯಾ ಪರಿಹಾರ ಕ್ರಮಗಳಿಂದ ಪ್ರಯತ್ನ ಪಡಲಾಗುತ್ತಿದೆ.

ಇಂತಹ ಪ್ರಯತ್ನಗಳಲ್ಲಿ ಕೃತಕ ಬುದ್ಧಿಮತ್ತೆಯ ಸಾಫ್ಟ್ವೇರ್‌ ಸಹಾಯದಿಂದ ಕಾರ್ಯಾಚರಿಸುವ ಕೈಯಲ್ಲಿ ಹಿಡಿದು ಉಪಯೋಗಿಸಬಹುದಾದ ಡಿಜಿಟಲ್‌ ಸ್ಪೈರೊಮೀಟರ್‌ ಮತ್ತು ಇದರಿಂದ ಪಡೆದ ಸ್ಪೈರೊಮೆಟ್ರಿ ದತ್ತಾಂಶಗಳನ್ನು ಬೇರೆಡೆ ಇರುವ ವೈದ್ಯರೊಬ್ಬರು ಪರಿ ಶೀಲಿಸುವುದು ಸೇರಿದೆ. ಇದಕ್ಕೆ ಒಂದು ಉದಾಹರಣೆ ಮಹಾರಾಷ್ಟ್ರ ರಾಜ್ಯದ ನಾಸಿಕ್‌ ಜಿಲ್ಲೆಯ ದಿಂಡೋರಿ ಉಪ ವಿಭಾಗದಲ್ಲಿ ಅನುಷ್ಠಾನಕ್ಕೆ ತರಲಾಗಿರುವ SAVE TM (ಸ್ಪೈರೊಮೆಟ್ರಿ ಅಸಿಸ್ಟೆಡ್‌ ವರ್ಚುವಲೀ ಅರ್ಲೀ).

-ಡಾ| ಉದಯ ಸುರೇಶ್‌ಕುಮಾರ್‌

ಕನ್ಸಲ್ಟಂಟ್‌ ಪಲ್ಮನಾಲಜಿಸ್ಟ್‌

ಕೆಎಂಸಿ ಆಸ್ಪತ್ರೆ,

ಡಾ| ಅಂಬೇಡ್ಕರ್‌ ವೃತ್ತ, ಮಂಗಳೂರು

(ಈ ಲೇಖನದಲ್ಲಿರುವ ವಿಚಾರಗಳ ಬಗ್ಗೆ ಹೆಚ್ಚಿನ ಮಾಹಿತಿಗಳಿಗಾಗಿ ಸಂಪರ್ಕಿಸಿ: ಮುಖ್ಯಸ್ಥರು, ಪಲ್ಮನಾಲಜಿ ವಿಭಾಗ, ಕೆಎಂಸಿ, ಮಾಹೆ, ಮಂಗಳೂರು)