ಥಂಡಾ ಥಂಡಾ ಕೂಲ್‌ ಕೂಲ್‌!

Team Udayavani, Mar 6, 2019, 12:30 AM IST

ಬಿಸಿಲಿನ ತಾಪ ಹೆಚ್ಚಾಗುತ್ತಿದೆ. ಎಷ್ಟು ನೀರು ಕುಡಿದರೂ ದಾಹ ತಣಿಯುತ್ತಿಲ್ಲ. ಸಿಹಿ, ಸಿಹಿಯ ಪಾನೀಯಗಳನ್ನು ಮನಸ್ಸು ಬಯಸುತ್ತಿದೆ. ತಾಜಾ ಹಣ್ಣಿನ ಜ್ಯೂಸ್‌ಗಳು ಬಾಯಾರಿಕೆ ತಣಿಸುವುದಷ್ಟೇ ಅಲ್ಲ, ಬೇಸಿಗೆಯಲ್ಲಿ ನಮ್ಮ ಆರೋಗ್ಯವನ್ನೂ ಚೆನ್ನಾಗಿಡುತ್ತವೆ. ಜ್ಯೂಸ್‌ ಕುಡಿಯಲು ಜ್ಯೂಸ್‌ ಸೆಂಟರ್‌ಗೆ ಹೋಗಬೇಕಲ್ಲ ಎನ್ನಬೇಡಿ; ತುಂಬ ಸುಲಭವಾಗಿ ಮನೆಯಲ್ಲೇ ಸ್ವಾದಿಷ್ಟ ಪಾನೀಯಗಳನ್ನು ತಯಾರಿಸಬಹುದು. ಅಂಥ ಕೆಲವು ಜ್ಯೂಸ್‌ಗಳ ರೆಸಿಪಿ ಇಲ್ಲಿದೆ. 

1. ಅನಾನಸ್‌ ಮಿಲ್ಕ್ ಶೇಕ್‌
ಬೇಕಾಗುವ ಸಾಮಗ್ರಿ: ಅನಾನಸ್‌ ತುಣುಕು- 2 ಕಪ್‌, ಕ್ಯಾರೆಟ್‌ ತುಣುಕು- 1 ಕಪ್‌, ಬಾಳೆಹಣ್ಣು- 1, ಹಾಲು- 1/2 ಕಪ್‌

ಮಾಡುವ ವಿಧಾನ: ಅನಾನಸ್‌ ಮತ್ತು ಕ್ಯಾರೆಟ್‌ ತುಣುಕುಗಳನ್ನು ಮಿಕ್ಸಿಗೆ ಹಾಕಿ ಪೇಸ್ಟ್‌ ಮಾಡಿಕೊಳ್ಳಿ. ಬಾಳೆಹಣ್ಣನ್ನು ಕಿವುಚಿ, ಹಾಲಿನೊಂದಿಗೆ ಸೇರಿಸಿ, ಪೇಸ್ಟ್‌ ಮಾಡಿ. ಎರಡೂ ಬಗೆಯ ಪೇಸ್ಟ್‌ಅನ್ನು ಸರಿಯಾಗಿ ಬೆರೆಸಿದರೆ ಅನಾನಸ್‌ ಮಿಲ್ಕ್ ಶೇಕ್‌ ರೆಡಿ. 

2. ಮಾವು-ಕ್ಯಾರೆಟ್‌ ಜ್ಯೂಸ್‌ 
ಬೇಕಾಗುವ ಸಾಮಗ್ರಿ: ಮಾವಿನ ಹಣ್ಣು- 2, ಜೇನುತುಪ್ಪ- 1 ಚಮಚ (ಸಕ್ಕರೆಯ ಬದಲು) ಕ್ಯಾರೆಟ್‌- 2

ಮಾಡುವ ವಿಧಾನ : ಮಾವಿನ ಹಣ್ಣು ಮತ್ತು ಕ್ಯಾರೆಟ್‌ ಅನ್ನು ಚೆನ್ನಾಗಿ ತೊಳೆಯಿರಿ. ಕ್ಯಾರೆಟ್‌ನ ಸಿಪ್ಪೆ ತೆಗೆದು ಸಣ್ಣದಾಗಿ ಹೆಚ್ಚಿಕೊಳ್ಳಿ. ಅದನ್ನು ಮಾವಿನ ಹಣ್ಣಿನ ಜೊತೆ ಸೇರಿಸಿ, ಮಿಕ್ಸಿಯಲ್ಲಿ ರುಬ್ಬಿ.  ಆ ಮಿಶ್ರಣಕ್ಕೆ ಜೇನುತುಪ್ಪ ಬೆರೆಸಿ, ಸಮನಾಗಿ ಕಲಕಿದರೆ ಸ್ವಾದಿಷ್ಟಕರವಾದ ಜ್ಯೂಸ್‌ ಸಿದ್ಧ. 

3. ದಾಳಿಂಬೆ ಜ್ಯೂಸ್‌
ಬೇಕಾಗುವ ಸಾಮಗ್ರಿ: ದಾಳಿಂಬೆ ಕಾಳು- ಒಂದು ಕಪ್‌, ಲಿಂಬೆರಸ- ಎರಡು ಚಮಚ, ಪುದೀನಾ ಸೊಪ್ಪು, ಸಕ್ಕರೆ, ಕಾಳುಮೆಣಸಿನ ಪುಡಿ- 1/2 ಚಮಚ.

ಮಾಡುವ ವಿಧಾನ: ದಾಳಿಂಬೆ ಕಾಳನ್ನು, ರುಚಿಗೆ ತಕ್ಕಷ್ಟು ಸಕ್ಕರೆ ಮತ್ತು ಸ್ವಲ್ಪ ನೀರು ಬೆರೆಸಿ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ. ಅದಕ್ಕೆ ಲಿಂಬೆರಸ, ಕಾಳುಮೆಣಸಿನ ಪುಡಿ ಬೆರೆಸಿ, ಪುದೀನಾ ಎಲೆಯನ್ನು ಉದುರಿಸಿ. (ರುಬ್ಬುವಾಗಲೇ ಪುದೀನಾ ಸೊಪ್ಪನ್ನು ಸೇರಿಸಬಹುದು) 

4. ಕ್ಯಾರೆಟ್‌-ಬೀಟ್‌ರೂಟ್‌ ಜ್ಯೂಸ್‌
ಬೇಕಾಗುವ ಸಾಮಗ್ರಿ: ಕ್ಯಾರೆಟ್‌- 1, ಬೀಟ್‌ರೂಟ್‌- 2, ಕಪ್ಪುದ್ರಾಕ್ಷಿ- 15, ಸಕ್ಕರೆ/ ಜೇನುತುಪ್ಪ, ನೀರು

ಮಾಡುವ ವಿಧಾನ: ಕ್ಯಾರೆಟ್‌ ಹಾಗೂ ಬೀಟ್‌ರೂಟ್‌ ತುರಿದು, ದ್ರಾಕ್ಷಿಯ ಜೊತೆ ಸೇರಿಸಿ ಮಿಕ್ಸಿಯಲ್ಲಿ ರುಬ್ಬಿಕೊಳ್ಳಿ. ನಿಮಗೆ ಬೇಕಾದಷ್ಟು ನೀರು ಸೇರಿಸಿ. ಅದನ್ನು ಸೋಸಿ, ಜೇನುತುಪ್ಪ ಅಥವಾ ಸಕ್ಕರೆ ಹಾಕಿ, ಕರಗಿಸಿ. ಈ ಜ್ಯೂಸ್‌ನಲ್ಲಿ ಝಿಂಕ್‌ ಹಾಗೂ ವಿಟಮಿನ್‌ ಎ ಅಧಿಕವಾಗಿದ್ದು, ಬೇಸಿಗೆಯಲ್ಲಿ ಕೂದಲು ಉದುರುವ ಸಮಸ್ಯೆಯನ್ನು ತಡೆಯಬಲ್ಲದು.  

ಭಾಗ್ಯಶ್ರೀ, ವಿಜಯಪುರ