ನಮ್ಮೆಲ್ಲರದೆನ್ನುವ … ಹಬ್ಬವದು ದೀಪಾವಳಿ…

Team Udayavani, Oct 25, 2019, 4:48 PM IST

ನಮ್ಮೆಲ್ಲರದೆನ್ನುವ … ಹಬ್ಬವದು ದೀಪಾವಳಿ…

ಬಚ್ಬಿಟ್ಟಿದ್ದ ದುಗುಡ ದುಮ್ಮಾನವೆಲ್ಲ

ಹರಿದು ಹೋದವು ಸಂತಸದ ನೆರೆ ಪ್ರವಾಹದಲ್ಲಿ

ಹಚ್ಚ ಬೇಕಿದ್ದ ಹಣತೆಯ ಕಮಲಗಳೆಲ್ಲ

ಮೊಗ್ಗಾಗಿ… ಹೂವಾಗಿ… ಅರಳಿದವು ಅಂಧಕಾರದ ಕೊಳದಲ್ಲಿ

ಸೋಲಿನ ಕತ್ತಲೆಯೊಳಗೆ ಜೀವ ಹುಡುಕುತ್ತಿದ್ದ

ಭರವಸೆಯ ಬೆಳಕೊಂದು ಅಲ್ಲೆಲ್ಲೋ ಕಿಡಿಯಾಗಿ… ಇಡಿಯಾಗಿ…

ಕೈಯಳತೆಯ ಹಿಡಿತಕ್ಕೆ ನಗುವಾಗಿ… ಗೆಲುವಾಗಿ…

ಸಂಭ್ರಮಿಸಿತು ಹಚ್ಚುತ್ತಾ ಒಂದೊಂದಾಗಿ

ಬೆಳಕೆಲ್ಲಾ ಬೆಳಗಿದವು ತಾನೇತಾನಾಗಿ

ಕಾರಣವದುವೆ ಹೇಳಬೇಕೆ ಮತ್ತೆ ಮತ್ತೆ ಬರುವ

ನನ್ನದೆನ್ನುವ…  ನಮ್ಮದೆನ್ನುವ … ನಮ್ಮೆಲ್ಲರದೆನ್ನುವ … ಹಬ್ಬವದು ದೀಪಾವಳಿ… !!

-ರವಿಶಂಕರ್ ಎನ್ ಕೆ.