ರಂಗೇರಿದ ಧಾರವಾಡ ಚುನಾವಣಾ ಕಣ

Team Udayavani, Apr 4, 2019, 6:20 AM IST

ಧಾರವಾಡ: ಕಾಂಗ್ರೆಸ್‌ ಪಕ್ಷದ ಟಿಕೆಟ್‌ ಹಂಚಿಕೆ ಗೊಂದಲದಿಂದ ಈವರೆಗೂ ಸಪ್ಪೆಯಾಗಿದ್ದ ಧಾರವಾಡ ಲೋಕಸಭಾ ಕಣ ಇದೀಗ ರಂಗೇರಿದ್ದು, ಅಂತಿಮವಾಗಿ ಮಾಜಿ ಸಚಿವ ವಿನಯ್‌ ಕುಲಕರ್ಣಿಗೆ ಇಲ್ಲಿ ಕಾಂಗ್ರೆಸ್‌ ಟಿಕೆಟ್‌ ನೀಡಿದೆ.

ಇದರಿಂದ ಚುನಾವಣೆ ಕಣ ರಂಗೇರಿದ್ದು, ಈ ಮೊದಲು ಇಲ್ಲಿ ಅಲ್ಪಸಂಖ್ಯಾತರನ್ನು ಪರಿಗಣಿಸುವಂತೆ ಕಾಂಗ್ರೆಸ್‌ ಹೈಕಮಾಂಡ್‌ ಮೇಲೆ ತೀವ್ರ ಒತ್ತಡ ತರಲಾಗಿತ್ತು. ಅಲ್ಪಸಂಖ್ಯಾತರಿಗೆ ಟಿಕೆಟ್‌ ನೀಡಬೇಕು ಎನ್ನುವ ಒತ್ತಡ ಒಂದು ಗುಂಪು ಮಾಡಿತ್ತು. ಆದರೆ ಜಿಲ್ಲೆಯ ಅಲ್ಪಸಂಖ್ಯಾತ ಮುಖಂಡರು ಕೊನೇ ಘಳಿಗೆಯಲ್ಲಿ ಮಾಜಿ ಸಚಿವ ವಿನಯ್‌ ಬೆನ್ನಿಗೆ ನಿಂತಿದ್ದರಿಂದ ಹಾಗೂ ಮಾಜಿ ಸಿಎಂ ಸಿದ್ದರಾಮಯ್ಯ ಅಭಯ ತೋರಿದ್ದರಿಂದ ಇಲ್ಲಿ ಅಂತಿಮವಾಗಿ ವಿನಯ್‌ ಕುಲಕರ್ಣಿಗೆ ಕಾಂಗ್ರೆಸ್‌ ಟಿಕೆಟ್‌ ಲಭಿಸಿತು.

ಟಿಕೆಟ್‌ ವಿಳಂಬಗೊಂಡಿದ್ದು, ಗೆಲುವಿಗೆ ಸಾಕಷ್ಟು ತೊಡಕಾಗಬಹುದು ಎನ್ನುವ ಲೆಕ್ಕಾಚಾರವೂ ಸ್ವತಃ ಕಾಂಗ್ರೆಸ್‌ ಮುಖಂಡರಲ್ಲಿಯೇ ಇದೆ. ಸತತ ಮೂರು ಬಾರಿ ಗೆದ್ದಿರುವ ಸಂಸದ ಪ್ರಹ್ಲಾದ ಜೋಶಿ ಅವರು 4ನೇ ಬಾರಿ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ. ಮೋದಿ ವರ್ಚಸ್ಸು, ಬಿಜೆಪಿ ಅಲೆ ಅವರನ್ನು ಮತ್ತೂಂದು ಸಾರಿ ಗೆಲ್ಲಿಸಬಹುದು ಎಂದು ಬಿಜೆಪಿ ಲೆಕ್ಕಾಚಾರ ಹಾಕುತ್ತಿದೆ. ಆದರೆ ಸತತ ಎರಡು ಬಾರಿ ಸೋಲು ಕಂಡಿರುವ ಮಾಜಿ ಸಚಿವ, ಕಾಂಗ್ರೆಸ್‌ ಅಭ್ಯರ್ಥಿ ವಿನಯ್‌ ಕುಲಕರ್ಣಿ ಅವರಿಗೂ ಪ್ರಬಲ ಲಿಂಗಾಯತ ಸಮುದಾಯ ಮತ್ತು ಅಹಿಂತ ಮತಗಳು ಈ ಬಾರಿಯಾದರೂ ಕೈ ಹಿಡಿಯುತ್ತವೆ ಎನ್ನುವ ಲೆಕ್ಕಾಚಾರ ಕಾಂಗ್ರೆಸ್‌ನಲ್ಲಿ ಗಿರಕಿ ಹೊಡೆಯುತ್ತಿದೆ. ಸದ್ಯಕ್ಕೆ ವಿನಯ್‌ ಕುಲಕರ್ಣಿಗೆ ಟಿಕೆಟ್‌ ಸಿಕ್ಕಿದ್ದರಿಂದ ಧಾರವಾಡ ಲೋಕಸಭಾ ಕಣ ಜಿದ್ದಾಜಿದ್ದಿನ ಕಣವಾಗಿ ರಂಗೇರಿದ್ದಂತೂ ನಿಜ.