ಮೋದಿ ಮುಖ ನೋಡಿ ನನಗೆ ಓಟು ಹಾಕಿ: ಜಿಗಜಿಣಗಿ

Team Udayavani, Mar 29, 2019, 6:49 AM IST

ವಿಜಯಪುರ: “ದೇಶಕ್ಕೆ ಗೌರವ ತಂದು ಕೊಡುವ ವಿಷಯದಲ್ಲಿ ಪ್ರಧಾನಿ ಮೋದಿ ಅವರು ಗಂಡಸ್ತನದ ಕೆಲಸ ಮಾಡ್ಯಾರ, ದೇಶದ ರಕ್ಷಣೆಗಾಗಿ ಜನರು ಓಟು ಹಾಕ್ತಾರ. ನನ್ನ ಕ್ಷೇತ್ರದಲ್ಲೂ ಅಷ್ಟೇ, ನನ್ನ ಮುಖ ನೋಡಿ ಯಾರೂ ಓಟ್‌ ಹಾಕಬ್ಯಾಡ್ರಿ. ದೇಶದ ಹಿತಕ್ಕಾಗಿ ಮೋದಿ ಮುಖ ನೋಡಿ ನನಗೆ ಮತ ಹಾಕಿ’ ಎಂದು ಕೇಂದ್ರ ಗ್ರಾಮೀಣ ಕುಡಿಯುವ ನೀರು ಹಾಗೂ ನೈರ್ಮಲ್ಯ ಸಚಿವ ರಮೇಶ ಜಿಗಜಿಣಗಿ ಮನವಿ ಮಾಡಿದರು.

ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, “ಯಾರೇ ಕಿನ್ನೂರಿ ಬಾರಿಸಿ ದರೂ ನನ್ನನ್ನಾಗಲಿ, ಬಿಜೆಪಿಯನ್ನಾಗಲಿ ಸೋಲಿಸಲು ಯಾವ ಪಕ್ಷದ ನಾಯಕ ರಿಂದಲೂ ಸಾಧ್ಯವಿಲ್ಲ. ನನ್ನನ್ನು ಸೋಲಿಸುವ ಶಕ್ತಿ ಇರುವುದು ಕೇವಲ ನನ್ನ ಕ್ಷೇತ್ರದ ಮತದಾರರಿಗೆ ಮಾತ್ರ. ದೇಶದಲ್ಲಿ ಸುಮಾರು 300ಕ್ಕೂ ಅಧಿಕ ಕ್ಷೇತ್ರಗಳಲ್ಲಿ ಬಿಜೆಪಿ ದಿಗ್ವಿಜಯ ಬಾರಿಸಲಿದೆ.

ಜೆಡಿಎಸ್‌ ಕಾರ್ಯಕರ್ತರು, ಕಾಂಗ್ರೆಸ್‌ ಜೊತೆ ಎಂದೂ ಪರಸ್ಪರ ಒಂದಾಗಿ ಕೆಲಸ
ಮಾಡಲು ಸಾಧ್ಯವಿಲ್ಲ. ಹೀಗಾಗಿ, ವಿಜಯಪುರ ಕ್ಷೇತ್ರದಲ್ಲಿ ಈ ಬಾರಿಯೂ
ನನ್ನ ಗೆಲುವು ನಿಶ್ಚಿತ. ನಾನು ಕೂಡ ಹೆಚ್ಚು ಕೆಲಸ ಮಾಡಿದ್ದೇನೆ’ ಎಂದರು.

ಸುಮಲತಾ ಗೆದ್ದರೆ ಬಿಜೆಪಿಗೆ
ಮಂಡ್ಯ ಕ್ಷೇತ್ರದಲ್ಲಿ ಸುಮಲತಾ ಚುನಾವಣೆಯಲ್ಲಿ ಗೆದ್ದ ಬಳಿಕ ಬಿಜೆಪಿ ಸೇರುತ್ತಾರೆ ಎಂದು ಜಿಗಜಿಣಗಿ ಹೇಳಿದರು. ಹಲವು ಬಾರಿ ಕೈಸುಟ್ಟುಕೊಂಡಿರುವ ಕಾರಣ ಈ ಬಾರಿ ಗೆಲ್ಲುವ ಸಮರ್ಥ ಅಭ್ಯರ್ಥಿ ಆಗಿರುವ ಸುಮಲತಾ ಅವರಿಗೆ ಪಕ್ಷ ಬೆಂಬಲ ನೀಡಿದ್ದು, ಅವರ ಗೆಲುವು ಸ್ಪಷ್ಟವಾಗಿದೆ ಎಂದರು.