3ನೇ ಬಾರಿಯೂ ಜನಾಶೀರ್ವಾದ

ಬಿಜೆಪಿ ಅಭ್ಯರ್ಥಿ ನಳಿನ್‌ ಕುಮಾರ್‌ ಕಟೀಲು ಸಂದರ್ಶನ

Team Udayavani, Mar 25, 2019, 6:30 AM IST

ಮೂರನೇ ಬಾರಿಗೆ ಸ್ಪರ್ಧಿಸುತ್ತಿದ್ದೀರಿ; ಪರಿಸ್ಥಿತಿ ಭಿನ್ನವಾಗಿದೆಯೇ ?
ದ.ಕ. ಲೋಕಸಭಾ ಕ್ಷೇತ್ರದಿಂದ ಮತದಾರರು ಎರಡು ಬಾರಿ ನನಗೆ ಅಶೀರ್ವಾದ ಮಾಡಿ ಲೋಕಸಭೆಗೆ ಕಳುಹಿಸಿಕೊಟ್ಟಿದ್ದಾರೆ. ಮೊದಲ ಬಾರಿ ಆಯ್ಕೆಯಾದಾಗ ನಾನು ವಿಪಕ್ಷದ ಸಂಸದನಾಗಿದ್ದೆ. ಎರಡನೇ ಬಾರಿ ಆಯ್ಕೆಯಾಗಿ ಆಡಳಿತ ಪಕ್ಷದ ಸಂಸದನಾಗಿದ್ದೇನೆ. ಹಲವಾರು ಯೋಜನೆಗಳು ಪೂರ್ಣಗೊಂಡಿವೆ. ಇನ್ನು ಕೆಲವು ಪ್ರಗತಿಯಲ್ಲಿವೆ. ಈ ಎಲ್ಲವನ್ನು ಗಮನಿಸಿ ಮತದಾರರು ಆಶೀರ್ವಾದ ಮಾಡಲಿದ್ದಾರೆ.
ಕಾಂಗ್ರೆಸ್‌ನ ಯುವ ಅಭ್ಯರ್ಥಿಯಿಂದಾಗಿ ಸ್ಪರ್ಧಾಕಣದ ಮೇಲೆ ಪರಿಣಾಮ ಬೀರಲಿದೆಯೇ?
ಇದೊಂದು ವೈಚಾರಿಕ ಹೋರಾಟ. ನಮ್ಮ ವಿಚಾರಧಾರೆ, ಅಭಿವೃದ್ಧಿ, ಸಾಧನೆಗಳನ್ನು ಮುಂದಿಟ್ಟುಕೊಂಡು ಜನರ ಬಳಿಗೆ ಹೋಗುತ್ತಿ
ದ್ದೇವೆ. ನಮ್ಮ ಪ್ರತಿಸ್ಪರ್ಧಿ ಯಾರು, ಅವರ ಪ್ರಾಯ ಎಷ್ಟು ಎಂಬುದು ಮುಖ್ಯವಲ್ಲ.
ಪ್ರಚಾರ ಹೇಗಿದೆ
ಪ್ರಚಾರ ಬಿರುಸಿನಿಂದ ಸಾಗಿದೆ. ಕಾರ್ಯಕರ್ತರು ಈಗಾಗಲೇ 1ನೇ
ಸುತ್ತಿನ ಮನೆಮನೆ ಭೇಟಿ ಮುಗಿಸಿದ್ದಾರೆ. ನಾನು ಕ್ಷೇತ್ರದಲ್ಲಿ 2 ಸುತ್ತಿನ ಪ್ರವಾಸ ಮಾಡಿದ್ದೇನೆ. ಪೇಜ್‌ ಪ್ರಮುಖರು, ಶಕ್ತಿಕೇಂದ್ರಗಳ ಪ್ರಮುಖರು ಪ್ರಚಾರ ಕಣದಲ್ಲಿದ್ದಾರೆ. ಇದಲ್ಲದೆ ನರೇಂದ್ರ ಮೋದಿಯವರ ಸಾಧನೆ, ಆಡಳಿತವನ್ನು ನೋಡಿ ಆನೇಕ ಸೇವಾಸಂಸ್ಥೆಗಳೂ ಪ್ರಚಾರ ಕಾರ್ಯದಲ್ಲಿ ಸ್ವಯಂ ತೊಡಗಿಸಿಕೊಂಡಿವೆ.
ನಿಮ್ಮ ಸ್ಪರ್ಧೆಗೆ ಅತೃಪ್ತಿ ಇತ್ತೆ?
ಅಲ್ಪಸ್ವಲ ಅಸಮಾಧಾನಗಳು ಎಲ್ಲ ಪಕ್ಷಗಳಲ್ಲೂ ಸಹಜ. 2 ಬಾರಿ ಸಂಸದನಾಗಿದ್ದೇನೆ. 3ನೇ ಬಾರಿಗೆ ಕಣದಲ್ಲಿದ್ದೇನೆ. ಆಕಾಂಕ್ಷಿಗಳು, ಅಪೇಕ್ಷಿತರು ಸಹಜ.
ಅವೆಲ್ಲ ಈಗ ಬಗೆಹರಿದಿವೆ; ಎಲ್ಲರೂ ಒಗ್ಗಟ್ಟಿನಿಂದ ಚುನಾವಣಾ ಪ್ರಚಾರದಲ್ಲಿ ನಿರತರಾಗಿದ್ದೇವೆ.