ಕರ್ತವ್ಯದ ಮಧ್ಯೆಯೂ ಪೊಲೀಸರಿಂದ ಮತದಾನ

Team Udayavani, Apr 24, 2019, 6:25 AM IST

ಕುಂದಾಪುರ: ಧಾರವಾಡಕ್ಕೆ ಚುನಾವಣಾ ಕರ್ತವ್ಯ ನಿರತರಾದ 40 ಪೊಲೀಸರಿಗೆ ಬೈಂದೂರು ಕ್ಷೇತ್ರದಲ್ಲಿ ಮತದಾನಕ್ಕೆ ಜಿಲ್ಲಾ ಎಸ್‌ಪಿ ಅವರು ವ್ಯವಸ್ಥೆ ಮಾಡಿದ್ದಾರೆ.

ಬೈಂದೂರು ವಿಧಾನಸಭಾ ಕ್ಷೇತ್ರದ ಠಾಣೆಗಳ 40 ಪೊಲೀಸರಿಗೆ ಲೋಕಸಭಾ ಚುನಾವಣೆಗೆ ಧಾರವಾಡ ಕ್ಷೇತ್ರದಲ್ಲಿ ಕರ್ತವ್ಯ ನಿರ್ವಹಿಸಲು ನಿಯೋಜಿಸಲಾಗಿತ್ತು. ಆದರೆ ಹಾಗಾದಾಗ ಅವರಿಗೆ ಶಿವಮೊಗ್ಗ ಕ್ಷೇತ್ರದ ಮತದಾನದಲ್ಲಿ ಭಾಗವಹಿಸಲು ಅವಕಾಶ ದೊರೆಯುವುದಿಲ್ಲ ಎಂದು ಪೊಲೀಸರು ಜಿಲ್ಲಾ ಎಸ್‌ಪಿ ನಿಶಾ ಜೇಮ್ಸ್‌ ಅವರಿಗೆ ಮನವಿ ಮಾಡಿದರು.

ತತ್‌ಕ್ಷಣ ಎಸ್‌ಪಿ ಅವರು ಅಷ್ಟೂ ಮಂದಿಯನ್ನು ಉಡುಪಿಯಲ್ಲಿ ಮತಪೆಟ್ಟಿಗೆಗಳನ್ನು ಇಟ್ಟ ಸ್ಟ್ರಾಂಗ್‌ ರೂಮ್‌ಗೆ ಭದ್ರತೆಗೆ ನಿಯೋಜಿಸಿದರು. ಚುನಾವಣೆ ದಿನ ಇಡಿಸಿ (ಎಲೆಕ್ಷನ್‌ ಡ್ನೂಟಿ ಸರ್ಟಿಫಿಕೇಟ್‌) ಆಧಾರದಲ್ಲಿ ಮತ ಚಲಾವಣೆಗೆ ಅವಕಾಶ ಒದಗಿಸಿದ್ದಾರೆ. ಪೊಲೀಸರು ಹಿರಿಯ ಅಧಿಕಾರಿಗಳ ಈ ಕ್ರಮಕ್ಕೆ ಸಂತೋಷ ವ್ಯಕ್ತಪಡಿಸಿದ್ದಾರೆ.