ದೇಶದಲ್ಲಿ 5 ಲಕ್ಷ ಸೋಂಕುಪೀಡಿತರು; ಒಂದೇ ದಿನ 17 ಸಾವಿರಕ್ಕೂ ಹೆಚ್ಚು ಪ್ರಕರಣ ದಾಖಲು

Team Udayavani, Jun 27, 2020, 6:20 AM IST

ಹೊಸದಿಲ್ಲಿ: ದೇಶದಲ್ಲಿ ಕೋವಿಡ್ 19 ಪೀಡಿತರ ಸಂಖ್ಯೆ 5 ಲಕ್ಷ ದಾಟಿದೆ. ಮಹಾರಾಷ್ಟ್ರ, ತಮಿಳುನಾಡು ಮತ್ತು ದಿಲ್ಲಿಗಳಲ್ಲಿ ತಲಾ ಮೂರು ಸಾವಿರಕ್ಕೂ ಹೆಚ್ಚು ಪ್ರಕರಣಗಳು ಕಾಣಿಸಿಕೊಂಡಿದ್ದು, ಇದರಿಂದಾಗಿ ಶುಕ್ರವಾರ ರಾತ್ರಿ ವೇಳೆಗೆ ಒಟ್ಟಾರೆ ಸೋಂಕುಪೀಡಿತರ ಸಂಖ್ಯೆ 5 ಲಕ್ಷ ದಾಟಿತು.

ಸದ್ಯ ದೇಶದಲ್ಲಿ 1.93 ಲಕ್ಷ ಸಕ್ರಿಯ ಪ್ರಕರಣಗಳಿದ್ದರೆ 2.94 ಲಕ್ಷ ಮಂದಿ ಚೇತರಿಸಿಕೊಂಡಿದ್ದಾರೆ. ಒಟ್ಟು 15,682 ಮಂದಿ ಸಾವನ್ನಪ್ಪಿದ್ದಾರೆ.

24 ತಾಸು; 17,296 ಪ್ರಕರಣ
ಗುರುವಾರ ಬೆಳಗ್ಗೆ 8ರಿಂದ ಶುಕ್ರವಾರ ಬೆಳಗ್ಗೆ 8ರ ವರೆಗಿನ 24 ತಾಸುಗಳಲ್ಲಿ ದೇಶದ ಸೋಂಕು ಪೀಡಿತರ ಸಂಖ್ಯೆಯಲ್ಲಿ ದಾಖಲೆ ಸೃಷ್ಟಿಯಾಗಿದೆ. ಈ ಅವಧಿಯಲ್ಲಿ 17,296 ಪ್ರಕರಣ ದೃಢಪಟ್ಟಿದ್ದು, 407 ಮಂದಿ ಸಾವನ್ನಪ್ಪಿದ್ದಾರೆ.

40 ಕೋಟಿ ಮಂದಿಯ ಸ್ಕ್ರೀನಿಂಗ್‌
ಸೋಂಕಿಗೆ ಕಡಿವಾಣ ಹಾಕುವ ಸರಕಾರದ ಪ್ರಯತ್ನ ಮುಂದುವರಿದಿದ್ದು, ಜುಲೈ ಅಂತ್ಯದೊಳಗಾಗಿ ದಿಲ್ಲಿ, ಪಂಜಾಬ್‌, ಒಡಿಶಾ, ಮಧ್ಯಪ್ರದೇಶ, ಉತ್ತರಪ್ರದೇಶ ಮತ್ತು ಆಂಧ್ರಗಳ ಸುಮಾರು 40 ಕೋಟಿ ಮಂದಿಯನ್ನು ಸ್ಕ್ರೀನಿಂಗ್‌ಗೆ ಒಳಪಡಿಸಲು ನಿರ್ಧರಿಸಲಾಗಿದೆ.