ಒಂದು ಸೆಕೆಂಡ್‌ಗೆ 50,000 ಸಿನೆಮಾ ಡೌನ್‌ ಲೋಡ್‌…!

Team Udayavani, Jul 20, 2021, 7:15 AM IST

ಹೊಸದಿಲ್ಲಿ: ಒಂದು ಸೆಕೆಂಡ್‌ಗೆ 50,000 ಸಿನೆಮಾ ಡೌನ್‌ ಲೋಡ್‌…! ಹೌದು, ಜಪಾನ್‌ನ ರಾಷ್ಟ್ರೀಯ ಮಾಹಿತಿ, ಸಂಪರ್ಕ ತಂತ್ರಜ್ಞಾನ ಸಂಸ್ಥೆ ವಿಶ್ವದಾಖಲೆಯನ್ನೇ ಸೃಷ್ಟಿ ಮಾಡಿದ್ದು, ಒಂದು ಸೆಕೆಂಡ್‌ಗೆ 319 ಟೆರ್ರಾಬೈಟ್‌ ವೇಗವನ್ನು ದಾಖಲು ಮಾಡಿದೆ. ಇದು ಈಗಿರುವ ಇಂಟರ್ನೆಟ್‌ ವೇಗದ ದಾಖಲೆಯ ದುಪ್ಪಟ್ಟಾಗಿದೆ. ಇದುವರೆಗೆ ಲಂಡನ್‌ನ ಯೂನಿವರ್ಸಿಟಿ ಕಾಲೇಜು 178 ಟೆರ್ರಾಬೈಟ್‌ ವೇಗದ ವಿಶ್ವದಾಖಲೆ ಬರೆದಿತ್ತು.

ಏನಿದು ಇಂಟರ್ನೆಟ್‌ ವೇಗ?: ಇಂದಿನ ಆಧುನಿಕ ಯುಗದಲ್ಲಿ ಎಲ್ಲದಕ್ಕೂ ಈ ಇಂಟರ್ನೆಟ್‌ ವೇಗವೇ ಆಧಾರ. ನಮ್ಮ ಕೆಲಸಗಳು ಬೇಗನೆ ಆಗಬೇಕು ಎಂದಾದಲ್ಲಿ ಇಂಟರ್ನೆಟ್‌ ವೇಗ ಹೆಚ್ಚಾಗಿಯೇ ಇರಬೇಕು. ಇಂಟರ್ನೆಟ್‌ ಆರಂಭದ ಕಾಲದಲ್ಲಿ ಕೆಬಿಪಿಎಸ್‌ ನಲ್ಲಿ (ಪ್ರತೀ ಸೆಕೆಂಡಿಗೆ ಕಿಲೋಬೈಟ್‌)ಸಿಗುತ್ತಿತ್ತು. ಈಗ ಭಾರತದಲ್ಲಿ ಎಂಬಿಪಿಎಸ್‌ ನಲ್ಲಿ ವೇಗ ಸಿಗುತ್ತಿದೆ.

ಸಾಮಾನ್ಯವಾಗಿ ನಾವು ಡೌನ್‌ ಲೋಡ್‌ ಲೆಕ್ಕಾಚಾರದಲ್ಲಿ ಇಂಟರ್ನೆಟ್‌ ವೇಗವನ್ನು ಅಳೆಯುತ್ತೇವೆ. ಅಂದರೆ, ಒಂದು ಸಿನೆಮಾ ಡೌನ್‌ ಲೋಡ್‌ ಆಗಲು ಎಷ್ಟು ಸಮಯ ಬೇಕು ಎನ್ನುವ ಲೆಕ್ಕಾಚಾರದಲ್ಲಿ. ಈಗ 50 ಎಂಪಿಬಿಎಸ್‌ ಲೆಕ್ಕದಲ್ಲಿ ಒಂದು ಜಿಬಿ ಸಾಮರ್ಥ್ಯವಿರುವ ಒಂದು ಸಿನಿಮಾ ಡೌನ್‌ ಲೋಡ್‌ ಆಗಲು 3 ರಿಂದ 5 ನಿಮಿಷ ಸಾಕು. ಕೆಲವೊಮ್ಮೆ ಒಂದೇ ನಿಮಿಷಕ್ಕೂ ಡೌನ್‌ ಲೋಡ್‌ ಆಗಬಹುದು.

ಏನಿದು ಟಬಿಪಿಎಸ್‌?
ಜಪಾನ್‌ ನಲ್ಲಿ ಈಗ ಅಭಿವೃದ್ಧಿಪಡಿಸಿರುವ ಇಂಟರ್ನೆಟ್‌ ವೇಗವನ್ನು ಲೆಕ್ಕಕ್ಕೆ ಇರಿಸಿಕೊಳ್ಳುವುದಾದರೆ, ಒಂದು ಸೆಕೆಂಡ್‌ಗೆ ಸುಮಾರು 50 ಸಾವಿರ ಸಿನೆಮಾಗಳನ್ನು ಡೌನ್‌ ಲೋಡ್‌ ಮಾಡಬಹುದು. ಹಾಗೆಯೇ ನೆಟ್‌ ಫ್ಲಿಕ್ಸ್‌ ನಲ್ಲಿರುವ ಎಲ್ಲ ಸಿನೆಮಾಗಳನ್ನೂ ಒಂದೇ ಸೆಕೆಂಡ್‌ ನಲ್ಲಿ ನಿಮ್ಮ ಮೊಬೈಲ್‌ಗೆ ಡೌನ್‌ ಲೋಡ್‌ ಮಾಡಿಕೊಳ್ಳಬಹುದು! ಅಂದರೆ, 50 ಸಾವಿರ ಸಿನೆಮಾಗಳು ಒಂದೇ ಫೋಲ್ಡರ್‌ ನಲ್ಲಿದ್ದು, ಅದರ ಮೇಲೆ ಒಂದು ಕ್ಲಿಕ್‌ ಮಾಡಿದರೆ ಸಾಕು, ಅಷ್ಟೂ ಒಂದೇ ಬಾರಿಗೆ ನಿಮ್ಮ ಕಂಪ್ಯೂಟರ್‌ಗೆ ಬಂದು ಬೀಳುತ್ತವೆ.

ಲೆಕ್ಕಾಚಾರ
ಟೆರ್ರಾ ಬೈಟ್‌(ಟಿಬಿಪಿಎಸ್‌) ಅಂದರೆ 1000 ಗಿಗಾಬೈಟ್‌
1 ಗಿಗಾಬೈಟ್‌ ಎಂದರೆ 1025 ಮೆಗಾಬೈಟ್‌(ಎಂಬಿಪಿಎಸ್‌)

ಭಾರತದಲ್ಲಿನ ವೇಗ
ಬ್ರಾಂಡ್‌ ಬ್ಯಾಂಡ್‌ ಆಗಿದ್ದರೆ, 38.19 ಎಂಬಿಪಿಎಸ್‌
ಮೊಬೈಲ್‌ ಆಗಿದ್ದರೆ 12.16 ಎಂಬಿಪಿಎಸ್‌