ಶೇ. 80 ಜಪಾನೀಯರಿಂದಲೇ ಒಲಿಂಪಿಕ್ಸ್‌ ಗೆ ವಿರೋಧ!

Team Udayavani, May 18, 2021, 6:50 AM IST

ಟೋಕಿಯೊ: ಮುಂದೂಡಲ್ಪಟ್ಟ ಟೋಕಿಯೊ ಒಲಿಂಪಿಕ್ಸ್‌ ನಡೆದೀತೇ ಇಲ್ಲವೇ ಎಂಬುದು ಇನ್ನೂ ಪ್ರಶ್ನೆಯಾಗಿಯೇ ಉಳಿದಿದೆ. ಸಂಘಟಕರೇನೋ ಇದನ್ನು ನಡೆಸಿಯೇ ಸಿದ್ಧ ಎಂಬ ಉಮೇದಿನಲ್ಲಿದ್ದಾರೆ. ಆದರೆ ಕಳೆದ ಶುಕ್ರವಾರ ಜಪಾನ್‌ನಲ್ಲಿ ಕೊರೊನಾ ತುರ್ತುಸ್ಥಿತಿ ವಿಸ್ತರಿಸಿದ ಬಳಿಕ ಅಲ್ಲಿನ ಜನರಿಂದ ಈ ಕ್ರೀಡಾಕೂಟಕ್ಕೆ ಇನ್ನೂ ದೊಡ್ಡ ಮಟ್ಟದಲ್ಲಿ ವಿರೋಧ ವ್ಯಕ್ತವಾಗತೊಡಗಿದೆ.

ಸೋಮವಾರ ಇಲ್ಲಿನ “ಅಸಾಹಿ ಶಿಂಬುನ್‌’ ದೈನಿಕ ನಡೆಸಿದ ಸಮೀಕ್ಷೆಯೊಂದರಲ್ಲಿ ಶೇ. 43ರಷ್ಟು ಜಪಾನಿಯರು ಒಲಿಂಪಿಕ್ಸ್‌ ರದ್ದುಗೊಳಿಸಿ ಎಂದು ಆಗ್ರಹಿಸಿದ್ದಾರೆ. ಶೇ. 40 ಮಂದಿ ಇದನ್ನು ಮತ್ತೆ ಮುಂದೂಡುವುದೇ ಕ್ಷೇಮ ಎಂಬ ತೀರ್ಮಾನಕ್ಕೆ ಬಂದಿದ್ದಾರೆ. ಅಕಸ್ಮಾತ್‌ ಒಲಿಂಪಿಕ್ಸ್‌ ನಡೆದರೆ ವೀಕ್ಷಕರಿಗೆ ಅವಕಾಶ ಕಲ್ಪಿಸಬಾರದು ಎಂಬುದು ಶೇ. 59ರಷ್ಟು ಜಪಾನಿಯರ ಅನಿಸಿಕೆ.

ಹೆಚ್ಚಿದ “ವಿರೋಧಿ’ಗಳು
ಒಂದು ತಿಂಗಳ ಹಿಂದೆ ಇದೇ ಪತ್ರಿಕೆ ನಡಿಸಿದ ಸಮೀಕ್ಷೆಯಲ್ಲಿ ಶೇ. 35 ಮಂದಿ ಮಾತ್ರ ಒಲಿಂಪಿಕ್ಸ್‌ ರದ್ದುಗೊಳಿಸಿ ಎಂದು ಆಗ್ರಹಿಸಿದ್ದರು. ಈಗ ಇಂಥವರ ಸಂಖ್ಯೆಯಲ್ಲಿ ಹೆಚ್ಚಳವಾಗಿರುವುದನ್ನು ಗಮನಿಸಿಬಹುದು. ಜಪಾನ್‌ ಈಗ 4ನೇ ಕೊರೊನಾ ಅಲೆಯ ವಿರುದ್ಧ ಹೋರಾಡುತ್ತಿದೆ.

ಸ್ಪಷ್ಟ ನಿರ್ಧಾರ: ಫೆಡರರ್‌ ಆಗ್ರಹ
ಟೋಕಿಯೊ ಒಲಿಂಪಿಕ್ಸ್‌ ಬಗ್ಗೆ ಕ್ರೀಡಾಪಟುಗಳಿಗೆ ಸ್ಪಷ್ಟ ನಿರ್ಧಾರವೊಂದನ್ನು ತಿಳಿಸಬೇಕಾದುದು ಅತ್ಯಗತ್ಯ ಎಂಬುದಾಗಿ ಟೆನಿಸಿಗ ರೋಜರ್‌ ಫೆಡರರ್‌ ಗ್ರಹಿಸಿದ್ದಾರೆ. ಕ್ರೀಡಾಳುಗಳಲ್ಲಿ ಯಾವುದೇ ಗೊಂದಲ, ದ್ವಂದ್ವ ಇರಬಾರದು. ಇದರಿಂದ ಅವರ ಸಿದ್ಧತೆಯ ಮೇಲೆ ವ್ಯತಿರಿಕ್ತ ಪರಿಣಾಮ ಉಂಟಾಗುತ್ತದೆ ಎಂಬುದಾಗಿ ಫೆಡರರ್‌ ಹೇಳಿದರು.