ತನ್ನ ಕೋಳಿ ಮೊಟ್ಟೆ ಇಡುತ್ತಿಲ್ಲ ಎಂದು ಪೊಲೀಸರ ಮೊರೆ ಹೋದ ವ್ಯಕ್ತಿ

Team Udayavani, Apr 21, 2021, 8:42 PM IST

ಪುಣೆ : ತನ್ನ ಕೋಳಿಗಳು ಮೊಟ್ಟೆ ಇಡುತ್ತಿಲ್ಲ ಎಂಬ ಕಾರಣಕ್ಕೆ ಕೋಳಿ ಸಾಕಾಣೆ ಮಾಡುತ್ತಿದ್ದ ವ್ಯಕ್ತಿಯೊಬ್ಬ ಪೊಲೀಸ್ ಠಾಣೆ ಮೆಟ್ಟಿಲೇರಿರುವ ಘಟನೆ ಬೆಳಕಿಗೆ ಬಂದಿದೆ. ಮಹಾರಾಷ್ಟ್ರದ ಪುಣೆಯಲ್ಲಿ ಈ ಘಟನೆ ನಡೆದಿದ್ದು, ಆಹಾರ ಉತ್ಪಾದನಾ ಘಟಕವೊಂದರಿಂದ ಆಹಾರ ತಂದು ನನ್ನ ಕೋಳಿಗಳಿಗೆ ನೀಡಿದ್ದೆ. ಅದನ್ನು ತಿಂದ ನಂತರ ಕೋಳಿಗಳು ಮೊಟ್ಟೆ ಇಡುವುದನ್ನೇ ನಿಲ್ಲಿಸಿವೆ ಎಂದು ವ್ಯಕ್ತಿಯು ದೂರು ದಾಖಲಿಸಿದ್ದಾರೆ.

ಪುಣೆಯ ಅಹ್ಮದ್ ​ನಗರದ ಕೋಳಿ ಆಹಾರ ಉತ್ಪಾದನಾ ಕಂಪನಿ ವಿರುದ್ಧ ವ್ಯಕ್ತಿಯು ದೂರು ದಾಖಲಿಸಿದ್ದಾನೆ. ಕೇವಲ ಈ ವ್ಯಕ್ತಿಯ ಕೋಳಿಗಳು ಮಾತ್ರ ಮೊಟ್ಡೆ ಇಡುವುದನ್ನು ನಿಲ್ಲಿಸಿಲ್ಲ, ಪುಣೆಯ ಕೋಳಿ ಆಹಾರ ಉತ್ಪಾದನಾ ಘಟಕದಿಂದ ಮೇವು ತಂದು ಕೋಳಿಗೆ ಹಾಕಿದ್ದ ಎಲ್ಲಾ ಫಾರಂಗಳಲ್ಲಿಯೂ ಕೋಳಿ ಮೊಟ್ಟೆ ಇಡುವುದನ್ನೇ ನಿಲ್ಲಿಸಿವೆ.

ಈ ಆರೋಪ ಕೇಳಿ  ಬರುತ್ತಿದ್ದಂತೆ ಪುಣೆಯ ಆ ಆಹಾರ ಉತ್ಪಾದನಾ ಕಂಪನಿಯು ಕೋಳಿ ಸಾಕಾಣೆಗಾರರಿಗೆ ಪರಿಹಾರ ನೀಡುವುದಾಗಿ ತಿಳಿಸಿದೆ. ಈ ಕಾರಣದಿಂದ ಕೋಳಿ ಮೇವು ತಯಾರಿಕಾ ಕಂಪನಿಯ ವಿರುದ್ಧ ಎಫ್ ಐ ಆರ್ ದಾಖಲಾಗಿಲ್ಲ.

ಈ ಬಗ್ಗೆ ಪೊಲೀಸರು ಅಹ್ಮದ್ ​ನಗರದ ಪಶುಸಂಗೋಪನಾ ಅಧಿಕಾರಿಯನ್ನು ಭೇಟಿ ಮಾಡಿದ್ದರು. ಆ ಆಹಾರವನ್ನು ಇನ್ನೊಮ್ಮೆ ಪರೀಕ್ಷೆ ಕೂಡ ಮಾಡಲಾಗಿದೆ. ಕೆಲವು ಆಹಾರಗಳು ನಿರ್ದಿಷ್ಟ ತಳಿಯ ಕೋಳಿಗಳಿಗೆ ಹೊಂದಾಣಿಕೆ ಆಗುವುದಿಲ್ಲ. ಇದೊಂದು ಸಾಮಾನ್ಯ ವಿದ್ಯಮಾನ ಎಂದು ಪಶುಸಂಗೋಪನಾ ಅಧಿಕಾರಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.