Assault: ನಾಗಮಂಗಲದಲ್ಲಿ ಎಎಸ್‌ಐಯ ಹಿಡಿದು ಎಳೆದಾಡಿ, ಹಲ್ಲೆ ಮಾಡಿದ ಆರೋಪಿ!

Team Udayavani, Jan 6, 2025, 2:46 AM IST

ಮಂಡ್ಯ: ಕೆಲವು ದಿನಗಳ ಹಿಂದೆ ಪಾಂಡವಪುರ ಠಾಣೆಯಲ್ಲೇ ವ್ಯಕ್ತಿಯೋರ್ವ ಪೊಲೀಸ್‌ ಕಾನ್‌ಸ್ಟೆಬಲ್‌ಗೆ ಕಪಾಳಮೋಕ್ಷ ಮಾಡಿದ ಘಟನೆ ಮಾಸುವ ಮುನ್ನವೇ ನಾಗಮಂಗಲದ ಬೀದಿಯಲ್ಲಿ ಆರೋಪಿಯೊಬ್ಬ ಎಎಸ್‌ಐ ಮೇಲೆ ಹಲ್ಲೆ ಮಾಡಿರುವ ಘಟನೆ ನಡೆದಿದೆ.

ಕಸಬಾ ಹೋಬಳಿಯ ಮಜ್ಜನಕೊಪ್ಪಲು ಗ್ರಾಮದ ಮರಿಯಮ್ಮ ಎಂಬ ವೃದ್ಧೆ ತನ್ನ ಮಗ ಪೂಜಾರಿ ಕೃಷ್ಣ ದಿನನಿತ್ಯ ಕಿರುಕುಳ ನೀಡುತ್ತಿದ್ದು, ನ್ಯಾಯ ಒದಗಿಸಿ ಎಂದು ನಾಗಮಂಗಲ ಗ್ರಾಮಾಂತರ ಠಾಣೆಗೆ ದೂರು ಸಲ್ಲಿಸಿದ್ದರು. ಬಳಿಕ ಎಎಸ್‌ಐ ರಾಜು ಅವರು ಟಿ.ಬಿ. ಬಡಾವಣೆ ಜ್ಯೂಸ್‌ ಅಂಗಡಿಯೊಂದರ ಮುಂದೆ ಆರೋಪಿ ಕೃಷ್ಣ ನಿಂತಿರುವುದನ್ನು ಗಮನಿಸಿ ವಿಚಾರಣೆಗೆ ಠಾಣೆಗೆ ಬಾ ಎಂದು ಹೇಳಿದರು.

ಆಗ ಎಎಸ್‌ಐಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿದ ಕೃಷ್ಣ, ಎಎಸ್‌ಐಯನ್ನು ತಳ್ಳಿ ಕೆಳಗೆ ಬೀಳಿಸಿ ಕಲ್ಲಿನಿಂದ ಹೊಡೆಯಲು ಮುಂದಾದನು. ಆಗ ಸಾರ್ವಜನಿಕರು ಕೃಷ್ಣನನ್ನು ಹಿಡಿದು ಪೊಲೀಸರ ವಶಕ್ಕೆ ಒಪ್ಪಿಸಿದರು.