ಚಿಮಿಣಿ ದೀಪದ ಬೆಳಕಿನ ಸಾಧಕಿ ಅಕ್ಷಿತಾ ಹೆಗ್ಡೆಗೆ ಜ. 14 ರಂದು ಮನೆ ಹಸ್ತಾಂತರ

Team Udayavani, Dec 20, 2020, 10:53 AM IST

ಶಿರ್ವ: ಚಿಮಿಣಿ ದೀಪದ ಬೆಳಕಿನಲ್ಲಿ ಓದಿ ಸಾಧನೆಗೈದ ಸಾಧಕಿ ಅಕ್ಷಿತಾ ಹೆಗ್ಡೆ ಅವರಿಗೆ ದಾನಿಗಳ ನೆರವಿನಿಂದ ಕೊಲ್ಲಬೆಟ್ಟು ರವೀಂದ್ರ ಶೆಟ್ಟಿ ನೇತೃತ್ವದಲ್ಲಿ ಸುಮಾರು 8.5 ಲ.ರೂ. ವೆಚ್ಚದಲ್ಲಿ ಶಿರ್ವ ಎಂಎಸ್‌ಆರ್‌ಎಸ್‌ ಕಾಲೇಜು ಬಳಿ ನೂತನ ಮನೆ ನಿರ್ಮಾಣಗೊಳ್ಳುತ್ತಿದ್ದು, ಜ. 14ರಂದು ಗೃಹಪ್ರವೇಶ ಮತ್ತು ಮನೆ ಹಸ್ತಾಂತರ ಕಾರ್ಯಕ್ರಮ ನಡೆಯಲಿದೆ.

ಅಕ್ಷಿತಾ ಅವರ ಅಸಹಾಯಕ ಪರಿಸ್ಥಿತಿಯ ಕುರಿತು 2018ರ ಜು. 24ರಂದು ಉದಯವಾಣಿ ಮುಖಪುಟದಲ್ಲಿ ವರದಿ ಪ್ರಕಟಿಸಿತ್ತು. ಅಮೆರಿಕದ ಉದ್ಯಮಿ ಪಿಲಾರು ಸಂತೋಷ್‌ ಶೆಟ್ಟಿ, ಅಟ್ಟಿಂಜೆ ಪ್ರದೀಪ್‌ ಶಂಭು ಶೆಟ್ಟಿ, ಶಿರ್ವ ನಡಿಬೆಟ್ಟು ಸಂಗೀತಾ ಹೆಗ್ಡೆ ಮತ್ತು ಶಿರ್ವ ಎಂಎಸ್‌ಆರ್‌ಎಸ್‌ ಕಾಲೇಜು ಅಲುಮ್ನಿ ಅಸೋಸಿಯೇಶನ್‌ ಮುಂಬಯಿ ಅವರು ವರದಿ ಪ್ರಕಟಗೊಂಡ ದಿನವೇ ನೆರವಿನ ಭರವಸೆ ನೀಡಿದ್ದರು.

ಮನೆ ನಿರ್ಮಿಸಲು 4 ಲ.ರೂ. ಮೌಲ್ಯದ ಜಮೀನನ್ನು ಸ್ಥಳೀಯ ದಾನಿಗಳು ನೀಡಿದ್ದು, 2018ರ ಡಿ. 13ರಂದು ಮನೆ ನಿರ್ಮಾಣಕ್ಕೆ ಅಡಿಗಲ್ಲು ಹಾಕಲಾಗಿತ್ತು. ಆದರೆ ಜಮೀನು ದಾಖಲೆಯ ಬಗ್ಗೆ ಕಂದಾಯ ಇಲಾಖೆಯ ಕೆಲವು ತಾಂತ್ರಿಕ ತೊಂದರೆ ಹಾಗೂ ಕೊರೊನಾ ಲಾಕ್‌ಡೌನ್‌ನಿಂದಾಗಿ ಮನೆ ನಿರ್ಮಾಣ ಕಾರ್ಯದಲ್ಲಿ ವಿಳಂಬವಾಗಿತ್ತು. ಬೋರ್‌ವೆಲ್‌ನೊಂದಿಗೆ ಆವರಣ ಗೋಡೆಯನ್ನು ನಿರ್ಮಿಸಲಾಗಿದೆ. ಸ್ಥಳೀಯರು ಕೂಡ ಮನೆ ನಿರ್ಮಾಣ ಕಾರ್ಯದಲ್ಲಿ ಸಹಕರಿಸಿದ್ದಾರೆ.