ಅಂಬಿ 67 ನೇ ಹುಟ್ಟುಹಬ್ಬ,ಮಂಡ್ಯದಲ್ಲಿ ಸ್ವಾಭಿಮಾನಿ ವಿಜಯೋತ್ಸವ

Team Udayavani, May 29, 2019, 11:11 AM IST

ಮಂಡ್ಯ: ಮಂಡ್ಯದ ಗಂಡು, ರೆಬೆಲ್‌ ಸ್ಟಾರ್‌ ಅಂಬರೀಶ್‌ ಅವರ 67ನೇ ಜಯಂತಿ ಯನ್ನುಬುಧವಾರ ಮೇ 29 ರಂದು ರಾಜ್ಯದ ವಿವಿಧೆಡೆ ಆಚರಿಸಿ ನೆಚ್ಚಿನ ನಟನನ್ನು ನೆನಪಿಸಿಕೊಳ್ಳಲಾಗುತ್ತಿದೆ.
ಇನ್ನೊಂದೆಡೆ ಸ್ವಾಭಿಮಾನಿ ವಿಜಯೋತ್ಸವ ಕಾರ್ಯಕ್ರಮವನ್ನು ಮಂಡ್ಯ ನಗರದ ಸಿಲ್ವರ್‌ ಜ್ಯೂಬಿಲಿ ಉದ್ಯಾನದಲ್ಲಿ ನಡೆಸಲಾಗುತ್ತಿದೆ.

ಅಖೀಲ ಕರ್ನಾಟಕ ಅಂಬರೀಶ್‌ ಅಭಿಮಾನಿಗಳ ಸಂಘದ ವತಿಯಿಂದಅಂಬರೀಶ್‌ ಅವರ ಹುಟ್ಟು ಹಬ್ಬಆಚರಿಸಲಾಗುತ್ತಿದೆ.

ಬೆಂಗಳೂರಿನ ಅಂಬರೀಶ್‌ ಸಮಾಧಿ ಬಳಿ ಅಭಿಮಾನಿಗಳು, ಅಂಬರೀಶ್‌ ಅಪ್ತರು, ಪತ್ನಿ ಸಂಸದೆ ಸುಮಲತಾ, ಪುತ್ರ ಅಭಿಷೇಕ್‌ ಸೇರಿದಂತೆ ಗಣ್ಯರು ವಿಶೇಷ ಪೂಜೆ ಸಲ್ಲಿಸಿದರು.

ಸಮಾಧಿ ಬಳಿ ರಕ್ತ ದಾನ ಹಾಗೂ ಉಚಿತ ಆರೋಗ್ಯ ತಪಾಸಣಾ ಶಿಬಿರ ಆಯೋ ಜಿಸಲಾಗುತ್ತಿದ್ದು ಸಾವಿರಾರು ಮಂದಿ ಜಮಾಯಿಸಿದ್ದಾರೆ.

ಮಧ್ಯಾಹ್ನ ಸುಮಲತಾ ಅವರು ನಗರದ ಕಾಳಿಕಾಂಬ ದೇವಾಲಯಕ್ಕೆ ಬಂದು ವಿಶೇಷ ಪೂಜೆ ಸಲ್ಲಿಸಿ ಸಿಲ್ವರ್‌ ಜ್ಯೂಬಿಲಿ ಉದ್ಯಾನದಲ್ಲಿ ವೇದಿಕೆ ಕಾರ್ಯಕ್ರಮಕ್ಕೆ ತೆರಳಲಿದ್ದಾರೆ.

ಈ ಕಾರ್ಯಕ್ರಮದಲ್ಲಿ ಅಭಿಷೇಕ್‌ ಅಂಬರೀಶ್‌, ಚಿತ್ರ ನಟರಾದ ದರ್ಶನ್‌, ಯಶ್‌, ದೊಡ್ಡಣ್ಣ, ನಿರ್ಮಾ  ಪಕ ರಾಕ್‌ಲೈನ್‌ ವೆಂಕಟೇಶ್‌ ಮುಂತಾದವರು ಭಾಗಿಯಾಗಲಿದ್ದಾರೆ.

ಧಾರವಾಡ ಪೇಡದ ಸವಿನೆನಪಿನ ಸವಿ

ಬೆಳಗಾವಿಯ ಹೊಟೇಲ್‌ ಉದ್ಯಮಿ, ಅಂಬರೀಶ್‌ ಅಭಿಮಾನಿಯಾಗಿರುವ ನಾರಾಯಣ ಕಲಾಲ್‌ ಅವರು ಮಂಡ್ಯ ಕ್ಕೆ4 ಸಾವಿರ ಪ್ಯಾಕೆಟ್‌ಗಳಲ್ಲಿ 4 ಕ್ವಿಂಟಾಲ್‌ನಷ್ಟು ಧಾರವಾಡ ಪೇಡಗಳನ್ನು ಕಳುಹಿಸಿದ್ದಾರೆ. ಪೇಡಗಳನ್ನು ಸಮಾವೇಶದಲ್ಲಿ ಪಾಲ್ಗೊಂಡವರಿಗೆ ಹಂಚಲಾಗುತ್ತಿದೆ.

ವ್ಯಾಪಕ ಭದ್ರತೆ
ಮಂಡ್ಯದ ಸ್ವಾಭಿಮಾನಿ ಸಮಾವೇಶ ಸ್ಥಳದಲ್ಲಿ ವ್ಯಾಪಕ ಭದ್ರತೆಗಳನ್ನು ಕೈಗೊಳ್ಳಲಾಗಿದೆ. ಪೊಲೀಸ್‌ ತುಕಡಿಗಳನ್ನು ನಿಯೋಜಿಸಿ ಬಿಗಿ ಭದ್ರತೆ ಕೈಗೊಳ್ಳಲಾಗಿದೆ.