America: ಡಾಲರ್‌ಗೆ ಪರ್ಯಾಯ ಕರೆನ್ಸಿ ಬಳಸಿದರೆ ಹುಷಾರ್‌: ಡೊನಾಲ್ಡ್‌ ಟ್ರಂಪ್‌

ಭಾರತ ಸೇರಿ ಬ್ರಿಕ್ಸ್‌ ರಾಷ್ಟ್ರಗಳಿಗೆ ಟ್ರಂಪ್‌ ಎಚ್ಚರಿಕೆ, ಸರಕುಗಳಿಗೆ ಶೇ.100 ಸುಂಕ ವಿಧಿಸುವ ಬೆದರಿಕೆ

Team Udayavani, Dec 2, 2024, 6:55 AM IST

ವಾಷಿಂಗ್ಟನ್‌: ಅಮೆರಿಕದ ಡಾಲರ್‌ಗೆ ಪರ್ಯಾಯವಾಗಿ ಯಾವುದೇ ಕರೆನ್ಸಿಯನ್ನು ಸೃಷ್ಟಿಸುವುದು ಅಥವಾ ಬೆಂಬಲಿಸುವುದೋ ಮಾಡಿದರೆ ಭಾರತವನ್ನೂ ಸೇರಿದಂತೆ ಎಲ್ಲಾ ಬ್ರಿಕ್ಸ್‌ ರಾಷ್ಟ್ರಗಳ ಉತ್ಪನ್ನಗಳ ಮೇಲೆ ಶೇ.100ರಷ್ಟು ಸುಂಕ ವಿಧಿಸುವುದಾಗಿ ಅಮೆರಿಕದ ನಿಯೋಜಿತ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಎಚ್ಚರಿಸಿದ್ದಾರೆ.

ಬ್ರಿಕ್ಸ್‌ ರಾಷ್ಟ್ರಗಳ ನಡುವಿನ ವಹಿವಾಟಿಗಾಗಿ “ಬ್ರಿಕ್ಸ್‌ ಕರೆನ್ಸಿ’ ರೂಪಿಸುವ ಬಗ್ಗೆ ಅಕ್ಟೋಬರ್‌ನಲ್ಲಿ ನಡೆದ ಶೃಂಗದಲ್ಲಿ ಸದಸ್ಯ ರಾಷ್ಟ್ರಗಳು ಚರ್ಚಿಸಿದ್ದವು. ಅದನ್ನು ಕಾರ್ಯಗತಗೊಳಿಸಲು ಚೀನಾ ಮತ್ತು ಬ್ರೆಜಿಲ್‌ ಉತ್ಸಾಹ ತೋರಿರುವಂತೆಯೇ ಟ್ರಂಪ್‌ ಈ ಎಚ್ಚರಿಕೆ ನೀಡಿ ರುವುದು ಮಹತ್ವ ಪಡೆದಿದೆ.

ಸಾಮಾಜಿಕ ಜಾಲತಾಣದಲ್ಲಿ ಈ ಬಗ್ಗೆ ಪೋಸ್ಟ್‌ ಮಾಡಿರುವ ಟ್ರಂಪ್‌, “ಬ್ರಿಕ್ಸ್‌ ರಾಷ್ಟ್ರಗಳು ಯುಎಸ್‌ ಕರೆನ್ಸಿಯಿಂದ ದೂರವಾಗಲು ಚಿಂತನೆ ನಡೆಸುತ್ತಿದ್ದರೂ ಅದನ್ನೆಲ್ಲಾ ನಿಂತು ನೋಡುವ ಕಾಲ ಮುಗಿದು ಹೋಯ್ತು. ಬ್ರಿಕ್ಸ್‌ ರಾಷ್ಟ್ರಗಳು ಇಂಥ ಯಾವುದೇ ಪ್ರಯತ್ನ ಮಾಡುವುದಿಲ್ಲ ಎಂದು ಖಾತರಿ ನೀಡಬೇಕು.

ಇಲ್ಲದಿದ್ದರೆ ಅವರ ಮೇಲೆ ಶೇ.100ರ ಸುಂಕ ವಿಧಿಸುವುದು ಖಚಿತ. ಅವರು ಅಮೆರಿಕದ ಜತೆಗಿನ ವಹಿವಾಟಿಗೆಲ್ಲಾ ಗುಡ್‌ ಬೈ ಹೇಳಿ, ಬೇರೆ ಯಾರನ್ನಾದರೂ ಹುಡುಕಿಕೊಳ್ಳಬೇಕಾಗುತ್ತದೆ. ಅಂತಾರಾಷ್ಟ್ರೀಯ ವ್ಯಾಪಾರದಲ್ಲಿ ಡಾಲರ್‌ ಅನ್ನು ಬ್ರಿಕ್ಸ್‌ ಬದಲಿಸುವುದಂತೂ ಅಸಾಧ್ಯ. ಯಾವುದೇ ರಾಷ್ಟ್ರ ಇದನ್ನು ಮಾಡಿದರೂ ಅದು ಅಮೆರಿಕದ ಜತೆಗೆ ಸಂಬಂಧ ಕಡಿದುಕೊಳ್ಳಬೇಕಾಗುತ್ತದೆ’ ಎಂದಿದ್ದಾರೆ.

ಸುಂಕ ಹೆಚ್ಚಾದರೆ ಭಾರತಕ್ಕೇನು ಕೆಡಕು?
ಬ್ರಿಕ್ಸ್‌ ಕರೆನ್ಸಿ ಪ್ರಸ್ತಾಪದಲ್ಲಿ ಭಾರತ ನಿರ್ಲಿಪ್ತ ನೀತಿ ಅನುಸರಿಸಿದ್ದು, ಈವರೆಗೆ ಯಾವುದೇ ಸಮ್ಮತಿಯನ್ನೂ ನೀಡಿಲ್ಲ. ಆದಾಗ್ಯೂ, ಟ್ರಂಪ್‌ ಬ್ರಿಕ್ಸ್‌ನ ಎಲ್ಲಾ ರಾಷ್ಟ್ರಗಳಿಗೂ ಶೇ.100ರ ಸುಂಕ ವಿಧಿಸಿದರೆ ಭಾರತದ ಫಾರ್ಮಾಸುಟಿಕಲ್‌, ಐಟಿ ಸೇವೆ ಹಾಗೂ ಜವಳಿ ಕ್ಷೇತ್ರ ಸೇರಿದಂತೆ ಹಲವು ಕ್ಷೇತ್ರಗಳ ರಫ್ತುದಾರರು ತೊಂದರೆ ಎದುರಿಸಬೇಕಾಗುತ್ತದೆ.

ಭಾರತದ ವಿವಿಧ ಕ್ಷೇತ್ರಗಳ ಅಪಾರ ಪ್ರಮಾಣದ ವಸ್ತು ಅಮೆರಿಕಕ್ಕೆ ರಫ್ತಾಗುತ್ತಿದ್ದು, ಅಮೆರಿಕವು ಭಾರತದ ಪ್ರಮುಖ ವ್ಯಾಪಾರ ಪಾಲುದಾರನಾಗಿದೆ. ಈ ನೀತಿ ಜಾರಿಯಾದರೆ ಭಾರತದ ರಫ್ತುದಾರರಿಗೆ ವೆಚ್ಚ ಹೆಚ್ಚಾಗುವುದರ ಜತೆಗೆ ಅಮೆರಿಕ ಮಾರುಕಟ್ಟೆಯಲ್ಲಿ ಭಾರ ತದ ಉತ್ಪ ನ್ನ ಗಳು ಸ್ಪರ್ಧೆಯಿಂದ ಹಿಂದುಳಿಯಬೇಕಾಗಬಹುದು.