Asia Cup Cricket: ಅಂಡರ್‌-19 ಏಷ್ಯಾ ಕಪ್‌ ಕ್ರಿಕೆಟ್‌: ಸೆಮಿಫೈನಲ್‌ ಪ್ರವೇಶಿಸಿದ ಭಾರತ

Team Udayavani, Dec 5, 2024, 3:14 AM IST

ಶಾರ್ಜಾ: ನಿರ್ಣಾಯಕ ಪಂದ್ಯದಲ್ಲಿ ಯುಎಇಯನ್ನು 10 ವಿಕೆಟ್‌ಗಳಿಂದ ಬಗ್ಗುಬಡಿದ ಭಾರತ, ಅಂಡರ್‌-19 ಏಷ್ಯಾ ಕಪ್‌ ಕ್ರಿಕೆಟ್‌ ಪಂದ್ಯಾವಳಿಯ ಸೆಮಿಫೈನಲ್‌ ಪ್ರವೇಶಿಸುವಲ್ಲಿ ಯಶಸ್ವಿಯಾಗಿದೆ.

ಯುಎಇ 44 ಓವರ್‌ಗಳಲ್ಲಿ 137ಕ್ಕೆ ಕುಸಿದರೆ, ಭಾರತ ಕೇವಲ 16.1 ಓವರ್‌ಗಳಲ್ಲಿ ವಿಕೆಟ್‌ ನಷ್ಟವಿಲ್ಲದೆ 143 ರನ್‌ ಬಾರಿಸಿತು. ಕಳೆದ ಐಪಿಎಲ್‌ ಹರಾಜಿನ ವೇಳೆ ಕೋಟಿ ಮೊತ್ತಕ್ಕೆ ಮಾರಾಟವಾಗಿದ್ದ 13 ವರ್ಷದ ವೈಭವ್‌ ಸೂರ್ಯವಂಶಿ ಬ್ಯಾಟಿಂಗ್‌ ಮಿಂಚು ಹರಿಸಿದರು. ಅವರದು 46 ಎಸೆತಗಳಿಂದ ಅಜೇಯ 76 ರನ್‌ ಸಾಹಸ. ಸಿಡಿಸಿದ್ದು 3 ಬೌಂಡರಿ ಹಾಗೂ 6 ಸಿಕ್ಸರ್‌. ಆರನೇ ಸಿಕ್ಸರ್‌ ಸಿಡಿಸುವ ಮೂಲಕ ಭಾರತದ ಗೆಲುವನ್ನು ಸಾರಿದರು. ಮತ್ತೋರ್ವ ಆರಂಭಕಾರ ಆಯುಷ್‌ ಮ್ಹಾತ್ರೆ 51 ಎಸೆತಗಳಿಂದ 67 ರನ್‌ ಚಚ್ಚಿದರು (4 ಬೌಂಡರಿ, 4 ಸಿಕ್ಸರ್‌).

ಭಾರತದ ಬೌಲಿಂಗ್‌ ಸರದಿಯಲ್ಲಿ ಮಿಂಚಿದವರೆಂದರೆ ಯುಧಾಜಿತ್‌ ಗುಹಾ (15ಕ್ಕೆ 3), ಚೇತನ್‌ ಶರ್ಮ ಮತ್ತು ಹಾರ್ದಿಕ್‌ ರಾಜ್‌ (ತಲಾ 2 ವಿಕೆಟ್‌). ಕೆ.ಪಿ. ಕಾರ್ತಿಕೇಯ ಮತ್ತು ಆಯುಷ್‌ ಮ್ಹಾತ್ರೆ ತಲಾ ಒಂದು ವಿಕೆಟ್‌ ಉರುಳಿಸಿದರು. ಯುಎಇ ಪರ 35 ರನ್‌ ಮಾಡಿದ ರಯಾನ್‌ ಖಾನ್‌ ಅವರದೇ ಹೆಚ್ಚಿನ ಗಳಿಕೆ.
ಬುಧವಾರದ ಇನ್ನೊಂದು ಲೀಗ್‌ ಪಂದ್ಯದಲ್ಲಿ ಪಾಕಿಸ್ಥಾನ 180 ರನ್ನುಗಳಿಂದ ಜಪಾನ್‌ಗೆ ಸೋಲುಣಿಸಿತು.

ಭಾರತ-ಶ್ರೀಲಂಕಾ ಸೆಮಿಫೈನಲ್‌
ಶುಕ್ರವಾರ ನಡೆಯುವ ಸೆಮಿಪೈನಲ್‌ನಲ್ಲಿ ಭಾರತ-ಶ್ರೀಲಂಕಾ ಮುಖಾಮುಖೀ ಆಗಲಿವೆ (ಶಾರ್ಜಾ). “ಎ’ ವಿಭಾಗದಲ್ಲಿ ಪಾಕಿಸ್ಥಾನ ಮೂರೂ ಪಂದ್ಯಗಳನ್ನು ಜಯಿಸಿದ್ದು, ಸೆಮಿಫೈನಲ್‌ನಲ್ಲಿ ಬಾಂಗ್ಲಾದೇಶವನ್ನು ಎದುರಿಸಲಿದೆ (ದುಬಾೖ). ಎರಡೂ ಪಂದ್ಯಗಳು ಬೆಳಗ್ಗೆ 10.30ಕ್ಕೆ ಆರಂಭವಾಗಲಿವೆ.