Assembly Election: ಝಾರ್ಖಂಡ್‌: ಬುಡಕಟ್ಟು ಮತ ಗೆಲ್ಲಬಲ್ಲದೇ ಬಿಜೆಪಿ?

Team Udayavani, Nov 11, 2024, 7:28 AM IST

ಕಳೆದ 5 ವರ್ಷಗಳಿಂದ ಝಾರ್ಖಂಡ್‌ನ‌ಲ್ಲಿ ಅಧಿಕಾರದಲ್ಲಿ­ರುವ ಕಾಂಗ್ರೆಸ್‌ ಮೈತ್ರಿಕೂಟದ ಜೆಎಂಎಂ ಪಕ್ಷಕ್ಕೆ ಈ ಬಾರಿ ಅಧಿಕಾರ ಉಳಿಸಿಕೊಳ್ಳಬೇಕಾದ ಸವಾಲು ಎದುರಾಗಿದೆ. 2019ರಲ್ಲಿ ಉಂಟಾದ ಸೋಲಿಗೆ ಸೇಡು ತೀರಿಸಿಕೊಳ್ಳಲು ಬಿಜೆಪಿ ಮೈತ್ರಿಕೂಟ ಮುಂದಾಗಿದೆ. ಕಳೆದೆರಡು ಚುನಾವಣೆಯಲ್ಲಿ ಜೆಎಂಎಂ ಕೈಹಿಡಿದಿದ್ದ ಬುಡಕಟ್ಟು ಜನಾಂಗದ ಮತ ಗೆಲ್ಲಲು ಬಿಜೆಪಿ ಯೋಜನೆ ರೂಪಿಸಿದೆ. ಹೀಗಾಗಿ 2 ಮೈತ್ರಿಕೂಟಗಳ ನಡುವೆ ಭಾರೀ ಪೈಪೋಟಿ ಎದುರಾಗುವ ನಿರೀಕ್ಷೆ ಇದೆ.

ನ.13, 20ರಂದು 2 ಹಂತದಲ್ಲಿ ಝಾರ್ಖಂಡ್‌ನ‌ಲ್ಲಿ ಈ ಬಾರಿ ವಿಧಾನಸಭೆ ಚುನಾವಣೆ ನಡೆಯಲಿದೆ. ನ.23ರಂದು ಫ‌ಲಿತಾಂಶ ಘೋಷಣೆಯಾಗಲಿದೆ. ಮೊದಲ ಹಂತದಲ್ಲಿ 43 ಕ್ಷೇತ್ರಗಳಿಗೆ ಹಾಗೂ 2ನೇ ಹಂತದಲ್ಲಿ 38 ಕ್ಷೇತ್ರಗಳಿಗೆ ಚುನಾವಣೆ ನಡೆಯಲಿದೆ. 81 ಸ್ಥಾನಗಳ ವಿಧಾನಸಭೆಯಲ್ಲಿ ಬಹುಮತಕ್ಕೆ 41 ಸ್ಥಾನಗಳ ಅವಶ್ಯಕತೆ ಇದೆ. ಪ್ರಸ್ತುತ ಅಧಿಕಾರದಲ್ಲಿರುವ ಮಹಾಘಟಬಂಧನ್‌ನಲ್ಲಿ ಝಾರ್ಖಂಡ್‌ ಮುಕ್ತಿ ಮೋರ್ಚಾ, ಕಾಂಗ್ರೆಸ್‌, ರಾಷ್ಟ್ರೀಯ ಜನತಾದಳ ಮತ್ತು ಕಮ್ಯುನಿಷ್ಟ್ ಪಕ್ಷಗಳಿವೆ. ಉಳಿದಂತೆ ಎನ್‌ಡಿಎ ಮೈತ್ರಿಕೂಟದಲ್ಲಿ ಬಿಜೆಪಿ, ಆಲ್‌ ಝಾರ್ಖಂಡ್‌ ಸ್ಟೂಡೆಂಟ್‌ ಯೂನಿಯನ್‌, ಜನತಾದಳ, ಲೋಕ ಜನಶಕ್ತಿ ಪಕ್ಷಗಳಿವೆ.

ಮೇಲ್ನೋಟಕ್ಕೆ ಝಾರ್ಖಂಡ್‌ ವಿಧಾನಸಭೆ ಚುನಾವಣೆ ಈ 2 ಮೈತ್ರಿಕೂಟಗಳ ನಡುವಿನ ಹಣಾಹಣಿ ಎನಿಸಿಕೊಂಡರೂ ಹೆಚ್ಚಿನ ಸಂಖ್ಯೆಯಲ್ಲಿರುವ ಸ್ಥಳೀಯ ಪಕ್ಷಗಳನ್ನು ಮರೆಯುವಂತಿಲ್ಲ. ಈ ಪಕ್ಷಗಳಿಂದ ಈ ಹಿಂದಿನ ಚುನಾವಣೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಅಭ್ಯರ್ಥಿಗಳು ಗೆದ್ದಿಲ್ಲದಿದ್ದರೂ, ಈ ಎರಡೂ ಪ್ರಮುಖ ಮೈತ್ರಿ­ಕೂಟಗಳಿಗೆ ತೊಂದರೆ ಒಡ್ಡಬಲ್ಲಷ್ಟು ಮತದ ಪ್ರಮಾಣ­ನ್ನಂತೂ ಕಿತ್ತುಕೊಂಡಿವೆ. ಸುಮಾರು 10ಕ್ಕೂ ಹೆಚ್ಚು ಸ್ಥಳೀಯ ಪಕ್ಷಗಳಿದ್ದು, ಕಳೆದ ಚುನಾವಣೆಯಲ್ಲಿ ಇವು ಯಾರೊಂದಿಗೂ ಮೈತ್ರಿ ಮಾಡಿಕೊಂಡಿರಲಿಲ್ಲ.

ಸಿಎಂ ಜೈಲಿಗೆ ಹೋಗಿದ್ದೇ ಬಿಜೆಪಿ ಅಸ್ತ್ರ
ಝಾರ್ಖಂಡ್‌ ವಿಧಾನಸಭೆಯಲ್ಲಿ ಜನರನ್ನು ಸೆಳೆಯಲು ಈ ಬಾರಿ ಬಿಜೆಪಿ ತನ್ನ ಬತ್ತಳಿಕೆ ತುಂಬಾ ಬಾಣಗಳನ್ನು ತುಂಬಿಸಿಕೊಂಡೇ ಬಂದಿದೆ. ಚುನಾವಣೆ ಘೋಷಣೆ ಯಾಗುವುದಕ್ಕೂ ಮೊದಲೇ ಸರಕಾರದ ವಿರುದ್ಧ ತನ್ನ ಬಳಿ ಇರುವ ಬಾಣಗಳನ್ನು ನಿರಂತರವಾಗಿ ಪ್ರಯೋಗಿಸತ್ತಲೇ ಇದೆ. ಇದು ಜನರ ಮನಸ್ಸಿಗೆ ಸರಿಯಾಗಿ ನಾಟಿದರೆ ಈ ಬಾರಿ ಬಿಜೆಪಿ ಮೈತ್ರಿಕೂಟ ಅಧಿಕಾರದ ಗದ್ದುಗೆ ಹಿಡಿಯುವ ಹಾದಿ ಸರಳವಾಗಲಿದೆ.

ಹಾಲಿ ಮುಖ್ಯಮಂತ್ರಿ ಹೇಮಂತ್‌ ಸೊರೇನ್‌ ಭ್ರಷ್ಟಾ ಚಾರ ಪ್ರಕರಣದಲ್ಲಿ ಜೈಲಿಗೆ ಹೋಗಿ ಬಂದಿದ್ದು, ಬಿಜೆಪಿಯ ಪ್ರಮುಖ ಅಸ್ತ್ರವಾಗಿದೆ. ಎಲ್ಲ ಪ್ರಚಾರ ವೇದಿಕೆಗಳಲ್ಲೂ ಬಿಜೆಪಿ ಹಾಗೂ ಅದರ ಮೈತ್ರಿ ಪಕ್ಷಗಳು ಈ ವಿಷಯವನ್ನು ಬಳಸಿ ಕೊಂಡಿವೆ. ಇದಲ್ಲದೇ ಸರಕಾರದ ಜನ ವಿರೋಧಿ ನೀತಿ, ಭ್ರಷ್ಟಾಚಾರ, ರಾಜ್ಯದಲ್ಲಿ ಹೆಚ್ಚುತ್ತಿರುವ ಬಾಂಗ್ಲಾದೇಶಿ ಒಳನುಸುಳುಕೋರರ ಭೀತಿ, ಮುಖ್ಯಮಂತ್ರಿ ಹೇಮಂತ್‌ ವಿರುದ್ಧದ ಪ್ರಕರಣ ಮುಂತಾದವುಗಳ ಬಗ್ಗೆ ನಿರಂತರವಾಗಿ ಬಿಜೆಪಿ ಪ್ರಚಾರ ಮತ್ತು ಪ್ರತಿಭಟನೆ ಮಾಡುತ್ತಿರು­ವುದು ಅವರಿಗೆ ಮುನ್ನಡೆ ತಂದುಕೊಡುವ ಸಾಧ್ಯತೆ ಇದೆ.

28 ಎಸ್‌ಟಿ ಸ್ಥಾನವೇ ಬಿಜೆಪಿಯ ಆತಂಕ
81 ಕ್ಷೇತ್ರಗಳ ರಾಜ್ಯ ವಿಧಾನಸಭೆಯಲ್ಲಿ 28 ಸ್ಥಾನಗಳು ಪರಿಶಿಷ್ಟ ಸಮುದಾಯಕ್ಕೆ ಮೀಸಲಾದ ಕ್ಷೇತ್ರಗಳಾಗಿವೆ. ಈ ಕ್ಷೇತ್ರಗಳಲ್ಲಿ ಕಾಂಗ್ರೆಸ್‌ ಹಾಗೂ ಜೆಎಂಎಂನ ಹೇಮಂತ್‌ ಸೊರೇನ್‌ ಹೆಚ್ಚು ಪ್ರಬಲರು ಎನಿಸಿಕೊಂಡಿದ್ದಾರೆ. ಅಲ್ಲದೇ ಹೇಮಂತ್‌ ಬಂಧನಕ್ಕೆ ಬಿಜೆಪಿ ನೇರ ಕಾರಣ ಎಂದು ಹೇಳುವ ಮೂಲಕ ಹೆಚ್ಚು ಮತ ಪಡೆಯಬಹುದು ಎಂಬುದು ಬಿಜೆಪಿಯ ಆತಂಕಕ್ಕೆ ಕಾರಣವಾಗಿದೆ. ಅಲ್ಲದೇ ಕಾಂಗ್ರೆಸ್‌ನ ವೋಟ್‌ಬ್ಯಾಂಕ್‌ ಎನಿಸಿ­ಕೊಂ­ಡಿ­ರುವ ಬುಡಕಟ್ಟು ಸಮುದಾಯವೂ ರಾಜ್ಯದಲ್ಲಿರುವುದು ಬಿಜೆಪಿಯ ಆತಂಕಕ್ಕೆ ಕಾರಣವಾಗಿದೆ ಎನ್ನಲಾಗಿದೆ.

ಬುಡಕಟ್ಟು ಬೆಂಬಲವೇ ಜೆಎಂಎಂನ ಬಲ
2011ರ ಜನಗಣತಿ ಪ್ರಕಾರ ಝಾರ್ಖಂಡ್‌ ರಾಜ್ಯದಲ್ಲಿ ಶೇ.30ಕ್ಕೂ ಹೆಚ್ಚು ಮಂದಿ ಬುಡಕಟ್ಟು ಸಮುದಾಯಕ್ಕೆ ಸೇರಿದವರಾಗಿದ್ದಾರೆ. ಈ ಸಮುದಾಯಗಳು ಕಳೆದೆರಡು ಚುನಾವಣೆಗಳಲ್ಲಿ ಆಡಳಿತಾ­ರೂಢ ಜೆಎಂಎಂ ಹಾಗೂ ಕಾಂಗ್ರೆಸ್‌ ಪರವಾಗಿರುವುದು ಮಹಾಘ­ಟಬಂಧನ್‌ ಕೂಟಕ್ಕೆ ಬಲ ತಂದುಕೊಟ್ಟಿದೆ. ಅಲ್ಲದೇ ಈ ಬಾರಿ­ಯೂ ಈ ಮತಗಳನ್ನು ಗಟ್ಟಿ ಮಾಡಿಕೊಳ್ಳಲು ಕಾಂಗ್ರೆಸ್‌ ಮೈತ್ರಿ­ ಕೂಟ “ಮೆಯಾನ್‌ ಸಮ್ಮಾನ್‌ ಯೋಜನಾ’, “ಆಪ್ಕಿ ಯೋಜನಾ”, “ಆಪ್ಕಿ ಸರ್ಕಾರ್‌’ ಯೋಜನೆಗಳನ್ನು ಜಾರಿ ಮಾಡಿದೆ.

ಇದಲ್ಲದೇ ರಾಜ್ಯದ ಜನರಿ ಗಾಗಿ ಏಕರೂಪದ ಪಿಂಚಣಿ, ಕ್ರೀಡೆ ಮತ್ತು ಶಿಕ್ಷಣ ಕ್ಷೇತ್ರದಲ್ಲಿ ಹಲವು ಯೋಜನೆ­ಗಳನ್ನು ರಾಜ್ಯ ಸರಕಾರ ಜಾರಿ ಮಾಡಿದೆ. ಇವು ಈ ಚುನಾವಣೆಯಲ್ಲಿ ಮೈತ್ರಿಕೂಟದ ಕೈ ಹಿಡಿಯಬಹುದು ಎನ್ನಲಾಗಿದೆ. ಅಲ್ಲದೇ 2019ರಲ್ಲಿ ಅಧಿಕಾರಕ್ಕೆ ಬಂದ ಬಳಿಕ ಸರ್ನಾ ಸಮುದಾಯಕ್ಕೆ ಪ್ರತ್ಯೇಕ ಧರ್ಮದ ಸ್ಥಾನ­ಮಾನ ನೀಡುವ ಬಗ್ಗೆ ಕಾಂಗ್ರೆಸ್‌ ಹಾಗೂ ಜೆಎಂಎಂ ಗೊತ್ತುವಳಿ­ಯನ್ನು ಮಂಡಿಸಿದ್ದವು ಇದು ಸಹ ಕೂಟಕ್ಕೆ ವರವಾಗುವ ನಿರೀಕ್ಷೆ ಇದೆ.

ಹಿರಿಯ ನಾಯಕರ ಪಕ್ಷಾಂತರ
ಚುನಾವಣೆ ಹತ್ತಿರವಾಗುತ್ತಿದ್ದಂತೆ ಜೆಎಂಎಂ ಮತ್ತು ಕಾಂಗ್ರೆಸ್‌ನ ಹಲವು ಹಿರಿಯ ನಾಯಕರು ಬಿಜೆಪಿಗೆ ಸೇರ್ಪಡೆ­ಯಾಗಿದ್ದು, ಮೈತ್ರಿಕೂಟಕ್ಕೆ ಹಿನ್ನಡೆ ತರುವ ಸಾಧ್ಯತೆ ಇದೆ. ಮಾಜಿ ಸಿಎಂ ಚಂಪಯ್‌ ಸೊರೇನ್‌, ಕಾಂಗ್ರೆಸ್‌ ಸಂಸದೆ ಗೀತಾ ಕೋರಾ ಬಿಜೆಪಿಗೆ ಸೇರ್ಪಡೆಯಾಗಿದ್ದಾರೆ. ಅಲ್ಲದೇ ವಿಪಕ್ಷದಲ್ಲಿನ ಆಂತರಿಕ ಭಿನ್ನತೆಗಳು ಐಎನ್‌ಡಿಐಎ ಮೈತ್ರಿಕೂಟಕ್ಕೆ ಸವಾಲು ತಂದೊಡ್ಡಿದೆ.

ಝಾರ್ಖಂಡಲ್ಲಿ ಜಾತಿ ಲೆಕ್ಕಾಚಾರ
ರಾಜ್ಯದಲ್ಲಿ ಬುಡಕಟ್ಟು ಸಮುದಾಯಕ್ಕೆ ಸೇರಿದ ಜನಸಂಖ್ಯೆಯ ಪ್ರಮಾಣ ಹೆಚ್ಚಿದೆ. ಒಟ್ಟು ಜನಸಂಖ್ಯೆಯಲ್ಲಿ ಶೇ.30ರಷ್ಟಿರುವ ಈ ಸಮುದಾಯ ಪ್ರಮುಖ ಪಾತ್ರ ವಹಿಸುವ ಸಾಧ್ಯತೆ ಇದೆ. ಉಳಿದಂತೆ ಒಬಿಸಿ ಪ್ರಮಾಣ ಶೇ.46 ಹಾಗೂ ಸಾಮಾನ್ಯ ವರ್ಗ ಶೇ.16ರಷ್ಟಿದೆ. ಕಳೆದ ಚುನಾವ­ಣೆಯಲ್ಲಿ ಎಸ್‌ಟಿ ಮತ್ತು ಬುಡಕಟ್ಟು ಸಮುದಾಯಗಳು ಹೆಚ್ಚಿ­ರುವ ಪ್ರದೇಶವನ್ನು ಜೆಎಂಎಂ ಗೆದ್ದುಕೊಂಡಿತ್ತು. ಅಲ್ಲದೇ ಜಾತಿ ಗಣತಿ ವಿಷಯವನ್ನಿಟ್ಟುಕೊಂಡು ಒಬಿಸಿ ಮತವನ್ನು ಸೆಳೆಯಲು ಕಾಂಗ್ರೆಸ್‌ ಮೈತ್ರಿಕೂಟ ಮುಂದಾಗಿದೆ.

ಚುನಾವಣ ವಿಷಯಗಳು
1.ರಾಜ್ಯದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿರುವ ಬುಡಕಟ್ಟು ಜನರ ಅಭಿವೃದ್ಧಿ

2 ಝಾರ್ಖಂಡ್‌ ರಾಜ್ಯದಲ್ಲಿ ಹೆಚ್ಚುತ್ತಿರುವ ಬಾಂಗ್ಲಾ ವಲಸಿಗರ ಸಂಖ್ಯೆ

3. ಸಿಎಂ ಹೇಮಂತ್‌ ಸೊರೇನ್‌ ಭ್ರಷ್ಟಾಚಾರ ಕೇಸಲ್ಲಿ ಜೈಲು ಸೇರಿದ್ದು

4. ಕಳೆದ 5 ವರ್ಷದಲ್ಲಿ ರಾಜ್ಯ ಸರಕಾರ ಜಾರಿ ಮಾಡಿದ ಯೋಜನೆಗಳು

5. ರಾಜ್ಯದಲ್ಲಿ ಹೆಚ್ಚುತ್ತಿರುವ ನಿರುದ್ಯೋಗ ಮತ್ತು ಬಡತನದ ಪ್ರಮಾಣ

– ಗಣೇಶ್‌ ಪ್ರಸಾದ್‌