ಬೆಂಗಳೂರು ಓಪನ್‌ ಟೆನಿಸ್‌: ಮೆಚ್ಚಿನ ಆಟಗಾರರಿಗೆ ಸೋಲಿನ ಆಘಾತ

Team Udayavani, Feb 9, 2022, 11:09 PM IST

ಬೆಂಗಳೂರು: ಬುಧವಾರ ಬೆಂಗಳೂರು ಓಪನ್‌ ಟೆನಿಸ್‌ನಲ್ಲಿ ದಾಖಲಾಗಿದ್ದು ಬಹುತೇಕ ಆಘಾತಕಾರಿ ಫ‌ಲಿತಾಂಶಗಳೇ!

ಮೆಚ್ಚಿನ ತಾರೆಯರೆಲ್ಲ ಸೋತು ಗಂಟುಮೂಟೆ ಕಟ್ಟಿದರು. ಮೊದಲು ತೈಪೆಯ ಯುವ ಆಟಗಾರ ಚುನ್‌ ಹ್ಸಿನ್‌ ಆಘಾತ ನೀಡಿದರು. ಅವರು ನಾಲ್ಕನೇ ಶ್ರೇಯಾಂಕಿತ, ಫ್ರಾನ್ಸ್‌ನ ಹ್ಯುಗೊ ಗ್ರೆನಿಯರ್‌ರನ್ನು 6-1, 6-4ರಿಂದ ಸೋಲಿಸಿದರು. ಈ ಪಂದ್ಯ ಕೇಂದ್ರ ಅಂಕಣದಲ್ಲಿ ನಡೆದಿತ್ತು. ಚುನ್‌ ಹ್ಸಿನ್‌ ಅವರು ಫ್ರೆಂಚ್‌ ಓಪನ್‌, ವಿಂಬಲ್ಡನ್‌ ಕಿರಿಯರ ಕಿರೀಟವನ್ನು 2018ರಲ್ಲಿ ಗೆದ್ದಿದ್ದರು!

ಇದಾದ ಕೆಲವೇ ನಿಮಿಷಗಳಲ್ಲಿ ಅರ್ಹತಾಸುತ್ತಿನ ಆಟಗಾರ, ಕ್ರೊವೇಷ್ಯಾದ ಬೊರ್ನಾ ಗೊಜೊ ಅವರು 7-5, 6-3ರಿಂದ ಆಸ್ಟ್ರೇಲಿಯದ 3ನೇ ಶ್ರೇಯಾಂಕಿತ ಅಲೆಕ್ಸಾಂಡರ್‌ ವುಕಿಕ್‌ರನ್ನು ಮಣಿಸಿದರು. ರೋಚಕತೆಯ ಮಟ್ಟಿಗೆ ಈ ಎಲ್ಲ ಪಂದ್ಯಗಳನ್ನು ಮೀರಿಸಿದ್ದು ಬೆಲ್ಜಿಯಂನ ಕಿಮ್ಮರ್‌ ಕೊಪ್ಪೆಜಾನ್ಸ್‌ ಮತ್ತು ಟರ್ಕಿಯ ಆಟ್ಲಗ್‌ ಸೆಲಿಕ್‌ಬಿಲೆಕ್‌ ನಡುವಿನ ಪಂದ್ಯ. ಇಬ್ಬರ ನಡುವಿನ ಹೋರಾಟ ದೀರ್ಘ‌ಕಾಲ ನಡೆಯಿತು.

ಇದನ್ನೂ ಓದಿ:ಪ್ರೊ ಕಬಡ್ಡಿ: ನಿಕಟ ಕಾದಾಟದಲ್ಲಿ ಗೆದ್ದ ಯುಪಿ ಯೋಧಾ

ಮೊದಲ ಸೆಟ್‌ನಲ್ಲಿ ಕಿಮ್ಮರ್‌ 7-6ರಿಂದ ಕೂಟದ ಐದನೇ ಶ್ರೇಯಾಂಕಿತ ಸೆಲಿಕ್‌ಬಿಲೆಕ್‌ರನ್ನು ಸೋಲಿಸಿದರು. ಇದು ಟೈಬ್ರೇಕರ್‌ಗೆ ಹೋಗಿ ಅಲ್ಲಿ 14-12ರಿಂದ ಕಿಮ್ಮರ್‌ ಗೆದ್ದರು. ಎರಡನೇ ಸೆಟ್‌ ನಲ್ಲಿ ಕಿಮ್ಮರ್‌ 6-3ರಿಂದ ಗೆದ್ದರು.

ಇನ್ನೊಂದು ಪಂದ್ಯದಲ್ಲಿ ಅರ್ಹತಾಸುತ್ತಿನಿಂದ ಬಂದಿದ್ದ ಬ್ರೆಝಿಲ್‌ನ ಗೇಬ್ರಿಯೆಲ್‌ ಡೀಕ್ಯಾಂಪ್ಸ್‌ 6-2, 5-7, 7-6ರಿಂದ ಇಟಲಿಯ ಗಿಯಾನಿ ಮೊರೊನಿಯನ್ನು ಮಣಿಸಿದರು. ಗುರುವಾರ ಭಾರತದ ಪ್ರಜ್ಞೇಶ್ ಗುಣೇಶ್ವರನ್ ಅವರು ಪ್ರೀಕ್ವಾರ್ಟರ್‌ ಫೈನಲ್‌ನಲ್ಲಿ ಚೆಕ್‌ ಗಣರಾಜ್ಯದ ಜಿರಿ ವೆಸೆಲಿಯನ್ನು ಎದುರಿಸಲಿದ್ದಾರೆ.