Cast Away: ಫೆಸಿಪಿಕ್‌ ಮಹಾಸಾಗರದೊಳಗಿನ ಜೀವನ ಕಥಾನಕದ ಚಿತ್ರ “ಕಾಸ್ಟ್‌ ಅವೇ”

ಅವನನ್ನು ಕಂಡು ಗುರುತು ಹಚ್ಚುವುದೇ ಸವಾಲಾಗುತ್ತದೆ.

Team Udayavani, Jul 15, 2024, 1:00 PM IST

Cast Away: ಫೆಸಿಪಿಕ್‌ ಮಹಾಸಾಗರದೊಳಗಿನ ಜೀವನ ಕಥಾನಕದ ಚಿತ್ರ “ಕಾಸ್ಟ್‌ ಅವೇ”

ಇದು ಮತ್ತೊಂದು ಅದಮ್ಯ ಆತ್ಮವಿಶ್ವಾಸದ ಚಿತ್ರ. ಕಾಸ್ಟ್‌ ಅವೇ ಹಾಲಿವುಡ್‌ ಸಿನಿಮಾ. 2000 ದಲ್ಲಿ ರೂಪಿತವಾದದ್ದು. ರಾಬರ್ಟ್‌
ಜೆಮಿಕಿಸ್‌ ನಿರ್ದೇಶಿಸಿ ನಿರ್ಮಿಸಿದ ಚಿತ್ರ. 90 ದಶಲಕ್ಷ ಡಾಲರ್‌ ಗಳಲ್ಲಿ ನಿರ್ಮಾಣವಾದ ಚಿತ್ರ ಸುಮಾರು 429 ಮಿಲಿಯನ್‌ ಡಾಲರ್‌ಗಳನ್ನು ಗಳಿಸಿ ದಾಖಲೆ ಮಾಡಿದ ಸಿನಿಮಾವಿದು.

ಕಥೆ ಎಷ್ಟು ಸಮರ್ಥವಾಗಿತ್ತೋ ಅಷ್ಟೇ ಅರ್ಥಪೂರ್ಣವಾಗಿ ಪಾತ್ರಕ್ಕೆ ಜೀವ ತುಂಬಿದವರು ಪ್ರಸಿದ್ಧ ನಟ ಟಾಮ್‌ ಹಾಂಕ್ಸ್‌. ಕಾರ್ಗೋ ಕಂಪೆನಿಯೊಂದರ ವ್ಯವಹಾರದ ಅನಾಲಿಸ್ಟ್‌ ಆಗಿ ವಿಶ್ವಾದ್ಯಂತ ವಿವಿಧ ನಗರಗಳಿಗೆ ಸೇವೆ ಒದಗಿಸಲು ಹೋಗುತ್ತಿರುತ್ತಾನೆ ಕಥಾ ನಾಯಕ.

ಕಾರ್ಯತಲ್ಲೀನತೆಗೆ ಹೆಸರಾದ ಕಥಾ ನಾಯಕ, ಅಂಥದೊಂದು ಟ್ರಿಪ್‌ ಗೆ ಸಜ್ಜಾಗುತ್ತಾನೆ. ತನ್ನ ಪ್ರಿಯತಮೆಯ ಮನವೊಲಿಸಿ ಆ ಟ್ರಿಪ್‌ಗೆ ಹೊರಡುವ ಕಥಾ ನಾಯಕ, ಪ್ರಯಾಣದ ಮಧ್ಯೆ ಕಾರ್ಗೋ ವಿಮಾನ ಆಪಘಾತಕ್ಕೀಡಾಗುತ್ತದೆ. ಕಥಾನಾಯಕನನ್ನು ಹೊರತುಪಡಿಸಿ ಬೇರಾರೂ ಬದುಕುಳಿಯುವುದಿಲ್ಲ. ಕಥಾ ನಾಯಕನೂ ಫೆಸಿಫಿಕ್‌ ಸಮುದ್ರ ಪ್ರದೇಶದಲ್ಲಿ ಬೀಳುತ್ತಾನೆ.

ಗಾಯಗಳಿಂದ ಜರ್ಝರಿತಗೊಂಡು ಆಘಾತಕ್ಕೊಳಗಾಗುತ್ತಾನೆ. ಜನ ವಸತಿಯಿಲ್ಲದ ಪ್ರದೇಶ. ಎಲ್ಲಿಗೆ ಹೋಗುವುದು, ಏನು ಮಾಡುವುದು ಎಂಬುದು ತೋಚದೇ ಕಂಗಾಲಾಗುತ್ತಾನೆ. ಹೇಗಾದರೂ ಮಾಡಿ ಅಲ್ಲಿಂದ ಸುರಕ್ಷಿತ ಪ್ರದೇಶಕ್ಕೆ ಹೋಗುವ ಎಲ್ಲ
ಪ್ರಯತ್ನಗಳನ್ನೂ ಮಾಡಿದರೂ ವಿಫ‌ಲನಾಗುತ್ತಾನೆ. ಕಡೆಗೆ ಅನಿವಾರ್ಯವಾಗಿ ಪರಿಸ್ಥಿತಿಗೆ ಹೊಂದಿ ಬದುಕುವುದನ್ನು ಅಭ್ಯಾಸ
ಮಾಡಿಕೊಳ್ಳತೊಡಗುತ್ತಾನೆ.

ಕೊನೆಗೂ ಹಲವು ತಿಂಗಳುಗಳ ನಂತರ ಮತ್ತೊಂ ದು ಕಂಪೆನಿಯ ಸಹಕಾರದಿಂದ ಕಥಾನಾಯಕ ಬದುಕುಳಿದು ತನ್ನ ಊರಿಗೆ ವಾಪಸಾಗುತ್ತಾನೆ. ಅವನ ವೇಷವೇ ಬದಲಾಗಿರುತ್ತದೆ. ಅವನನ್ನು ಕಂಡು ಗುರುತು ಹಚ್ಚುವುದೇ ಸವಾಲಾಗುತ್ತದೆ. ಬಳಿಕ ತನ್ನ ವೃತ್ತಿಯನ್ನು ಮತ್ತಷ್ಟು ಪ್ರೀತಿಸತೊಡಗುತ್ತಾನೆ.

ಅನಿಶ್ಚಿತ ಸಂದರ್ಭವೊಂದು ಒದಗಿಸುವ ಬದುಕನ್ನು ಅರ್ಥ ಮಾಡಿಕೊಳ್ಳುವಂಥ ಅವಕಾಶವನ್ನು ತಪ್ಪಿಸಿಕೊಳ್ಳದ ಕಥಾ ನಾಯಕ ಹೊಸ ಮನುಷ್ಯನಾಗಿಯೇ ರೂಪುಗೊಳ್ಳುತ್ತಾನೆ. ಬದುಕಿನ ಎಲ್ಲ ಸವಾಲುಗಳನ್ನು ಗೆದ್ದು ಬೀಗುವವನ ಕಥೆ.

ಇಡೀ ಸಿನಿಮಾ ಆರಂಭದಲ್ಲಿ ಕೊಂಚ ಮಂದಗತಿ ಎನಿಸಿದರೂ, ಬಳಿಕ ಒಳಗೊಳ್ಳುತ್ತದೆ. ನಮ್ಮೊಳಗೆ ಸಾಹಸ ಪ್ರವೃತ್ತಿಯನ್ನು
ಉದ್ದೀಪನಗೊಳಿಸುವಂಥ ಚಿತ್ರ. 20 ಸೆಂಚುರಿ ಫಾಕ್ಸ್‌ ಬಿಡುಗಡೆಗೊಳಿಸಿದ ಚಿತ್ರ ಆ ವರ್ಷ ಅತಿ ಹೆಚ್ಚು ಗಳಿಕೆ ಮಾಡಿದ ಮೂರು ಚಿತ್ರಗಳಲ್ಲಿ ಒಂದಾಗಿತ್ತು. ಟಾಮ್‌ ಹಾಂಕ್ಸ್‌ರ ಅಭಿನಯಕ್ಕೆ ಮೆಚ್ಚುಗೆಯ ಮಹಾಪೂರವೇ ಹರಿದು ಬಂದಿತ್ತು. ಗೋಲ್ಡನ್‌ ಗ್ಲೋಬ್‌ ಪ್ರಶಸ್ತಿ ಹಾಗೂ ಆಸ್ಕರ್‌ ಪ್ರಶಸ್ತಿಯೂ ಅವರ ಅತ್ಯುತ್ತಮ ನಟನೆಗೆ ಸಂದಾಯವಾಗಿತ್ತು.

*ಅಪ್ರಮೇಯ