Coastal Karnataka: ಒಂದೇ ತಿಂಗಳಲ್ಲಿ ವಾಡಿಕೆ ಗುರಿ ಮುಟ್ಟುವತ್ತ ಹಿಂಗಾರು!

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಶೇ. 46 , ಉಡುಪಿ ಜಿಲ್ಲೆಯಲ್ಲಿ ಶೇ.1ರಷ್ಟು ಮಳೆ ಪ್ರಮಾಣ ಹೆಚ್ಚಳ

Team Udayavani, Oct 27, 2024, 7:11 AM IST

ಮಂಗಳೂರು: ಕರಾವಳಿ ಭಾಗದಲ್ಲಿ ಕಳೆದ ಕೆಲವು ದಿನಗಳಿಂದ ಉತ್ತಮ ಮಳೆ ಸುರಿಯುತ್ತಿದ್ದು, ಮೂರು ತಿಂಗಳಲ್ಲಿ ಸುರಿಯಬೇಕಾದ ವಾಡಿಕೆ ಮಳೆ ಒಂದೇ ತಿಂಗಳಲ್ಲಿ ಸುರಿದಿದೆ.

ಒಟ್ಟಾರೆ ಹಿಂಗಾರು ಅವಧಿಯ ಅಕ್ಟೋಬರ್‌ 1ರಿಂದ ಡಿಸೆಂಬರ್‌ ಅಂತ್ಯದವರೆಗೆ ಕರಾವಳಿ ಭಾಗದಲ್ಲಿ 259.4 ಮಿ.ಮೀ. ಮಳೆ ಸುರಿಯಬೇಕು. ಆದರೆ, ನಾಲ್ಕೇ ವಾರದಲ್ಲಿ (ಅ.25ರ ವರೆಗೆ) 247.6 ಮಿ.ಮೀ. ಮಳೆಯಾಗಿದೆ. ಹಿಂಗಾರು ಕೊನೆಗೊಳ್ಳಲು ಇನ್ನೂ ಎರಡು ತಿಂಗಳು ಇದ್ದು, ಮಳೆ ಪ್ರಮಾಣ ಇನ್ನಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ.

ಕರಾವಳಿ ಭಾಗದಲ್ಲಿ ಈ ಬಾರಿ ಮುಂಗಾರು ಕೂಡ ಬಿರುಸು ಪಡೆದು ವಾಡಿಕೆಗಿಂತ ಶೇ.20ರಷ್ಟು ಮಳೆ ಏರಿಕೆ ಕಂಡಿತ್ತು. ಈ ತಿಂಗಳಿನಿಂದ ಹಿಂಗಾರು ಆರಂಭಗೊಂಡಿದ್ದು, ಅಕ್ಟೋಬರ್‌ ತಿಂಗಳಿನಾದ್ಯಂತ ಉತ್ತಮ ಮಳೆಯಾಗಿದೆ. ಚಂಡಮಾರುತದ ಪರಿಣಾಮ ಇನ್ನೂ ಕೆಲವು ದಿನ ಮಳೆಯ ನಿರೀಕ್ಷೆ ಇದೆ.

ಕಳೆದ ವರ್ಷ ಗುರಿ ಮೀರಿದ ಮಳೆ
ಕಳೆದ ವಷವೂ ಕರಾವಳಿ ಭಾಗದಲ್ಲಿ ಹಿಂಗಾರು ಉತ್ತಮವಾಗಿತ್ತು. ದ.ಕ. ಜಿಲ್ಲೆಯಲ್ಲಿ ಶೇ. 46 ಮತ್ತು ಉಡುಪಿ ಜಿಲ್ಲೆಯಲ್ಲಿ ಶೇ.1ರಷ್ಟು ಮಳೆ ಪ್ರಮಾಣ ಹೆಚ್ಚಳವಾಗಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಆರಂಭದಲ್ಲಿಯೇ ಹಿಂಗಾರು ಬಿರುಸು ಪಡೆದುಕೊಂಡಿದ್ದು, ಮಳೆ ಪ್ರಮಾಣವೂ ಅಧಿಕವಾಗಿದೆ. ಈ ಕಾರಣಕ್ಕೆ ಹಿಂಗಾರು ಅವಧಿಯ ಇನ್ನಷ್ಟು ದಿನಗಳಲ್ಲಿ ಉತ್ತಮ ವರ್ಷಧಾರೆಯಾಗುವ ನಿರೀಕ್ಷೆ ಇದೆ.

ಕಾಪುವಿನಲ್ಲಿ ಕಡಿಮೆ, ಕುಂದಾಪುರದಲ್ಲಿ ಅಧಿಕ
ಕರಾವಳಿಗೆ ಹೋಲಿಕೆ ಮಾಡಿದರೆ ಅ. 1ರಿಂದ ಈವರೆಗೆ ಉಡುಪಿ ಜಿಲ್ಲೆಯ ಕಾಪುವಿನಲ್ಲಿ ಕಡಿಮೆ (ಶೇ.-35) ಮಳೆಯಾಗಿದ್ದು, ಕುಂದಾಪುರದಲ್ಲಿ ಅಧಿಕ (ಶೇ.156) ಮಳೆ ಸುರಿದಿದೆ. ಉಳಿದಂತೆ ದ.ಕ. ಜಿಲ್ಲೆಯ ಬೆಳ್ತಂಗಡಿಯಲ್ಲಿ ವಾಡಿಕೆಗಿಂತ ಶೇ. 6 ಅಧಿಕ, ಮಂಗಳೂರುನಲ್ಲಿ ಶೇ. 21, ಬಂಟ್ವಾಳದಲ್ಲಿ ಶೇ. 9, ಪುತ್ತೂರಿನಲ್ಲಿ ಶೇ.16, ಸುಳ್ಯ ಶೇ. 21, ಮೂಡುಬಿದಿರೆ ಶೇ. 20, ಕಡಬ ಶೇ. 10, ಮೂಲ್ಕಿಯಲ್ಲಿ ಶೇ. 25, ಉಳ್ಳಾಲದಲ್ಲಿ ಶೇ. 8, ಉಡುಪಿ ಜಿಲ್ಲೆಯ ಕಾರ್ಕಳದಲ್ಲಿ ಶೇ. 23, ಉಡುಪಿಯಲ್ಲಿ ಶೇ. 25, ಬೈಂದೂರಿನಲ್ಲಿ ಶೇ. 100, ಬ್ರಹ್ಮಾವರದಲ್ಲಿ ಶೇ. 2 ಮತ್ತು ಹೆಬ್ರಿಯಲ್ಲಿ ಶೇ. 108ರಷ್ಟು ಮಳೆ ವಾಡಿಕೆಗಿಂತ ಅಧಿಕ ಸುರಿದಿದೆ.

ಹಿಂಗಾರು ಮಳೆ ಪ್ರಮಾಣ (259.4 ಮಿ.ಮೀ. ವಾಡಿಕೆ ಮಳೆ)
ವರ್ಷ – ಮಳೆ ಪ್ರಮಾಣ (ಶೇ.)
2016 – ಶೇ. 57
2017 – ಶೇ. 25
2018- ಶೇ. 28
2019 – ಶೇ. 124
2020- ಶೇ. 27
2021 – ಶೇ. 122
2022 – ಶೇ. 14
2023 – ಶೇ. 6