ಕೋವಿಡ್ 19 ಕಟ್ಟಿಹಾಕಲು ಸೀಲಿಂಗ್‌ ಸೂತ್ರ

Team Udayavani, Apr 6, 2020, 6:15 AM IST

ಹೊಸದಿಲ್ಲಿ: ಲಾಕ್‌ಡೌನ್‌ ರೀತಿಯ ಕ್ರಮಗಳಿಂದ ಕೋವಿಡ್ 19 ವೈರಾಣು ಹೆಚ್ಚು ಜನರಿಗೆ ವ್ಯಾಪಿಸುವುದನ್ನು ತಡೆಯುವಲ್ಲಿ ತಕ್ಕ ಮಟ್ಟಿಗೆ ಯಶಸ್ವಿಯಾಗಿರುವ ಕೇಂದ್ರ ಸರಕಾರ ಈಗ ಮುಂದಿನ ಹಂತದಲ್ಲಿ ರೋಗ ಪ್ರಸಾರವನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಲು ಹೊಸ ಯೋಜನೆ ಹಾಕಿಕೊಂಡಿದೆ.

ಆಯ್ದ ಸ್ಥಳಗಳನ್ನು ಬಫ‌ರ್‌ ಜೋನ್‌ ಎಂದು ಗುರುತಿಸುವುದು ಮತ್ತು ಕೋವಿಡ್ 19 ಹಾಟ್‌ ಸ್ಪಾಟ್‌ಗಳೆಂದು ಗುರುತಿಸಲಾಗಿರುವ ಪ್ರದೇಶಗಳನ್ನು ತಿಂಗಳ ಮಟ್ಟಿಗೆ ಸೀಲ್‌ ಮಾಡುವುದು ಕೇಂದ್ರದ ಹೊಸ ಯೋಜನೆಯ ಪ್ರಮುಖ ಅಂಶಗಳಾಗಿವೆ.

ಕೋವಿಡ್ 19 ವೈರಾಣು ಪ್ರಸರಣವನ್ನು ಕಟ್ಟಿಹಾಕಜಿಕೈಗೊಳ್ಳಬೇಕಿರುವ ತೀವ್ರಗಾಮಿ ಕ್ರಮಗಳ ಜಾರಿಗೆ ಸೋಂಕು ಹೆಚ್ಚಿರುವ ಕೆಲವು ಪ್ರದೇಶಗಳನ್ನು ಈಗಾಗಲೇ ಗುರುತಿಸಲಾಗಿದೆ. ಈ ಪ್ರದೇಶಗಳನ್ನು ಸೀಲ್‌ ಮಾಡಿ, ಜನ ಸಂಚಾರವನ್ನು ಸಂಪೂರ್ಣವಾಗಿ ನಿರ್ಬಂಧಿಸಲಾಗುತ್ತದೆ. ಕನಿಷ್ಠ ನಾಲ್ಕು ವಾರದ ವರೆಗೆ ಒಂದೂ ಹೊಸ ಕೋವಿಡ್ 19 ಪ್ರಕರಣ ಪತ್ತೆಯಾಗದಿದ್ದರೆ ಮಾತ್ರ ನಿರ್ಬಂಧಗಳನ್ನು ಕ್ರಮೇಣ ಸಡಿಲಿಸಲಾಗುತ್ತದೆ.

ಎಲ್ಲವೂ ಬಂದ್‌
ಸೋಂಕಿನ ಹಾಟ್‌ಸ್ಪಾಟ್‌ ಮತ್ತು ಬಫ‌ರ್‌ ಜೋನ್‌ ಎಂದು ಗುರುತಿಸಿದ ಪ್ರದೇಶಗಳ ಶಾಲೆ, ಕಾಲೇಜು ಮತ್ತು ಎಲ್ಲ ಕಚೇರಿಗಳನ್ನು ಮುಚ್ಚಿಸಲಿದ್ದು, ವಾಹನಗಳ ಸಂಚಾರವನ್ನು ಸಂಪೂರ್ಣ ವಾಗಿ ನಿಷೇಧಿಸಲಾಗುತ್ತದೆ. ಈ ಅವಧಿಯಲ್ಲಿ ಅಗತ್ಯ ಸೇವೆಗಳು ಮಾತ್ರ ಲಭ್ಯವಿರುತ್ತವೆ. ಹಾಗೆಯೇ ಪರಿಣಾಮಕಾರಿ ಸಾಮಾಜಿಕ ಅಂತರ ನಿಯಮದೊಂದಿಗೆ ಇತರ ಸಾರ್ವ ಜನಿಕ ಆರೋಗ್ಯ ಉಪಕ್ರಮಗಳು ಜಾರಿಯಾದರೆ ಮಾತ್ರ ಸೋಂಕಿನ ನಿಯಂತ್ರಣ ಸಾಧ್ಯ ಎಂದು ಆರೋಗ್ಯ ಸಚಿವಾಲಯ ಅಭಿಪ್ರಾಯಪಟ್ಟಿದೆ.