ಕೋವಿಡ್: ರಾಜ್ಯದಲ್ಲೇ ಹೆಚ್ಚು ಸಾವು : ರವಿವಾರಕ್ಕೆ ಹೋಲಿಸಿದರೆ ಪ್ರಕರಣಗಳ ಸಂಖ್ಯೆ ಕಡಿಮೆ

Team Udayavani, May 11, 2021, 7:05 AM IST

ಬೆಂಗಳೂರು: ರಾಜ್ಯದಲ್ಲಿ ಕೊರೊನಾ ಸಾವಿನ ಪ್ರಮಾಣ ಹೆಚ್ಚುತ್ತಿದ್ದು, ಸೋಮವಾರ 596 ಮಂದಿ ಅಸುನೀಗಿದ್ದಾರೆ. ಸೋಮವಾರದ ಮಟ್ಟಿಗೆ ದೇಶದಲ್ಲಿ ಅತೀ ಹೆಚ್ಚು ಸಾವು ಸಂಭವಿಸಿರುವುದು ಕರ್ನಾಟಕದಲ್ಲೇ. ಆದರೆ ರವಿವಾರಕ್ಕೆ ಹೋಲಿಸಿದರೆ ಪ್ರಕರಣಗಳ ಸಂಖ್ಯೆ ಕಡಿಮೆಯಾಗಿದೆ. ಇದಕ್ಕೆ ಸೋಂಕು ಪರೀಕ್ಷೆ ಕಡಿಮೆಯಾಗಿರುವುದು ಕಾರಣ ಎನ್ನಲಾಗಿದೆ.

ಸೋಮವಾರ 39,305 ಮಂದಿಗೆ ಸೋಂಕು ತಗಲಿದೆ. ಈ ಪೈಕಿ ಬೆಂಗಳೂರಿನಲ್ಲಿ 16,747 ಸೋಂಕು ಪೀಡಿತರು ಪತ್ತೆಯಾಗಿದ್ದು, 374 ಸಾವಾಗಿವೆ. ತುಮಕೂರಿನಲ್ಲಿ 2,168, ಮೈಸೂರು, ಮಂಡ್ಯ, ಹಾಸನ, ಧಾರವಾಡ, ದಕ್ಷಿಣ ಕನ್ನಡಗಳಲ್ಲಿ ತಲಾ ಒಂದು ಸಾವಿರಕ್ಕೂ ಅಧಿಕ ಮಂದಿಗೆ ಸೋಂಕು ತಗಲಿದೆ.

ಪರೀಕ್ಷೆ ಇಳಿಕೆ, ಸೋಂಕು ಕಡಿಮೆ
ರಾಜ್ಯದಲ್ಲಿ 3 ದಿನಗಳಿಂದ ನಿತ್ಯ ಸರಾಸರಿ 1.51 ಲಕ್ಷ ಸೋಂಕು ಪರೀಕ್ಷೆಗಳು ನಡೆಯುತ್ತಿದ್ದು, 48 ಸಾವಿರದ ಆಸುಪಾಸಿನಲ್ಲಿ ಹೊಸ ಪ್ರಕರಣಗಳು ಪತ್ತೆಯಾಗುತ್ತಿದ್ದವು. ಆದರೆ ಸೋಮವಾರ 1.24 ಲಕ್ಷ ಪರೀಕ್ಷೆ ನಡೆಸಿದ್ದು, 39,305 ಪ್ರಕರಣಗಳು ಪತ್ತೆ ಯಾಗಿವೆ. ಪರೀಕ್ಷೆ ಸಂಖ್ಯೆ 25 ಸಾವಿರದಷ್ಟು ಇಳಿಕೆಯಾಗಿದ್ದು, ಹೀಗಾಗಿ ಹೊಸ ಪ್ರಕರಣಗಳ ಸಂಖ್ಯೆ ಯಲ್ಲಿ ಒಂಬತ್ತು ಸಾವಿರದಷ್ಟು ಕಡಿಮೆಯಾಗಿವೆ.

ರಾಜ್ಯದಲ್ಲೂ ಬ್ಲ್ಯಾಕ್ ಫ‌ಂಗಸ್‌ ಪತ್ತೆ
ರಾಜ್ಯದ ಇಬ್ಬರು ಕೊರೊನಾ ಪೀಡಿತರಿಗೆ ಮಾರಣಾಂತಿಕ “ಬ್ಲ್ಯಾಕ್ ಫ‌ಂಗಸ್‌’ ತಗಲಿರುವ ಶಂಕೆ ವ್ಯಕ್ತವಾಗಿದೆ. ಬೆಂಗಳೂರಿನ ವಿಕ್ಟೋರಿಯಾ ಟ್ರಾಮಾ ಕೇಂದ್ರದಲ್ಲಿ 2 ಶಂಕಿತ “ಬ್ಲ್ಯಾಕ್ ಫ‌ಂಗಸ್‌’ ಪ್ರಕರಣ ವರದಿಯಾಗಿದ್ದು ಒಬ್ಬರ ಸ್ಥಿತಿ ಗಂಭೀರವಾಗಿದೆ ಎಂದು ಆಸ್ಪತ್ರೆ ಮೂಲಗಳು ತಿಳಿಸಿವೆ. ಕೇಂದ್ರವು ರಾಜ್ಯಗಳಿಗೆ ಈ ರೋಗ ಪತ್ತೆ, ಚಿಕಿತ್ಸೆ ಕುರಿತು ಶನಿವಾರ ಮಾರ್ಗಸೂಚಿ ರವಾನಿಸಿದೆ. ಈ ಬೆನ್ನಲ್ಲೇ 2 ಶಂಕಿತ ಪ್ರಕರಣಗಳು ಪತ್ತೆಯಾಗಿರುವುದು ಆತಂಕ ಹೆಚ್ಚಿಸಿದೆ.

ಮೊದಲ ಅಲೆ ಸಂದರ್ಭದಲ್ಲಿ ನವೆಂಬರ್‌ ತಿಂಗಳಲ್ಲಿ ಇಂಥ ಎಂಟು ಪ್ರಕರಣ ವರದಿಯಾಗಿದ್ದವು.