ಯಾಸ್ ಚಂಡಮಾರುತ ತೀವ್ರವಾಗಿ ಒಡಿಶಾ, ಪಶ್ಚಿಮಬಂಗಾಳ ಕರಾವಳಿಗೆ ಅಪ್ಪಳಿಸಲಿದೆ: ಐಎಂಡಿ

Team Udayavani, May 22, 2021, 4:12 PM IST

ನವದೆಹಲಿ: ಯಾಸ್ ಚಂಡಮಾರುತ ಪ್ರಬಲವಾಗಿ ತೀವ್ರಗೊಂಡು ಮೇ 26ರಂದು ಒಡಿಶಾ ಮತ್ತು ಪಶ್ಚಿಮಬಂಗಾಳ ಕರಾವಳಿ ಪ್ರದೇಶವನ್ನು ಹಾದುಹೋಗಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಶನಿವಾರ (ಮೇ 22) ತಿಳಿಸಿದೆ.

ಪೂರ್ವ ಬಂಗಾಳ ಕೊಲ್ಲಿ ಮತ್ತು ಉತ್ತರ ಅಂಡಮಾನ್ ಸಮುದ್ರ ಪ್ರದೇಶದಲ್ಲಿ ಕಡಿಮೆ ಒತ್ತಡದ ಪ್ರದೇಶದಲ್ಲಿ ಯಾಸ್ ಚಂಡ ಮಾರುತ ಮೇಲಕ್ಕೇಳಲಿದೆ ಎಂದು ವಿವರಿಸಿದೆ. ಇದು ಯಾಸ್ ಚಂಡಮಾರುತದ ಆರಂಭಿಕ ಹಂತವಾಗಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಒತ್ತಡದ ಪ್ರದೇಶದಲ್ಲಿಯೇ ಬಹುತೇಕ ಕೇಂದ್ರೀಕೃತವಾಗುವ ಮೂಲಕ ಭಾನುವಾರ(ಮೇ 23) ಬೆಳಗ್ಗೆ ಪೂರ್ವ ಬಂಗಾಳಕೊಲ್ಲಿ ಪ್ರದೇಶದಲ್ಲಿ ಚಂಡಮಾರುತ ಬೀಸಲಿದ್ದು ಇದು ಉತ್ತರ-ವಾಯುವ್ಯ ದಿಕ್ಕಿನತ್ತ ಚಲಿಸುವ ಸಾಧ್ಯತೆ ಇದೆ. ಅಲ್ಲದೇ ಮೇ 24ರಂದು ಚಂಡಮಾರುತ ಬಿರುಸುಗೊಳ್ಳುವ ಮೂಲಕ ಮುಂದಿನ 24ಗಂಟೆಗಳ ಕಾಲ ತೀವ್ರಗೊಳ್ಳಲಿದೆ ಎಂದು ಐಎಂಡಿ ಎಚ್ಚರಿಸಿದೆ.

ಯಾಸ್ ಚಂಡಮಾರುತ ತೀವ್ರಗೊಳ್ಳುವ ಮೂಲಕ ಬಂಗಾಳ ಕೊಲ್ಲಿ ಸಮೀಪ ಹಾಗೂ ಒಡಿಶಾ ಮತ್ತು ಬಾಂಗ್ಲಾದೇಶ ಕರಾವಳಿ ಪ್ರದೇಶದ ಮೇಲೆ ಮೇ 26ರಂದು ಅಪ್ಪಳಿಸಲಿದೆ. ಈ ಹಿನ್ನೆಲೆಯಲ್ಲಿ ಸೂಕ್ತ ಮುಂಜಾಗ್ರತಾ ಕ್ರಮ ತೆಗೆದುಕೊಳ್ಳುವಂತೆ ಹವಾಮಾನ ಇಲಾಖೆ ಎಚ್ಚರಿಕೆ ನೀಡಿದೆ.