ಇದೇ ಮಾರ್ಚ್ 26ಕ್ಕೆ ‘ಇಂಗ್ಲಿಷ್–ಎಂಕ್ಲೆಗ್‌ ಬರ್ಪುಜ್ಜಿ ಬ್ರೊ’ ರಿಲೀಸ್

Team Udayavani, Mar 3, 2021, 9:08 PM IST

ಬೆಂಗಳೂರು :  ತುಳು‌ವಿನ ಬಹು ನಿರೀಕ್ಷಿತ ‘ಇಂಗ್ಲಿಷ್–ಎಂಕ್ಲೆಗ್‌ ಬರ್ಪುಜ್ಜಿ ಬ್ರೊ’ ಸಿನಿಮಾ ಇದೇ ಮಾರ್ಚ್ 26ರಂದು ಬಿಡುಗಡೆಯಾಗಲಿದೆ.

ಚಿತ್ರವು ಅಕ್ಮೆ ಮೂವೀಸ್ ಇಂಟರ್‌ನ್ಯಾಷನಲ್ ಲಾಂಛನದಲ್ಲಿ ನಿರ್ಮಾಣವಾಗಿದ್ದು,  ಕೆ.ಸೂರಜ್‌ ಶೆಟ್ಟಿ ಆಕ್ಷನ್ ಕಟ್ ಹೇಳಿದ್ದಾರೆ. ಇಂಗ್ಲಿಷ್–ಎಂಕ್ಲೆಗ್‌ ಬರ್ಪುಜ್ಜಿ ಬ್ರೊ ಚಿತ್ರವು ಗಲ್ಫ್‌ ದೇಶಗಳಲ್ಲೂ ತೆರೆ ಕಾಣಲಿದೆ.

ದುಬೈ ಖ್ಯಾತ ಉದ್ಯಮಿ, ಕನ್ನಡ ಸಿನಿಮಾ ನಿರ್ಮಾಪಕರಾದ ಹರೀಶ್ ಶೇರಿಗಾರ್ ಮತ್ತು ಶರ್ಮಿಳಾ ಶೇರಿಗಾರ್ ಈ ಸಿನಿಮಾವನ್ನು ನಿರ್ಮಾಣ ಮಾಡುತ್ತಿದ್ದಾರೆ.

ಬಹು ನಿರೀಕ್ಷಿತ ಈ ಸಿನಿಮಾದಲ್ಲಿ ತುಳುವಿನ ಖ್ಯಾತ ಹಾಸ್ಯ ಕಲಾವಿದರು ಬಣ್ಣ ಹಚ್ಚಿದ್ದಾರೆ. ಅಲ್ಲದೆ ಈ ಚಿತ್ರದ ಮೂಲಕ ಹಿರಿಯ ನಟ ಅನಂತ್ ನಾಗ್ ತುಳು ಸಿನಿ ಇಂಡಸ್ಟ್ರಿಗೆ ಪಾದ ಬೆಳೆಸಿದ್ದಾರೆ. ಇಂಗ್ಲಿಷ್–ಎಂಕ್ಲೆಗ್‌ ಬರ್ಪುಜ್ಜಿ ಬ್ರೊ ಚಿತ್ರ ಟೀಸರ್ ಮತ್ತು ಟ್ರೇಲರ್ ನಿಂದ ಭಾರೀ ನಿರೀಕ್ಷೆ ಹುಟ್ಟಿಸಿದೆ. ತುಳು ಉಳಿವಿಗೆ ಮತ್ತು ಬೆಳವಣಿಗೆಗಾಗಿ ಈ ಚಿತ್ರವನ್ನು ಮಾಡಲಾಗುತ್ತಿದೆ ಎಂದು ನಿರ್ಮಾಪಕರು ಹೇಳಿದ್ದಾರೆ.

ಈ ಸಿನಿಮಾದಲ್ಲಿ ಖ್ಯಾತ ಹಾಸ್ಯ ನಟರಾದ ಅರವಿಂದ್ ಬೋಳಾರ್, ನವೀನ ಡಿ’ಪಡೀಲ್, ಭೋಜರಾಜ್ ವಾಮಂಜೂರ್, ವಿಸ್ಮಯ್ ವಿನಾಯಕ್, ದೀಪಕ್ ರೈ, ನಾಯಕನಾಗಿ ‘ದಿಯಾ ಖ್ಯಾತಿಯ ಪೃಥ್ವಿ ಅಂಬರ್, ಮತ್ತು ನಾಯಕಿಯಾಗಿ ನವ್ಯ ಪೂಜಾರಿ ನಟಿಸಿದ್ದಾರೆ.