Argentina: ಹೋಟೆಲ್‌ ಬಾಲ್ಕನಿಯ 3ನೇ ಮಹಡಿಯಿಂದ ಬಿದ್ದು ಖ್ಯಾತ ಗಾಯಕ ಮೃತ್ಯು

Team Udayavani, Oct 17, 2024, 10:52 AM IST

ಬ್ಯೂನಸ್‌ ಐರಿಸ್(ಅರ್ಜೆಂಟೀನಾ): ಖ್ಯಾತ ಬ್ರಿಟಿಷ್‌ ಗಾಯಕ, ಒನ್‌ ಡೈರೆಕ್ಷನ್‌ ನ ಮಾಜಿ ಸದಸ್ಯ ಲಿಯಾಮ್‌ ಪೇನ್‌ (31ವರ್ಷ) ಹೋಟೆಲ್‌ ಬಾಲ್ಕನಿಯಿಂದ ಕೆಳಗೆ ಬಿದ್ದು ಸಾವನ್ನಪ್ಪಿರುವ ಘಟನೆ ಅರ್ಜೆಂಟೀನಾದ ಬ್ಯೂನಸ್‌ ಐರಿಸ್‌ ನಲ್ಲಿ ನಡೆದಿರುವುದಾಗಿ ವರದಿ ತಿಳಿಸಿದೆ.

ಸ್ಥಳೀಯ ಮಾಧ್ಯಮಗಳ ವರದಿ ಪ್ರಕಾರ, ಬ್ಯೂನಸ್‌ ಐರಿಸ್‌ ನ ಪಾಲೆರ್ಮೊ ಜಿಲ್ಲೆಯ ಹೋಟೆಲ್ ವೊಂದರ ಮೂರನೇ ಮಹಡಿಯಿಂದ ಕೆಳಗೆ ಬಿದ್ದಿದ್ದ ಸ್ಥಿತಿಯಲ್ಲಿ ಲಿಯಾಮ್‌ ಶವ ಹೋಟೆಲ್‌ ನ ಇಂಟಿರಿಯರ್‌ ಕೋರ್ಟ್‌ ಯಾರ್ಡ್‌ ನಲ್ಲಿ ಪತ್ತೆಯಾಗಿರುವುದಾಗಿ ತಿಳಿಸಿದೆ.

ಅರ್ಜೆಂಟೀನಾ ಪೊಲೀಸರ ಮಾಹಿತಿ ಪ್ರಕಾರ, ಹೋಟೆಲ್‌ ಸಿಬಂದಿ ಘಟನೆ ಬಗ್ಗೆ ಪೊಲೀಸ್‌ ಅಧಿಕಾರಿಗಳಿಗೆ ತಿಳಿಸಿದ್ದಾರೆ. ಬುಧವಾರ (ಅ.16) ರಾತ್ರಿ ಹೋಟೆಲ್‌ ಹಿಂಭಾಗದಲ್ಲಿ ಭಾರೀ ಸದ್ದು ಕೇಳಿ ಬಂದಿರುವುದಾಗಿ ಹೋಟೆಲ್‌ ಮ್ಯಾನೇಜರ್‌ ತಿಳಿಸಿದ್ದು, ಘಟನೆ ಬಗ್ಗೆ ತನಿಖೆ ನಡೆಯುತ್ತಿರುವುದಾಗಿ ತಿಳಿಸಿದೆ.

ಪೊಲೀಸರು ಘಟನಾ ಸ್ಥಳಕ್ಕೆ ಆಗಮಿಸಿದ್ದ ನಂತರ ಲಿಯಾಮ್‌ ದೇಹದ ಪರೀಕ್ಷೆ ನಡೆಸಿದ ವೈದ್ಯರು ಮೃತಪಟ್ಟಿರುವುದಾಗಿ ಖಚಿತಪಡಿಸಿದ್ದರು. ಡ್ರಗ್ಸ್‌ ಅಥವಾ ಆಲ್ಕೋಹಾಲ್‌ ಸೇವನೆಯಿಂದ ಆಯತಪ್ಪಿ ಮಹಡಿಯಿಂದ ಬಿದ್ದು ಸಾವನ್ನಪ್ಪಿರುವ ಸಾಧ್ಯತೆ ಇದ್ದಿರುವುದಾಗಿ ಪೊಲೀಸರು ಶಂಕಿಸಿದ್ದಾರೆ. ಆದರೆ ನಿಜವಾದ ಕಾರಣ ಏನು ಎಂಬುದನ್ನು ತನಿಖೆಯಲ್ಲಿ ಪತ್ತೆ ಹಚ್ಚಬೇಕಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.