ಅನಿವಾಸಿ ಕನ್ನಡಿಗರಿಗೆ ಉಚಿತ ಕ್ವಾರಂಟೈನ್‌ ವ್ಯವಸ್ಥೆ: ಪ್ರಹ್ಲಾದ್‌ ಜೋಷಿ ಭರವಸೆ

Team Udayavani, May 8, 2020, 9:49 PM IST

ಬೆಂಗಳೂರು: ಕೋವಿಡ್‌ ಸಂಕಷ್ಟಕ್ಕೆ ಸಿಲುಕಿರುವ ಅನಿವಾಸಿ ಭಾರತೀಯರನ್ನು ವಾಪಾಸು ತಾಯ್ನಾಡಿಗೆ ಕರೆತರುವ ಕಾರ್ಯಕ್ಕೆ ಭಾರತ ಸರ್ಕಾರ ಚಾಲನೆ ನೀಡಿದ್ದು,ಆರ್ಥಿಕ ಸಂಕಷ್ಟದಲ್ಲಿರುವ ಅನಿವಾಸಿಗಳಿಗೆ ಉಚಿತ ಕ್ವಾರಂಟೈನ್‌ ವ್ಯವಸ್ಥೆ ಮಾಡಲಾಗುವುದು ಎಂದು ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಪ್ರಹ್ಲಾದ್‌ ಜೋಷಿ ಭರವಸೆ ನೀಡಿದರು.

ದುಬೈನ ಕನ್ನಡಿಗಾಸ್‌ ಹೆಲ್ಪ್ ಲೈನ್‌ ತಂಡದೊಂದಿಗೆ ವಿಡಿಯೊ ಕಾನ್ಫರೆನ್ಸ್ ಮೂಲಕ ಮಾತನಾಡಿದ ಅವರು, ಮೇ 12ಕ್ಕೆ ನಿಗದಿಯಾಗಿದ್ದ ದುಬೈ – ಮಂಗಳೂರು ವಿಮಾನ ಸಂಚಾರ ಸಮಯ ಮರುನಿಗದಿಗೊಂಡು 14 ರಂದು ಸಂಜೆಗೆ ಹೊರಡಲಿರುವುದು.

ಭಾರತಕ್ಕೆ ವಾಪಾಸು ಬರಲಿರುವ ಅನಿವಾಸಿ ಕನ್ನಡಿಗರ ಪೈಕಿ ಹಲವಾರು ಜನ ಉದ್ಯೋಗ ಕಳೆದುಕೊಂಡವರು ಹಾಗೂ ವಿಸಿಟ್‌ ವಿಸಾದಲ್ಲಿ ಹೋಗಿ ಕೆಲಸ ಸಿಗದೇ ವಾಪಾಸಾಗುತ್ತಿರುವವರೂ ಇದ್ದಾರೆ, ಇವರಿಗೆ ಟಿಕೆಟ್‌ ಖರೀದಿಸಲೇ ಹಣದ ಕೊರತೆ ಇದ್ದು ಕ್ವಾರಂಟೈನ್‌ ಗೆ ಹಣನೀಡಲು ಸಂಪೂರ್ಣ ಅಶಕ್ತರಾದ ಕಾರಣ ಅಂತಹ ಕನ್ನಡಿಗರಿಗೆ ಉಚಿತವಾಗಿ ಕ್ವಾರಂಟೈನ್‌ ನೀಡಬೇಕೆಂದು ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಪ್ರಹ್ಲಾದ್‌ ಜೋಷಿಯವರಿಗೆ ವಿಡಿಯೊ ಕಾನ್ಫರೆನ್ಸ್ ಮೂಲಕ ದುಬೈ ಅನಿವಾಸಿ ಕನ್ನಡಿಗರ ಕನ್ನಡಿಗಾಸ್‌ ಹೆಲ್ಪ್ ಲೈನ್‌ ತಂಡ ಒತ್ತಾಯಿಸಿದಾಗ, ಸಚಿವ ಪ್ರಹ್ಲಾದ್‌ ಜೋಷಿ ಖಂಡಿತವಾಗಿಯೂ ಈ ಬೇಡಿಕೆ ಈಡೇರಿಸಲು ಪ್ರಯತ್ನಿಸಲಾಗುವುದು ಎಂದು ತಿಳಿಸಿದರು.

ಇದೀಗ ಮಂಗಳೂರಿಗೆ ಒಂದು ವಿಮಾನ ನಿಗದಿಯಾಗಿದೆ, ಅದೇ ರೀತಿ ಇನ್ನು ಎರಡು ವಿಮಾನಗಳು ಬೆಂಗಳೂರು ಮತ್ತು ಮಂಗಳೂರಿಗೆ ಕೂಡಲೇ ಹೊರಡಲು ನಿಗದಿಪಡಿಸಬೇಕು, ಕೇರಳದವರಿಗೆ ದಿನನಿತ್ಯ ಎರಡು ವಿಮಾನದ ವ್ಯವಸ್ಥೆಯಿದೆ, ಕನ್ನಡಿಗರರಿಗೆ ಕನಿಷ್ಠ ವಾರಕ್ಕೆ ಎರಡು ವಿಮಾನದ ವ್ಯವಸ್ಥೆ ಮಾಡುವಂತೆ ಮಾಡಿರುವ ಮನವಿಗೆ ಈ ಕುರಿತು ಸಂಬಂಧಪಟ್ಟ ಇಲಾಖೆಯಲ್ಲಿ ಮಾತನಾಡಿ ಕನ್ನಡಿಗರಿಗೂ ಈ ವಿಷಯದಲ್ಲಿ ನ್ಯಾಯ ಒದಗಿಸಲು ಪ್ರಯತ್ನಿಸುತ್ತೇನೆ ಎಂದರು.

ಕನ್ನಡಿಗಾಸ್‌ ಹೆಲ್ಪ್ ಲೈನ್‌, ಹಲವಾರು ಕನ್ನಡಿಗರು ಸಣ್ಣ ಪುಟ್ಟ ದಂಡಕಟ್ಟಬೇಕಾದ ಸಮಸ್ಯೆಯಲ್ಲಿ ಸಿಲುಕಿದ್ದಾರೆ, ಅದನ್ನು ಕಟ್ಟದೇ ಪ್ರಯಾಣಿಸಲು ಅನುಮತಿ ಸಿಗದು, ಇದನ್ನು ಕೇಂದ್ರ ವಿದೇಶಾಂಗ ಇಲಾಖೆಯ ಮೂಲಕ ಯುಎಈ ಸರ್ಕಾರದ ಗಮನಕ್ಕೆ ತಂದು ಅವರ ದಂಡವನ್ನು ಮನ್ನಮಾಡಲು ಮನವಿ ಮಾಡಿದರೆ ಖಂಡಿತಾಗಿಯೂ ಇಲ್ಲಿನ ಸರ್ಕಾರ ಸಕಾರಾತ್ಮಕವಾಗಿ ಸ್ಪಂದಿಸಲಿದೆ ಎಂದು ಮನವಿಮಾಡಿದಾಗ ಕೂಡಲೇ ಅಂತಹ ಸಂಕಷ್ಟದಲ್ಲಿರುವ ಕನ್ನಡಿಗರ ಮಾಹಿತಿ ಮತ್ತು ಸಂಪೂರ್ಣ ವಿವರಗಳೊಂದಿಗೆ ನನಗೆ ಇ ಮೈಲ್‌ ಮೂಲಕ ಕಳುಹಿಸಿ, ತಕ್ಷಣವೇ ಅದನ್ನು ವಿದೇಶಾಂಗ ಸಚಿವರ ಗಮನಕ್ಕೆ ತರುವುದಾಗಿ ಪ್ರಹ್ಲಾದ್‌ ಜೋಷಿ ಭರವಸೆ ನೀಡಿದರು.

ಇದೇ ವೇಳೆ, ಕನ್ನಡಿಗಾಸ್‌ ಹೆಲ್ಪ್ ಲೈನ್‌ ಯುಎಈಯಲ್ಲಿ ಸಂಕಷ್ಟಕ್ಕೆ ಸಿಲುಕಿರುವವರಿಗಾಗಿ ಮಾಡುತ್ತಿರುವ ಸೇವೆಯನ್ನು ಪ್ರಧಾನಿ ನರೇಂದ್ರ ಮೋದಿಯವರ ಗಮನಕ್ಕೂ ತರುವುದಾಗಿ ತಿಳಿಸಿದರು.