ಅಂಗೈಯಲ್ಲಿ 2.56 ಲಕ್ಷ ಗ್ರಾ.ಪಂ. ಮಾಹಿತಿ!

ಒಂದೇ ಕಡೆ ಸಂಪೂರ್ಣ ಮಾಹಿತಿ "ಭುವನ್‌ ಪಂಚಾಯತ್‌ 3.0' ಹೆಸರಿನ ಯೋಜನೆ

Team Udayavani, Jan 29, 2020, 6:39 AM IST

ಇಸ್ರೋ ಕೇಂದ್ರ ಕಚೇರಿಯಲ್ಲಿ ಸಚಿವ ಡಾ| ಜಿತೇಂದ್ರ ಸಿಂಗ್‌ ಮಂಗಳವಾರ ಪೋರ್ಟಲ್‌ ಉದ್ಘಾಟಿಸಿದರು.

ಬೆಂಗಳೂರು: ದೇಶದ ಎಲ್ಲ 2.56 ಲಕ್ಷ ಗ್ರಾಮ ಪಂಚಾಯತ್‌ಗಳ ಸಮಗ್ರ ಮಾಹಿತಿ ಈಗ ಅಂಗೈಯಲ್ಲಿ ಲಭ್ಯ! ಗ್ರಾ. ಪಂ.ಗಳ ಜನಸಂಖ್ಯೆ, ಭೂಪ್ರದೇಶ, ಅದರ ಬಳಕೆ, ಆರೋಗ್ಯ, ಶಿಕ್ಷಣ, ಸಾಮಾಜಿಕ-ಆರ್ಥಿಕ ಸ್ಥಿತಿ, ಹವಾಮಾನ ಸೇರಿದಂತೆ ವಿವಿಧ ರೂಪದ ದತ್ತಾಂಶಗಳನ್ನು ಸಂಗ್ರಹಿಸಿ ಒಂದೇ ಜಿಯೊ ಪೋರ್ಟಲ್‌ನಲ್ಲಿ ಅಳವಡಿಸಲಾಗಿದೆ. ಹೀಗೆ ದೇಶದ ವಿಷಯಾಧಾರಿತ ದತ್ತಾಂಶಗಳನ್ನು ಕ್ರೋಡೀಕರಿಸಿದ್ದು ಇದೇ ಮೊದಲು. ಮುಂದಿನ ದಿನಗಳಲ್ಲಿ ಸರಕಾರ ರೂಪಿಸುವ ಯೋಜನೆಗಳಿಗೆ ಇದು ನೆರವಾಗಲಿದೆ ಎಂದು ಇಸ್ರೋ ಅಧಿಕಾರಿಗಳು ತಿಳಿಸಿದ್ದಾರೆ.

ಇಸ್ರೋ ಮತ್ತು ರಾಷ್ಟ್ರೀಯ ದೂರಸಂವೇದಿ ಕೇಂದ್ರ ಎನ್‌ಆರ್‌ಎಸ್‌ಸಿ ಸಂಯುಕ್ತವಾಗಿ ಬಾಹ್ಯಾಕಾಶ ಆಧಾರಿತ ಮಾಹಿತಿ ವಿಕೇಂದ್ರೀಕೃತ ಯೋಜನೆ (ಎಸ್‌ಐಎಸ್‌ಡಿಪಿ) ಅಡಿ ವೆಬ್‌ ಜಿಯೊ ಪೋರ್ಟಲ್‌ ಅಭಿವೃದ್ಧಿಪಡಿಸಿದ್ದು, ಇದಕ್ಕೆ “ಭುವನ್‌ ಪಂಚಾಯತ್‌ 3.0′ ಎಂದು ನಾಮಕರಣ ಮಾಡಲಾಗಿದೆ. ಇದರಲ್ಲಿ 2.56 ಲಕ್ಷ ಗ್ರಾ.ಪಂ.ಗಳ ಮಾಹಿತಿ ಸಂಗ್ರಹಿಸಲಾಗಿದೆ. 2016-17ರಲ್ಲಿ ಎಸ್‌ಐಎಸ್‌ಡಿಪಿ ಮೊದಲ ಹಂತ ಯಶಸ್ವಿಯಾದ ಹಿನ್ನೆಲೆಯಲ್ಲಿ ಅದರ ಮುಂದುವರಿದ ಭಾಗವಾಗಿ ಅದನ್ನು ಹೊಸ ರೂಪದಲ್ಲಿ ಪರಿಚಯಿಸಲಾಗಿದೆ.

ಭುವನ್‌ ಉಪಗ್ರಹದ ನೆರವಿನಿಂದ ಭೂಮಿಯ ಮೇಲ್ಮೆ„ಯಿಂದ ಕೇವಲ 2.5 ಮೀ. ದೂರದಿಂದ ಚಿತ್ರಗಳನ್ನು ಸೆರೆಹಿಡಿದು ಕಳುಹಿಸಿದ್ದು, ಅತ್ಯಧಿಕ ರೆಸಲ್ಯೂಷನ್‌ ಹೊಂದಿವೆ. ಚಿತ್ರಗಳಲ್ಲಿ ಭೂಬಳಕೆ ಮತ್ತು ವ್ಯಾಪ್ತಿ, ರಸ್ತೆ ಮತ್ತು ರೈಲು ಜಾಲ, ಒಳಚರಂಡಿ ಜಾಲ, ಸಾಮುದಾಯಿಕ ಆಸ್ತಿಗಳೆಲ್ಲವೂ ಇವೆ. 2011ರ ಜನಗಣತಿಗೆ ಹೋಲಿಕೆ ಮಾಡಿ ದತ್ತಾಂಶಗಳನ್ನು ವಿಜ್ಞಾನಿಗಳು ವಿಶ್ಲೇಷಣೆ ಮಾಡಿದ್ದಾರೆ.

ನವ ಭಾರತಕ್ಕೆ ನೂತನ ಸಾಧನ
ಕೇಂದ್ರ ಪರಮಾಣು ಶಕ್ತಿ ಮತ್ತು ಬಾಹ್ಯಾಕಾಶ ಇಲಾಖೆ ಖಾತೆಯ ರಾಜ್ಯ ಸಚಿವ ಜಿತೇಂದ್ರ ಸಿಂಗ್‌ ಪೋರ್ಟಲ್‌ ಬಿಡುಗಡೆ ಮಾಡಿದರು. ಬಳಿಕ ಮಾತನಾಡಿ, ಪ್ರಧಾನಿ ಮೋದಿ ಅವರ ಕನಸಿನ ಭಾರತ ನಿರ್ಮಾಣಕ್ಕೆ ದೇಶದ ಬಾಹ್ಯಾಕಾಶ ತಂತ್ರಜ್ಞಾನವು ಪೂರಕ ಮತ್ತು ಅತ್ಯಗತ್ಯ ಸಾಧನ ಎಂದು ವಿಶ್ಲೇಷಿಸಿದರು.

ವಿಜ್ಞಾನಿಗಳು ದಶಕಗಳಿಂದ ಇದಕ್ಕೆ ಸಮಯ ವ್ಯಯಿಸಿದ್ದಾರೆ. ವಿಕ್ರಂ ಸಾರಾಭಾಯ್‌ ಹೇಳಿದಂತೆ ಬಾಹ್ಯಾಕಾಶ ಕ್ಷೇತ್ರಕ್ಕೆ ಸಂಬಂಧಿಸಿದ ಯೋಜನೆಗಳು ಇಂದು ದೇಶಾದ್ಯಂತ ಕಾರ್ಯನಿರ್ವಹಿಸುತ್ತಿವೆ. ಈ ಮೂಲಕ ಖಗೋಳ ವಿಜ್ಞಾನ “ಭಾರತೀಯ’ವಾಗಿದೆ ಎಂದು ಬಣ್ಣಿಸಿದರು.

ಇಸ್ರೋ ಅಧ್ಯಕ್ಷ ಕೆ. ಶಿವನ್‌ ಮಾತನಾಡಿ, ಸಂಸ್ಥೆಯು ದೇಶದ ಅಭಿವೃದ್ಧಿಗೆ ನಿರಂತರವಾಗಿ ಶ್ರಮಿಸುತ್ತಿದೆ. ಈ ನಿಟ್ಟಿನಲ್ಲಿ ಹಲವಾರು ಅಪ್ಲಿಕೇಷನ್‌ಗಳನ್ನು ಅಭಿವೃದ್ಧಿಪಡಿಸಿದೆ. ಈಗ ಲಭ್ಯವಿರುವ ಮಾಹಿತಿಗಳು ಗ್ರಾಮೀಣಾಭಿವೃದ್ಧಿಗೆ ಸಾಕಷ್ಟು ಅನುಕೂಲ ಮಾಡಿಕೊಡಲಿವೆ ಎಂದರು.