ಅಕ್ರಮ ಆಸ್ತಿ ಆರೋಪ: ಜಾರಿ ನಿರ್ದೇಶನಾಲಯದಿಂದ ಜಾರ್ಜ್‌ ತೀವ್ರ ವಿಚಾರಣೆ

Team Udayavani, Jan 16, 2020, 7:03 PM IST

ಬೆಂಗಳೂರು: ವಿದೇಶಗಳಲ್ಲಿ ಅಕ್ರಮ ಆಸ್ತಿ ಹೊಂದಿರುವ ಕುರಿತು ಮಾಜಿ ಸಚಿವ ಕೆ.ಜೆ ಜಾರ್ಜ್‌ ವಿರುದ್ಧ ತನಿಖೆ ಆರಂಭಿಸಿರುವ ಜಾರಿ ನಿರ್ದೇಶನಾಲಯ ಗುರುವಾರ ಅವರನ್ನು ತೀವ್ರ ವಿಚಾರಣೆ ನಡೆಸಿತು.

ಶಾಂತಿನಗರದಲ್ಲಿರುವ ಇ.ಡಿ ಕಚೇರಿಯಲ್ಲಿ ತನಿಖಾಧಿಕಾರಿಗಳ ತಂಡ ಜಾರ್ಜ್‌ ಅವರನ್ನು ನಾಲ್ಕು ಗಂಟೆಗಳಿಗೂ ಅಧಿಕ ಕಾಲ ವಿಚಾರಣೆ ನಡೆಸಿ ಮಾಹಿತಿ ಪಡೆದುಕೊಂಡಿದೆ.ಜತೆಗೆ, ಆಸ್ತಿ ವಿವರಗಳಿಗೆ ಸಂಬಂಧಿಸಿದಂತೆ ಸದ್ಯ ನೀಡಿರುವ ದಾಖಲೆಗಳನ್ನು ಪರಿಶೀಲಿಸಿದ್ದು ಅವರ ಸಂಬಂಧಿರ ಆಸ್ತಿ ವಿವರವನ್ನೂ ಪಡೆದುಕೊಂಡಿದ್ದಾರೆ.

ತಮ್ಮ ಲೆಕ್ಕಪರಿಶೋಧಕರ ಜತೆಯಲ್ಲಿಯೇ ಇ.ಡಿ ಕಚೇರಿಗೆ ತೆರಳಿದ್ದ ಜಾರ್ಜ್‌ ವಿದೇಶಗಳಲ್ಲಿ ಸಂಬಂಧಿಕರ ಹೆಸರಿನಲ್ಲಿರುವ ಆಸ್ತಿ ಹಾಗೂ ಇನ್ನಿತರೆ ವಾಣಿಜ್ಯ ವ್ಯವಹಾರಗಳ ಕುರಿತು ದಾಖಲೆಗಳನ್ನು ನೀಡಿದ್ದಾರೆ ಎಂದು ಹೇಳಲಾಗಿದೆ. ಆದರೆ, ಮತ್ತಷ್ಟು ಪೂರಕ ದಾಖಲೆಗಳನ್ನು ನೀಡುವಂತೆ ಸೂಚಿಸಿ. ಅಗತ್ಯ ವಿಚಾರಣೆಗೆ ಕರೆದಾಗ ಹಾಜರಾಗುವಂತೆ ಸೂಚಿಸಿ ಕಳುಹಿಸಿದೆ ಎಂದು ಮೂಲಗಳು ಹೇಳಿವೆ.

ವಿಚಾರಣೆ ಕುರಿತು ಮಾಧ್ಯಮದವರ ಜತೆ ಮಾತನಾಡಿರುವ ಜಾರ್ಜ್‌, ದೇಶದ ಕಾನೂನಿನ ಮೇಲೆ ನಂಬಿಕೆಯಿದ್ದು. ಎಲ್ಲ ವ್ಯವಹಾರಗಳು ಪಾರದರ್ಶಕವಾಗಿವೆ. ಇ.ಡಿ ವಿಚಾರಣೆಗೆ ಸಹಕರಿಸುತ್ತೇನೆ.ಮತ್ತಷ್ಟು ದಾಖಲೆಗಳನ್ನು ನೀಡುವಂತೆ ಅಧಿಕಾರಿಗಳು ಕೋರಿದ್ದು ನೀಡುವುದಾಗಿ ಹೇಳಿದ್ದಾರೆ.

ಆರೋಪ ಏನು?
ಜಾರ್ಜ್‌ ಹಾಗೂ ಕುಟುಂಬಸ್ಥರು ಅಮೆರಿಕಾ, ಆಸ್ಟ್ರೇಲಿಯಾದಲ್ಲಿ ಕಂಪೆನಿಗಳನ್ನು ಹೊಂದಿದ್ದು ಶೆಲ್‌ ಕಂಪೆನಿಗಳು, ಬ್ಯಾಂಕ್‌ಗಳಿಂದ ಹಣ ಪಡೆದು ಅಕ್ರಮ ಎಸಗಿದ್ದಾರೆ ಎಂದು ಆರೋಪಿಸಿ ಕರ್ನಾಟಕ ರಾಷ್ಟ್ರ ಸಮಿತಿ ಅಧ್ಯಕ್ಷ ರವಿಕೃಷ್ಣಾರೆಡ್ಡಿ ದೂರು ನೀಡಿದ್ದರು. ಈ ದೂರಿನ ಅನ್ವಯ ಜಾರ್ಜ್‌ ಹಾಗೂ ಅವರ ಸಂಬಂಧಿಕರ ವಿರುದ್ಧ ವಿದೇಶಿ ವಿನಿಮಯ ನಿರ್ವಹಣಾ ಕಾಯಿದೆ ( ಫೆಮಾ) ಅಡಿಯಲ್ಲಿ ಇ.ಡಿ ತನಿಖೆ ನಡೆಸುತ್ತಿದೆ.

ವಿಚಾರಣೆಗೆ ಹಾಜರಾಗುವಂತೆ ಇತ್ತೀಚೆಗೆ ಜಾರ್ಜ್‌ ಹಾಗೂ ಸಂಬಂಧಿಕರಿಗೆ ಸಮನ್ಸ್‌ ನೀಡಿದ್ದ ಅಧಿಕಾರಿಗಳು, ಜಾರ್ಜ್‌ ಹಾಗೂ ಪತ್ನಿ ಸುಜಾ ಜಾರ್ಜ್‌, ಪುತ್ರಿ ರಿಟೀನಾ, ಪುತ್ರ ರಾಣಾ ಜಾರ್ಜ್‌ಗೆ ಸೇರಿದ ಪಾನ್‌ಕಾರ್ಡ್‌, ಆಧಾರ್‌ಕಾರ್ಡ್‌, ಪಾಸ್‌ಪೋರ್ಟ್‌ ಮತ್ತು ದೇಶ ಮತ್ತು ವಿದೇಶದಲ್ಲಿ ಕುಟುಂಬ ಸದಸ್ಯರ ಹೆಸರಿನ ಬ್ಯಾಂಕ್‌ ಖಾತೆ ದಾಖಲೆ, 2005-06ನಿಂದ ಪ್ರಸಕ್ತ ಸಾಲಿನವರೆಗೂ ಆದಾಯ ತೆರಿಗೆ ಪಾವತಿ, ಲೆಕ್ಕ ಪರಿಶೋಧಕ ಪತ್ರ, ದಾಖಲೆಗಳನ್ನು ಸಿಡಿ ಅಥವಾ ಡಿವಿಡಿ ಮೂಲಕ ಹಾಜರುಪಡಿಸಬೇಕು. ದೇಶ, ವಿದೇಶಗಳಲ್ಲಿಹೊಂದಿರುವ ವ್ಯವಹಾರ, ಷೇರು, ಆಸ್ತಿ, ಸಂಸ್ಥೆ ಬಗ್ಗೆಯೂ ದಾಖಲೆ ತರಬೇಕು ಎಂದು ಸೂಚಿಸಿದ್ದರು.

ನ್ಯೂಯಾರ್ಕ್‌ನಲ್ಲಿರುವ ಶಾಸಕ ಜಾರ್ಜ್‌ರ ಪುತ್ರಿ ರೆನಿಟಾ ಅಬ್ರಹಾಂ, ಅಳಿಯ ಕೆವಿನ್‌ ಅಬ್ರಹಾಂ ಕೋಟ್ಯಂತರ ರೂ. ಮೌಲ್ಯದ ಆಸ್ತಿ ಖರೀದಿಸಿದ್ದಾರೆ. ಆ ಪೈಕಿ ಒಂದು ಆಸ್ತಿ ಜಾರ್ಜ್‌, ಅವರ ಪತ್ನಿ ಸುಜಾ ಜಾರ್ಜ್‌, ಸಹೋದರ ಕೆ.ಜೆ. ಕುರುವಿಲ್ಲಾ ಹೆಸರಿನಲ್ಲಿದೆ. 2014 ಹಾಗೂ 2015ರಲ್ಲಿ ಲೋಕಾಯುಕ್ತಕ್ಕೆ ಸಲ್ಲಿಸಿದ್ದ ಆಸ್ತಿ ವಿವರದಲ್ಲಿ ನಮೂದಿಸಿದ್ದಾರೆ. ಆದರೆ, 2013 ಹಾಗೂ 2018ರ ಚುನಾವಣಾ ಅಫಿಡವಿಟ್‌ನಲ್ಲಿ ಮರೆಮಾಚಿದ್ದಾರೆ ಎಂಬುದು ದೂರುದಾರರ ಆರೋಪವಾಗಿದೆ.