ಕರ್ನಾಟಕದ ಐಷಾರಾಮಿ ರೈಲು ಗೋಲ್ಡನ್‌‌ ಚಾರಿಯೆಟ್‌ ಮತ್ತೆ ಹಳಿಗಳಲ್ಲಿ ಸಂಚರಿಸಲು ಸಿದ್ಧ

Team Udayavani, Oct 25, 2020, 5:45 AM IST

ಮಣಿಪಾಲ: ಕರ್ನಾಟಕದ ಐಷಾರಾಮಿ ರೈಲು ಗೋಲ್ಡನ್‌ ರಥ (ಗೋಲ್ಡನ್‌ ಚಾರಿಯೆಟ್‌) ಮತ್ತೆ ಹಳಿಗಳಲ್ಲಿ ಸಂಚರಿಸಲು ಸಿದ್ಧವಾಗಿದೆ. ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ (ಕೆಎಸ್‌ಟಿಡಿಸಿ) ನಡೆಸುತ್ತಿದ್ದ ಈ ರೈಲು ಕಳೆದ ವರ್ಷ ಸಾಕಷ್ಟು ಪ್ರಯಾಣಿಕರ ಕೊರತೆಯಿಂದಾಗಿ ತಾತ್ಕಾಲಿಕವಾಗಿ ಸ್ಥಗಿತಗೊಂಡಿತ್ತು. ಈ ವರ್ಷದ ಆರಂಭದಲ್ಲಿ ಇಂಡಿಯನ್‌ ರೈಲ್ವೇ ಕ್ಯಾಟರಿಂಗ್‌ ಅಂಡ್‌ ಟೂರಿಸಂ ನಿಗಮಕ್ಕೆ (IRCTC) ರೈಲು ಒಳಾಂಗಣವನ್ನು ನವೀಕರಿಸುವ ಕಾರ್ಯವನ್ನು ವಹಿಸಲಾಗಿತ್ತು.

ಏನಿದು ಗೋಲ್ಡನ್‌ ರಥ
ಗೋಲ್ಡನ್‌ ಚಾರಿಯೆಟ್‌ ವಿಲಾಸಿ ರೈಲು ಕಾರ್ಯಾಚರಣೆ ಆರಂಭವಾದದ್ದು 2008ರಲ್ಲಿ. ಕರ್ನಾಟಕ ರಾಜ್ಯ ಸರಕಾರ ಹಾಗೂ ರೈಲ್ವೇ ಸಚಿವಾಲಯದ ಸಹಯೋಗದಲ್ಲಿ ಇದು ಆಗಿತ್ತು. ರೈಲಿನಲ್ಲಿ 18 ಬೋಗಿಗಳು ಮತ್ತು 44 ಅತಿಥಿ ಕೋಣೆಗಳಿರುತ್ತವೆ. ಒಟ್ಟು 84 ಪ್ರಯಾಣಿಕರ ಸಾಮರ್ಥ್ಯ. ಪ್ರತಿ ಕ್ಯಾಬಿನ್‌ನಲ್ಲೂ ಆಧುನಿಕ ಸೌಲಭ್ಯ, ಸುಸಜ್ಜಿತ ಪೀಠೊಪಕರಣ, ಐಷಾರಾಮಿ ಕೊಠಡಿ ಮತ್ತು ಸ್ನಾನಗೃಹಗಳು, ಹೊಸ ಲಿನಿನ್‌ ಮತ್ತು ಕಟ್ಲರಿಗಳನ್ನು ಅಳವಡಿಸಲಾಗಿದೆ. ಸ್ಟ್ರೀಮಿಂಗ್‌ ಸೌಲಭ್ಯಕ್ಕಾಗಿ ವೈ-ಫೈ ಹೊಂದಿರುವ ಸ್ಮಾರ್ಟ್‌ ಟಿವಿ ಇದೆ. ಇಷ್ಟಲ್ಲದೆ ಸಿಸಿಟಿವಿಗಳು ಮತ್ತು ಅಗ್ನಿಶಾಮಕ ಮುನ್ನೆಚ್ಚರಿಕೆಗಳನ್ನು ಸಹ ರೈಲಿನಲ್ಲಿ ನವೀಕರಿಸಲಾಗಿದೆ.