ಕರಾವಳಿ ಕಾವಲು ಪಡೆಗೆ ಎಚ್‌ಎಎಲ್‌ನ 3 ಹೆಲಿಕಾಪ್ಟರ್‌

Team Udayavani, Jun 13, 2021, 7:20 AM IST

ಹೊಸದಿಲ್ಲಿ: ಕೇಂದ್ರ ಸರಕಾರಿ ಸ್ವಾಮ್ಯದ ಹಿಂದೂಸ್ಥಾನ್‌ ಏರೊನಾಟಿಕ್ಸ್‌ ಲಿ. (ಎಚ್‌ಎಎಲ್‌) ತಯಾರಿಸಿರುವ ಎಎಲ್‌ಎಚ್‌ ಎಂ.ಕೆ.-3 ಮಾದರಿಯ 3 ಅತ್ಯಾಧುನಿಕ ಲಘು ಹೆಲಿಕಾಪ್ಟರ್‌ಗಳು ಭಾರತೀಯ ಕರಾವಳಿ ಕಾವಲು ಪಡೆಗೆ ಸೇರ್ಪಡೆಗೊಂಡಿವೆ.

ಕರಾವಳಿ ಕಾವಲುಪಡೆ ದಿಲ್ಲಿ ಕೇಂದ್ರ ಕಚೇರಿ ಮತ್ತು ಬೆಂಗಳೂರಿನ ಎಚ್‌ಎಎಲ್‌ ಹೆಲಿಕಾಪ್ಟರ್‌ ಎಂಆರ್‌ಒ ವಿಭಾಗದೊಂದಿಗೆ ಶನಿವಾರ ನಡೆದ ವರ್ಚುವಲ್‌ ಸಮಾರಂಭ ದಲ್ಲಿ ರಕ್ಷಣ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಡಾ| ಅಜಯ್‌ ಕುಮಾರ್‌ ಈ ಹೆಲಿಕಾಪ್ಟರ್‌ಗಳನ್ನು ವಿಧ್ಯುಕ್ತವಾಗಿ ಕರಾವಳಿ ಕಾವಲು ಪಡೆಗೆ ಸೇರ್ಪಡೆಗೊಳಿಸಿದರು.

ಕರಾವಳಿ ಕಾವಲು ಪಡೆಯ ಬಳಿ ಈಗಾಗಲೇ ಇರುವ ಎಎಲ್‌ಎಚ್‌ ಎಂಕೆ-3 ಮಾದರಿಯ ಹೆಲಿಕಾಪ್ಟರ್‌ ಸಮೂಹಕ್ಕೆ ಈ ಮೂರು ಹೆಚ್ಚುವರಿಯಾಗಿ ಸೇರ್ಪಡೆಗೊಂಡಿವೆ. ಕರಾವಳಿ ಪಡೆಯ ನೆಲೆಗಳು ಇರುವ ಭುವನೇಶ್ವರ, ಪೋರ್‌ಬಂದರ್‌, ಚೆನ್ನೈ ಮತ್ತು ಕೊಚ್ಚಿಯಲ್ಲಿ ಇವು ಕಾರ್ಯ ನಿರ್ವಹಿಸುತ್ತವೆ ಎನ್ನಲಾಗಿದೆ.

ಹೆಲಿಕಾಪ್ಟರ್‌ಗಳ ವಿಶೇಷತೆ
ಈ ಹೆಲಿಕಾಪ್ಟರ್‌ಗಳು ಸರ್ವೇಲನ್ಸ್‌ ರಾಡಾರ್‌, ಎಲೆಕ್ಟ್ರೋ ಆಪ್ಟಿಕ್‌ ಪಾಡ್‌, ಮೆಡಿಕಲ್‌ ಇಂಟೆನ್ಸಿವ್‌ ಕೇರ್‌ ಯೂನಿಟ್‌, ಹೈ ಇಂಟೆನ್ಸಿಟಿ ಸರ್ಚ್‌ ಲೈಟ್‌, ಮೆಷಿನ್‌ ಗನ್‌ ಮುಂತಾದ ಸೌಲಭ್ಯಗಳನ್ನು ಹೊಂದಿವೆ.