ಹಾವೇರಿ: ಪೊಲೀಸರು, ಸರಕಾರಿ ವೈದ್ಯ ಸೇರಿ 50 ಮಂದಿಯಲ್ಲಿ ಕೋವಿಡ್ ಪಾಸಿಟಿವ್

Team Udayavani, Jul 29, 2020, 8:22 PM IST

ಹಾವೇರಿ: ಎಂಟು ಜನ ಪೊಲೀಸರು, ಓರ್ವ ಸರ್ಕಾರಿ ವೈದ್ಯ, ಸಹಾಯಕ ಜೈಲರ್, ಲ್ಯಾಬ್ ಟೆಕ್ನಿಷಿಯನ್, ವಾಹನ ಚಾಲಕ, ವ್ಯಾಪಾರಿ ಸೇರಿ ಜಿಲ್ಲೆಯಲ್ಲಿ ಬುಧವಾರ ೫೦ಜನರಿಗೆ ಕೋವಿಡ್-19 ಪಾಸಿಟಿವ್ ದೃಢಪಟ್ಟಿದೆ.

ಸೋಂಕಿಗೆ ಚಿಕಿತ್ಸೆ ಪಡೆಯುತ್ತಿದ್ದವರಲ್ಲಿ ಇಬ್ಬರು ಗುಣಮುಖರಾಗಿ ಬಿಡುಗಡೆ ಹೊಂದಿದ್ದಾರೆ. ಜಿಲ್ಲೆಯ ಹಾನಗಲ್ಲ ತಾಲೂಕಿನಲ್ಲಿ ಎರಡು, ಬ್ಯಾಡಗಿ ತಾಲೂಕಿನಲ್ಲಿ ನಾಲ್ಕು, ಸವಣೂರು ತಾಲೂಕಿನಲ್ಲಿ ಐವರು, ರಾಣಿಬೆನ್ನೂರು ತಾಲೂಕಿನಲ್ಲಿ ಏಳು ಜನರು, ಶಿಗ್ಗಾಂವಿ ತಾಲೂಕಿನಲ್ಲಿ ಒಂಭತ್ತು ಜನರು, ಹಿರೇಕೆರೂರು ತಾಲೂಕಿನಲ್ಲಿ 11 ಹಾಗೂ ಹಾವೇರಿ ತಾಲೂಕಿನಲ್ಲಿ 12 ಪ್ರಕರಣ ಪತ್ತೆಯಾಗಿವೆ.

ಜಿಲ್ಲೆಯಲ್ಲಿ ಈವರೆಗೆ 877 ಕೋವಿಡ್- 19 ಪಾಸಿಟಿವ್ ಪ್ರಕರಣಗಳು ದೃಢಗೊಂಡಿವೆ. ಇಂದಿನವರೆಗೆ 503 ಜನರು ಸೋಂಕಿನಿಂದ ಗುಣಮುಖರಾಗಿ ಬಿಡುಗಡೆಹೊಂದಿದ್ದಾರೆ ಹಾಗೂ 24 ಜನರು ಮೃತಪಟ್ಟಿದ್ದಾರೆ. 350 ಪ್ರಕರಣಗಳು ಸಕ್ರಿಯವಾಗಿವೆ ಎಂದು ನೂತನ ಜಿಲ್ಲಾಧಿಕಾರಿ ಸಂಜಯ ಬಿ.ಶೆಟ್ಟೆಣ್ಣನವರ ತಿಳಿಸಿದ್ದಾರೆ.